重點當然係聯儲局議息，留意會出最新經濟數據預測． LVMH 同 Adobe 創新高（ASML Nvidia都係）。如何發掘下一次meme股（兩圖）。商品價格似乎同通脹冇乜關係。聯儲局就係通脹之源。點解ESG會搞到惡性通脹。Nonreplicable publications are cited more than replicable ones。SnapChat點收科？幫Amazon打工同幫Google打工嘅分別 (Patreon)

快評幾句— 重點當然係聯儲局議息，留意會出最新經濟數據預測

大師冇點你— LVMH 同 Adobe 創新高（ASML Nvidia都係）

每日一圖— 如何發掘下一次meme股（兩圖）。商品價格似乎同通脹冇乜關係。聯儲局就係通脹之源

Good Read —　點解ESG會搞到惡性通脹。Nonreplicable publications are cited more than replicable ones。SnapChat點收科？幫Amazon打工同幫Google打工嘅分別

FB Post Summary —歐洲國家盃冠軍：意大利

1. 應該算係好消息，我壇大project到死線臨近，進度就神速追上（幾時都係咁），所以你見我原本話星期一（今日呢篇）星期二都未必出文，結果都係會出。不過上週末就冇咗了，之後補返。

2. 壞消息係，Patreon嗰邊仲搞緊，所以嚟緊嘅影像版都係未有vimeo住，只能用DropBox．但應該都睇到的。

3. 同埋再提返，好多人都冇留意，但，影音版最低係有mp3 file的，方便你唔睇電話，或在公司聽。

4. 為咗補償大家，今日係整夠4個圖，同埋4篇文的

快評幾句— 重點當然係聯儲局議息，留意會出最新經濟數據預測

5. 港股冇市，美股呢，回少少但又唔係大跌，科技股有力，都幾奇怪。

6.但呢兩日最重要嘅一定係：聯儲局議息，當然唔會加息，但大家會睇局方嘅最新取態。仲有，今次又係一年四次比較「大」嘅會議，會後會有局方最新嘅經濟預測。咁上調PCE（留意聯儲局鍾意睇PCE多過CPI）預測就肯定，睇下局方取態覺得係咪真係完全暫時。

7. 我見我呢排成日都話小心啲，估值貴，咁當然唔係叫你沽，甚至唔係叫你停止買。但，即係如果忽然間大調整，你就會知道係咩事，亦唔好十分意外。若果債息一急彈上去，加埋呢個咩「惡性通脹」嘅劇本，有個大啲嘅調整好合理

大師冇點你— LVMH 同 Adobe 創新高

8 咁當然我每次都會試下畀啲新思考你。LVMH同愛馬士我都差不多時間寫，亦都買埋，貼埋出嚟，剛好2個月前。LVMH就升咗12%，愛馬士直頭去到18%，2個月咋喎，我相當滿意，仲要個市係唔係太好嘅，仲要差不多日日新高，坐得舒服，雖然中途有時跌5%又有讀者嚟問我點算。

9. 但兩隻重點係乜？固然都係奢侈品股，但我覺得共通點係：兩間都歐洲公司。你見今年歐洲股市做得相當之好，而係極少人講嘅。你有邊位今年年頭同你講歐洲股？冇。歐洲經濟一片死水（是真的），又冇科技股（也是真），企業榜上全部被中國美國公司趕下去（都係真）。但，偏偏歐洲股市今年就做得幾好。可見你講咩經濟根本多餘，當然亦多得今年普遍都係舊經濟同價值股回歸（但LVMH愛馬士唔係價值股）

10. 至於Adobe（PDF同Photoshop嗰間），往年講二線科技股提過，早排講賣盤亦講過，但只係略提。所以唔認叻，但我都放咗入去Monitor List度。有冇機會賣盤呢又？我估機會唔細。因為你政府如果抽Big Tech重稅（Adobe當然唔係）或各樣嘢，我不如就買其他公司算，交少啲稅。另外，Adobe始終唔係平台，又唔係咩民生嘢，同Big Tech業務又冇乜重叠，照計相對地易批。

11. 寫完文先見ASML同Nvidia新高，但不再重覆了。

每日一圖— 如何發掘下一次meme股（兩圖）。商品價格似乎同通脹冇乜關係。聯儲局就係通脹之源

12 .如何發掘下一次meme股（兩圖）—兩個畀晒你。我就一向唔鼓勵大家炒meme股嘅，況且我啲往績都唔算好。不過堅持想睇嘅，就畀少少資料你。第一個圖你見到，就係沽空比較最高嗰啲公司，自己對號入座。問題係呢啲數字往往變得好快，滯後唔少的，況且啲美國連登仔本身都內鬨，而家好多時都意見分歧，唔似以前咁齊心咁推到一隻，有人提WISH（唔怪得早排升）但都畀其他人鬧。第二個圖嘅，亦畀你見到，沽空最多嘅，又不見得會係升得最多嘅。

13. 商品價格似乎同通脹冇乜關係— 呢個有少少違反你直覺，你有興趣可以去拎啲data玩下，但我係傾向相信的。先講佢嘅做法，都好簡單，做個scatter plot．見到如果fit 商品價格同PMI，都大約有56%嘅R^2 （統計嘢，你大約理解做PMI入面有56%可以由商品價格解釋）。去到PPI（工廠價格）都大約有52%。但去到CPI（消費物價指數），得返16%。點解會咁？我覺得不難理解，個經濟唔係五十年前咁啦。你杯星巴克，咖啡豆佔嘅成本你估有幾多？更多係舖租同人工。

14. 聯儲局就係通脹之源—非常簡單嘅圖，通脹當然一路都有。但見到1913年開始起飛。發生咩事？唔係打仗，而係聯儲局成立。第二次大起飛係咩時間？就係1971年，美國總統尼克遜放棄金本位制，美金從此點印都有。你問我嘛，1913可能只係時間巧合，但1971個改變係好明顯的。同埋，其實個圖應該要log scale

Good Read —　點解ESG會搞到惡性通脹。Nonreplicable publications are cited more than replicable ones。SnapChat點收科？幫Amazon打工同幫Google打工嘅分別

15. 點解ESG會搞到惡性通脹— 一個字，油價。ESG 明顯將頁岩氣革命打回頭，作者認為會引致油價大升，而以往但凡石油有supply shock都見到通脹大升。我是不太同意的，首先以上個推論理據唔係好強，二來，你睇今日每一日圖都有講，今時今日，油價對通脹仲係咁大影響？

16. Nonreplicable publications are cited more than replicable ones—劣幣驅良幣嘅例子。講學術論文，有啲實驗係可以被複製嘅，即係你可以再做多一次。但有啲唔得，特別係社會科學嘅東西。咁當然可被複製嘅會好啲，但結果發現，不可被複製嘅，引用率高好多。點解？好可能係因為過癮。可能根本錯，但過癮。正如fake news傳得最快。

17. SnapChat點收科？—講投資者同用家同街外人嘅睇法好似完全唔同。有人以為間公司已經冇乜人理，但同時又一路都好落力咁造就唔少KOL發達，同時間你見股價表現都強，成1000億美金市值。

18. 幫Amazon打工同幫Google打工嘅分別—由一個兩間公司都做過嘅員工現身說法（當然唔係貨倉搬貨的）。好多都同你估嘅差不多，Google 自由啲，Amazon傳統啲。Google 闊佬啲，Amazon度縮啲（唔一定指人工，指其他嘢）。但，有趣嘅係，作者自己請人，就寧願用Amazon嘅方法，亦都鍾意請返前Amazon嘅人。一個關鍵係：Amazon啲嘢似乎比較transferable，搬去第間公司都有用。Google就真係自己一個世界了

FB Post Summary —歐洲國家盃冠軍：意大利

19. 歐洲國家盃冠軍：意大利— 居然都百忙之中出到個post，無法，有時限性，留意篇文係開波前寫，唔係見到佢哋贏3:0我先講。不過留意返，埃汾絶對唔係捧意大利，純係學術研究。入面有講一個數據（歐聯首發人數），係大賽捧盃嘅必要條件（但未係充份）。當然類似呢啲「捧盃定律」仲有好多，差不多每隊熱門你都可以fit到規律落去—咁所以，識得分邊啲數據有用，邊啲冇乜意思，就係功力。而呢部份亦往往有啲主觀。同投資根本係一樣的。另外，大熱係法國，亦都乎合呢個必要條件，但我偏要寫意大利。因為法國好多人寫，扑中都冇特別。呢度又係一個教訓：好多寫文嘅人係為咗中嗰時可以巴閉，而唔係真係搵最易贏嘅嘢。你要小心

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。