ivanliresearch

版務：有關影音版。 iBond攻略，FANG+ ETF 2814。 Nvidia LVMH 醫渡科技 2158 創新高。冇人沽空，絶對唔係好事。通脹似乎真係冇失控。日本夠印錢啦咪又冇事。個個平台都出打賞功能。林建名一走，法國佬就反枱了 (Patreon)

Published:

2021-06-11 19:22:11

Imported:

2021-07

Content

版務（都重要）—有關影音版

快評幾句— iBond攻略，FANG+ ETF 2814

大師冇點你— Nvidia LVMH 醫渡科技 2158 創新高

每日一圖— 冇人沽空，絶對唔係好事。通脹似乎真係冇失控

Good Read —　日本夠印錢啦咪又冇事。個個平台都出打賞功能

FB Post Summary —林建名一走，法國佬就反枱了

版務（都重要）—有關影音版

1. 由於事忙，今個週末嘅專題文會暫停一次，分分鐘星期一二都冇文（做定最壞打算），但星期三肯定會回復正常。話咗呢排有壇大嘢搞緊

2. 另外，影音版方面，Patreon Link up vimeo有啲問題，所以昨日篇文只有聲冇影像。同時間我都同 Patreon投訴咗，似乎係佢哋嗰邊問題，仲解決緊。咁權宜之計，我出咗篇用DropBox嘅影像版，Public Link嚟的，應該睇到，搞唔掂話我知。如果嚟緊個vimeo Link up仲係有問題，就會用Drop Box頂住先，都冇計，非我控制到。

3. 最後，都見耐唔耐有人留言問：做乜唔出淨聲音版。一早有啦，你在影音版嘅 Post，最低attachment 有個 mp3 audio file的。

快評幾句— iBond攻略，FANG+ ETF 2814

4. 好啦，市況真係悶到一個點，固然通脹數據高之下，債息都冇升，標普指數星期四晚仲要破頂，星期五港股亦都扭轉7連跌，但實在係悶。

5. 我唯有講iBond，截咗架啦，你冇抽都冇計。咁同抽咗嗰啲講下個情況。一如所料，抽嘅人數同金額都破紀錄。有錢唔通唔拎？加上今次個通脹預期又高過上次，同埋市況悶都係個原因。

6. 最後見到係72萬人，但得200萬手。咁講過係順住派，即係人人至少2手，都大機會有3手。

7. 我就當然係第一日沽咗佢，都建議你咁做。至於第一日升幾多？唔知。但照計之前最差嗰次都有2.75%，今次點都在3%之上啦啩。咁即係1手執300蚊，一個戶口大約900蚊，幾個戶口（好似我咁）嘅，就3000銀啦，幾好。真係嫌錢腥？嫌雞碎咁多？下次問你拎3000蚊你咪知係咪雞碎咁多。

8. 另外都講埋，三星隻FANG+ ETF 2814都創咗上市新高。之前寫過下。但首先講返，雖然我識佢哋，但呢個絶對唔係廣告，冇收受任何金錢或非金錢利益。

9. 另外，隻嘢創上市新高，低位升咗9%．但留意個FANG+ 指數並冇新高的。點解？因為隻嘢5月尾先上市的，又畀佢捉到個低位呀下。

10. 我個人不覺得隻嘢特別吸引，反正我自己都買Facebook Amazon，但，唔夠錢買幾隻嘅可以考慮下。或者想亞洲時段買賣嘅，亦可以揀呢隻。除此以外冇乜特別啦。

大師冇點你— Nvidia LVMH 醫渡科技 2158 創新高

11. 除咗貼出嚟都講幾下，Nvidia係強到我都唔多信的，相當關鍵係買arm嗰件事，要N咁多國家批，而家度度都保護主義，真係唔易。但，似乎現價係估佢批唔到嘅。批到的話對股價影響都正面。你問我而家，就梗係偏貴，但之前係咁講你又唔買？跌落嚟又問我點算。

12. LVMH 同愛馬士呢期都強，有讀者都質疑，喂，7/80倍PE喎，貴過啲科技股，幾誇張。

13. 一半半。記住啦喎，股票係炒前景嘛，睇PE一定係睇下年，何況舊年係重災區。

14. 講得簡單啲，街預LVMH盈利 2021年差不多會係舊年嘅double，即時80倍PE變40倍。你計下啲數都大約見到。

15. 問題兩個，第一，40倍都仲係幾貴的，所以我而家寧願買Big Tech．「咁你又叫人買LVMH自己都買？」，大佬呀，本身我已經買咗好多Big Tech嘛！所以根本冇得one size fit all，我唔知你有幾多錢，其他錢又買咗乜，點答到你「XXX買唔買得過？」

16. 第二，呢啲預期數字準唔準？唔知架。但有個參考。咁邊度搵到，以前有Bloomberg就好啲，冇咪上網找下，煩啲咯，但美股唔少都搵到嘅。例如呢度。

17. 至於醫渡科技 2158，講咗啦，北水嘛。咁另一隻心通2160就普普通通，但，隻隻中咩。至少我寫嗰時買你唔會輸錢。

每日一圖— 冇人沽空，絶對唔係好事。通脹似乎真係冇失控

18. 冇人沽空，絶對唔係好事—以前都寫過類似現象，沽空高嗰時，往往就大市見底。原理同VIX差不多，一驚就抽上去，到你見到好高時，市場已好恐慌。呢個圖畀你睇到，當然未必咁簡單一個指標睇到晒，但，點講美股都係相當貴。

19. 通脹似乎真係冇失控—個圖可能唔係好清，你可以搵attachment．留意呢個已經係core CPI，扣咗食品同能源，按年升3.8%嗰個。粉紅色係基數效應，深紅色嘅呢？係啲對重啟經濟敏感嘅嘢。綠色係扣除晒。所以，依然覺得係暫時性喎。

Good Read —　日本夠印錢啦咪又冇事。個個平台都出打賞功能

20. 日本夠印錢啦咪又冇事—但凡講印銀紙有代價，高負債會通脹，好多人都會拎日本做反例。事實日本唔止冇通脹，仲要通縮。呢篇文唔深，講下日本同美國嘅分別。作者傾向覺得，美國唔係日本。

21. 個個平台都出打賞功能—好簡單，唔少平台都推出啲打賞功能，希望啲content creator可以monetize，ClubHouse 同 Twitter都做緊．我個人認為，至少對香港嘅content creator 同觀眾唔多work，唔係大陸啲直播。你次次叫人課金係難持久的，好似啲人文章叫你畀Like coin咁。如果寫文賣相嘅，Patreon好。Youtube或Facebook/instagram 拎廣告都OK。