美國通脹十幾/廿幾年新高，股市就破頂，吹咩。Meme股最多炒兩個星期．Google 新高。另外留意Amazon．王維基話play down香港網購，真係口快快？ (Patreon)

美國通脹十幾/廿幾年新高，股市就破頂，吹咩。

Meme股最多炒兩個星期

Google 新高。另外留意Amazon．

王維基話play down香港網購，真係口快快？

1. 如果我有時貼舊文link貼咗影音版，你就自己醒水了，搵返個文字版出嚟吧。唔難，跟日期咯，或者用Patreon文章目錄

美國通脹十幾/廿幾年新高，股市就破頂，吹咩。

2. 首先，頭號新聞，當然係星期四晚美國5月通脹數據。拿，昨日已經提咗你要睇（環環相扣呀！）。前事講返，星期三晚呢，因為美國國債拍賣做得好，債息居然係大跌。事後你可以話已經有啲先兆。

3. 結果到星期四晚，通脹數據一出。點呢？通脹（CPI，留意另外有個叫PCE）升幅去到5%！2008年以嚟最高。咁你都可以知道，「要睇預期」，咁預期都只係4.7%，可見又高，又超出預期。

4. 唔止，如果你睇埋細節，唔計食品同能源（傳統上呢兩樣比較波動）嘅核心通脹，冇錯係低啲，3.8%，但直頭去到1992年以嚟嘅新高！如果話只係油價推高通脹嘅，就忽略咗呢樣嘢了。

5. 之但係，又估下債市點反應？我在Facebook 寫咗少少，當時債息只係約略由1.49%彈到上1.52%。但最新（香港時間3點），倒跌添呀！1.48%。

6. 仲有估下股市點反應？就梗係，創新高啦！卒之有個突破（雖然都唔係太有力）。

7. 歸根究底，除咗係聯儲局似乎堅持數字不足為懼外，似乎越嚟越多人相信，係因為舊年低基數嘅原因。你睇下如果計24個月嘅通脹，而家並唔係點特別高。就係因為舊年嘅非常時期。

8. 呢個係另一個圖，舊文貼過（環環相扣呀！），同一樣嘢，另一個角度理解，你睇啲累計物價升幅，根本唔係話好誇張。至少暫時唔係

9. 最後，畀你睇多樣嘢（個圖重貼的）。留意下，係2/3月開始有人講通脹，但你見債息嗰時就即時抽咗上去。到而家真係人人都講，通脹數據上晒頭條呢，債息就跌返了。好典型嘅情況，再次話你知一般嚟講金融市場係點運作：炒預期。

Meme股最多炒兩個星期

10. 另一方面，啲Meme股散晒了。差不多全部大跌。可能因為市況向上突破（但唔算好勁），亦可能因為有啲咩「加強監管」（但我覺得唔多關事）。

11. 呢一個圖幾有趣（唔肯定篇文你地睇唔睇到，試下）。基本上話畀你知，炒兩個星期多數散水。堅持要買嘅可以留意，但我好懷疑咁樣捉法，係咪真係搵到錢 — 總有人搵到，但你搵到幾多？況且又係老問題，你可以買幾多落去？

12. 呀，之前我提過嘅Wendy’s，第二日就插水，希望冇人跟買。但，講真都只係十幾巴仙，未係冇機會走嘅。

Google 新高。另外留意Amazon．

13. ASML就不再講，但提提你Google又再創咗新高。Facebook就再早前創新高，MircroSoft亦只爭3%。我全部都有買，Big Tech始終坐得比較安心，業務一路都勁，唔似放慢。頂多係驚貴，或者偶然有啲監管問題。

14. 例如Google，一向我都覺得YouTube係有點overrated．對用家當然好偉大，但對個content creator 就只係紅海，特別係香港，All due respect，個個望住啲KOL，咩搵十幾廿萬個月，好多咩？你同普通打工仔比就多。但，講緊行業頂級喎，你諗下香港做藝人做醫生最發嘅一年搵幾多？況且，都講過，一將功成萬骨枯，幾多係搵幾千蚊都冇嘅人？所以叻仔一定讀醫。真係最頹嗰個都過百萬年薪。

15. 不過對公司（Google）嚟講，就更得意。好多人都唔知，YouTube一路蝕錢（你諗下佢要分錢畀創作者，Facebook一個仙都唔畀你你地個個都爭住貼嘢，就知道爭幾遠），不過，個stickiness 而家真係太大。即使係對家大科企，都冇人可以搞到一檔咁嘅平台出嚟（正如Google +都死得好慘）。而你見到YouTube嘅廣告收入一路都維持高增長，咁玩落去，變到賺錢應該指日可待。到時股價應該幾興奮。

16. 其實扯遠咗，我想講嘅係，Amazon．唔記得有冇貼過呢個圖，好似有，冇所謂，貼多次。

17. 大家知Facebook 同 Google essentially 係廣告公司（YouTube比唔上Facebook 廣告咁大，但Google仲有search，夾埋就大過Facebook）．大家亦知Amazon做網購，亦都唔少人知道公司雲計算收入AWS都好勁（記住，靠呢瓣賺錢！）。但似乎冇乜人留意，Amazon嘅廣告都做得越嚟越大。已經有10% market share，仲要增長幾勁，嚇死你。

18. 最新嘅嘢？你可以睇篇文，唔睇就只睇個圖。Amazon廣告一樣加緊價。唔係太多人講，睇下業績有冇驚喜。

王維基話play down香港網購，真係口快快？

19. 最後講港股，依然悶，但部份公司做得幾好。領展823，Dynam Japan 6899，長實1113，甚至三星房託3187以前都提過，不重覆。（光係我會整理晒舊文畀你呢下已經值得你推介畀朋友啦，以我所知出面冇乜人咁好心機。但當然都多得有讀者義務幫手整目錄）

20. 但你見到，最頂嗰隻我未提，而家提。王維基1137，近排都幾多新聞。昨日寫咗，首先係5月嘅數幾勁（舊文有Excel），然後佢吹話海外收入會大過香港幾倍，然後佢嗰5億獎勵就見財水，我Facebook Post都有詳細寫

21. 最新花臣？報紙話佢在論壇話淡出香港網購業務，佢本人就澄清話冇咁嘅事。當然好多香港人就好開心，甚至話返傳媒老作。

22. 你可以睇返原本佢講嘅嘢（我朋友有在場，證實係咁講），係講「在過往的6至7年間，港視角色一直是網購營運商，但在未來6至7年將會轉型，淡化（play down）營運商的角色，轉型為技術（technology enabler），幫助其他商家設立其網上商場，與亞馬遜等競爭」。

23. 我睇法？我覺得王維基係想淡化喎！未來重點唔係放係在香港網購。

24. 而作為王維基多年fans，我覺得好合理，甚至係好事。你諗下，1137最大罩門係乜？係香港嘅市場，太有限。而且物流成本貴，又方便。我睇唔到做香港網購可以搵好多錢。

25. 睇返上面嗰部份講，Amazon做網購都要蝕錢！啲錢係靠AWS同廣告賺的。我唔係話王維基會去搞AWS，但，你估佢係咪都諗差不多嘅嘢？佢仲要不停講海外大計。一路基金都係質疑「香港市場畀你做晒，又點？」

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。