美股今晚只睇聯儲局．大家樂341業績．時代天使6699同必瘦站1830．金源677盈喜．美股碎料兩則：Black Rock同 QualComm（其實關Nvidia事） (Patreon)

美股今晚只睇聯儲局

大家樂341業績

時代天使6699同必瘦站1830

金源677盈喜

美股碎料兩則：Black Rock同 QualComm（其實關Nvidia事）

1. 壞消息係埃汾睇波（應該人人知我捧德國？）兼且之前事忙，所以呢篇要香港星期三早餐時段先出到。

2. 但好消息係，已經忙完個大Project（遲下話畀大家知），Patreon會完全回復正常，Facebook文都會寫返。

3. 更好嘅係，Vimeo嗰邊正常返，所以影片版聲音版都會用返Vimeo，但今日亦會稍遲，因為我呢篇都遲咗出，朋友要再加工。

4. 反正市悶，講多啲個股，講多啲港股。

美股今晚只睇聯儲局

5. 美股冇乜特別，固然部份啲core list（持有嘅）創過新高，但唔少都倒跌，市況冇乜力。

6. 另外亦留意，反而係歐洲公司真係越升越有，第時勞蘇基金都會係放眼全球。新讀者有興趣嘅PM我，一路都on going．

7. 講過了，美股睇嘅，會係聯儲局會議，應該今晚兩三點有嘢睇。息一定唔加，但睇下佢哋點指引。同埋今次係會出個經濟數據預測，我畀定上一次嘅你。明顯地會調高個PCE預測，但幾多？只調今年定下年都會？留意佢啲數有當次（3月）同再上一次（12月）。

8. 另外，當然留意埋債市反應。近排都係相當靜，1.50%都唔到。正路有機會抽上，但抽幾多？

大家樂341業績

9. 其實星期一中午出，股價乜都反映晒啦（結果冇乜反應），所以只係當教學，講幾句，Facebook Page有時間可能會詳講。又係有Excel玩。

10. 更重要嘅係，公司之前出過盈喜，咁所以更加冇特別。盈喜嗰時話賺3.5億，實出賺3.6億，當然係non event．

11. 留意公司當然係拎咗保就業先賺錢，否則就蝕，我幫你整理咗。睇唔清個圖就開Excel

12. 同時你可以睇下最近四次半年，由未爆疫到而家，個情況點變化。即使抽起咗保就業，你都睇到個情況。無論睇收入，毛利，定係扣走保就業嘅核心純利，都見到肯定過咗最差嘅情況，已經反彈。甚至毛利同核心純利係已經好過 2019年10月- 2020年3月嗰半年（留意呢半年又有社運，同埋尾段都開始爆疫）。

13. 當然公司都有講，而家仲限入座率，亦係一個問題。未開關都係一個問題（大陸遊客好似都幾鍾意食），但我估仲係向好嘅方向行。

14. 其他可以留意下嘅包括：你見大陸做得不錯的。仲有公司以前唔借錢，呢兩次半年多咗好多貸款，但現水又一大舊喎，你見個 net cash根本仲要升。應該係應急之用。

15. 仲有，既然有保就業，賺到錢，就當然係會派息。

時代天使6699同必瘦站1830

16. 絶對冇叫大家抽，但如果你有抽又抽中時代天使嘅，恭喜你，隻嘢暗盤升一個開。我開頭仲以為係整容股，原來係隱型牙套。其實係咪即係好似美股Smile Direct Club？

17. 抽到嘅？唔使問，即沽。呢間唔係咩抖音快手，新股本身好多時定價已經貴，仲要升一個開，肯定係走。之後業績會唔會走樣仲未知。

18. 然後昨日做節目，都有同諗Sir講開另一隻「影子股」，必瘦站1830。呢隻嘢就堅咯，元朗仔，朗屏村，歐陽醫生，好似剛好50歲。嗰時上市（2013或2014）冇耐佢地搞好多公關嘢，我都有去。咁心諗真係搵笨啦，好嘢點會主動叫你去。

19. 但結果我當然係睇錯。呢間公司真係神奇，當年佢上市時，先搵幾千萬一年。而家？係一年賺幾億。純利喎！唔係收入。你可以睇下香港有幾多上市公司一年有幾億純利！

20. 另一特點係佢哋派息派得好，派八九成，甚至派晒。咁一直都係。但你要賺到錢先得架，就係佢地純利都一路上。所以個派息由當年每次兩三仙，到而家一次有一毫幾。

21. 生意我真係唔熟，但你見十分簡單的，生意一路上，派息一路上，股價自然咪上。而家成100億市值！居然大過隻大家樂！

金源677盈喜

22. 唔記得有冇在呢度寫過，好似冇。但應該唔少人知道我同金源（冇錯係金象米）管理層相識，以前都寫過唔少文。例如呢度，呢度，同埋呢度（唔知要唔要訂戶，你可以另外google）。

23. 呢隻嘢有一排畀人當係越南概念股，舊年2月我去越南正係睇佢地嘅業務。種米？唔係，係Circle K，便利店。越南嘅Circle K係佢哋的（同政府合營啦），至於越南有幾多Circle K之類，舊文有寫，只可以答你好多間！（但只在城市），

24. 咁所以都跟進下，公司出咗盈喜，全年會轉賺。不過冇乜特別，畀埋個Excel你。留意公司3月年結。咁舊年全年輸錢，主要因為金融資產公平價值，即係拎住嘅投資（股票或債券）跌咗。記住，舊年3月尾股市先反彈嘛，嗰度5300萬，仲要絶大多數係下半年（2019年10月至2020年3月），下半年舊數7900萬。

25. 咁然後對一一次半年業績（2020年4-9月），你見已經轉返賺啦，因為嗰舊東西變返正數，正2500萬，股市反彈嘛。咁今次，盈喜話你知，全年呢，嗰舊東西就正3700萬，咁咯，冇乜特別

26. 我有問過老闆（希望唔算內幕），都講2021年情況都艱難，所以我估本業都未必做得太好。

美股碎料兩則：Black Rock同 QualComm（其實關Nvidia事）

27. 真係快講，先講BlackRock，最新消息係佢地ETF嘅AUM （asset under management ）已經突破3萬億美金，3 Trillion．公司認為個市場仲可增長幾倍。嘩。

28. 另外之前可能有人留意，明明3月業績話Black Rock嘅AUM 係9萬億喎。咩回事？好簡單，佢嘅AUM唔止係ETF。咁可以比較返，3月時，ETF AUM係2.67萬億，而家3萬億，三個月唔夠有12%增長。

29. 以前講過，呢個行業相當簡單，就係可以以本傷人。佢個AUM去到咁大，壓到啲管理費極低，其他行家點爭？出糧交租都未夠。

30. 所以一路話，佢哋最大嘅敵人，係政府。咁玩法遲早就畀人搞。但直到嗰日嚟到之前，繼續有得玩。

31. 至於QualComm（高通）嘛，只係一樣嘢。就係執死雞或者執二攤。之前講過幾次，Nvidia買arm壇嘢，一路要等不同政府批，而以而家嘅政治環境睇，似乎都幾難。我估而家市場係預批唔到嘅，批到，Nvidia應該再有一浸升（都升咗好多）。唔得嘅？而家 QualComm話如果Nvidia批唔到，就佢上！當然似乎唔係成間買起。QualComm本身似乎唔係太貴，可以留意下

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。