恒指執位繼續睇醫渡科技2158同心通醫療2160．美版盈富基金震散美股？中概股散，但制裁名單好似冇新意。但留意阿里巴巴！搞局基金入DropBox做乜？AMC 以及其他meme股（大麻，太空，齋滷味）．極速快提：理文化工746又新高，三星房託3187新高，雷蛇1337果然隊穿招股價 (Patreon)

恒指執位繼續睇醫渡科技2158同心通醫療2160

美版盈富基金震散美股？

中概股散，但制裁名單好似冇新意。但留意阿里巴巴！

搞局基金入DropBox做乜？

AMC 以及其他meme股（大麻，太空，齋滷味）

極速快提：理文化工746又新高，三星房託3187新高，雷蛇1337果然隊穿招股價

1. 繼續置頂，出咗聲音版同影像版，唔想睇咁多字嘅可以去訂，可以免費試聽試睇一篇先。呢篇當sample，所有讀者都睇到的，畀啲意見。另外，仲改善緊啲嘢，會有四個模式，聽日會畀大家投多次票，等你地揀一個。都見有啲讀者話咁快upgrade咗20蚊或40蚊會員，但之前幾百人投票的喎，仲等乜？記住只係收你差價，同埋年費都可以係咁運作。

2. 今日講嘅嘢較多，散啲，多圖，但又可能有人鍾意呢種形式。

恒指執位繼續睇醫渡科技2158同心通醫療2160

3. 首先講下今日（星期五）恒指季檢，都冇乜特別好重要，執位嗰啲都唔太重要。如果咩友邦1299 騰訊700嗰啲跌落嚟就係買嘅機會。舊文都寫過兩篇（一篇，兩篇），Facebook都有，然後個Excel就在呢篇文。

4. 但講到尾，個玩法都係睇入港股通嗰兩隻，醫渡科技2158同心通醫療2160。照計唔止星期五，好彩嘅下星期仲有得玩。但真係留意，一來升咗一浸（拿我一早寫咗呀下，你唔跟你嘅事），二來市況唔係太好的。你見高位隊返10-20%好散水了。「又話唔止蝕？」。大佬，呢啲唔係投資，係投機。我唔鼓勵，不過讀者鍾意嘛。

美版盈富基金震散美股？

5. 美股方面，你見都麻麻地，特別係科技股跌得多。新聞嘛？昨晚都出咗，我可能會Facebook寫，但簡單嚟講，「美版盈富基金」。咩嚟？回返帶，正如港版盈富基金點嚟？因為政府入市買股票，咁之後退返出嚟。美國都一樣，舊年聯儲局唔只無限印錢兼買國債，仲買埋企業債，甚至ETF。咁而家都係想退返出嚟。

6. 咁你話，要沽晒啲嘢出街啦喎，市場就驚？又唔係，根本政府可以好有彈性（又唔係自己啲錢！），到時見情況唔啱唔賣都仲得，當年盈富基金上市都冇隊低股市（亦因為賣晒畀散戶，仲有折）。咁美聯儲呢堆嘢，size極細，無論同佢地嘅資產負債表比，定係同美股成交比，都係倒滴水入海咁。

7. 咁但，市場驚乜？驚呢個只係第一步，係咪準備其他退市嘅措施。局方當然出嚟安撫話唔關事，但市場懶理。你亦都睇到10年美債債息即時抽咗上去，雖然同之前高位仲有相當距離嘅。

8. 再加上，你見最新出嘅ADP就業數據又係相當好，又一理由擔心收水加息之類。都話股市嘅邏輯有時好奇怪，舊年啲冇買股票嘅人係咁鬧乜鬼「股市同實體經濟脫節」，今年經濟好返好多好多，但股票就難玩好多（實情年初至今美股有咁嘅升幅我都幾意外）

中概股散，但制裁名單好似冇新意。但留意阿里巴巴！

9. 真係快講，另一方面，美國又有新搞作，擴張咗個制裁中企名單。我都冇細睇，但，一來早兩日已傳，二來亦見唔到有咩特別新增嘅上市公司。三來，根本之前都見到呢啲係買貨機會（包括中移動941，以及舊年我力推嘅中海外688）

10. 咁理所當然地，見到部份中概股暴跌。反正亦都有啲係科技股或發夢股，跟埋個市跌亦不奇。

11. 不過，我係想留意阿里巴巴的！你睇下最新螞蟻嘅新聞，負面嘅演繹會覺得佢地畀政府收編咗。但大佬，一早預咗啦，乜都反映晒。而家仲畀佢開返檔，擺明就係理解做「講掂數」。我有錢我真係會買的（靠大家升級啦！）

搞局基金入DropBox做乜？

12. 昨日寫咗對沖基金Elliot（冇錯係迫東亞賣盤嗰間）入股DropBox，咁我地之前講話DropBox係併購對象啲舊文就唔再回帶，反正昨日篇文都有。

13. 對沖基金有好多種，理論上勞蘇基金（繼續進行中，未報名可以搵我）都係一個小型對沖基金（係咪好有型！）。咁Elliot 呢類都好多玩法，但一般嚟講叫做Activist Fund，中文我都唔知點譯。有時啲友譯維權基金，講到好似維權律師咁。某程度上就係「搞局」基金，入去換走啲唔掂嘅管理層，同埋迫佢地改革。咁頭先講過，東亞銀行咪畀人搞過。另外中巴（冇錯，嗰間中巴）都成日畀人搞。做得差但間公司值錢就會畀人搞局。「咁同DropBox都有啲似」

14. 咁搞局基金可以做好多嘢，可以迫出售業務（東亞咪係），迫派息（以前中巴），甚至換走管理層咁。但DropBox冇業務可分拆，亦冇息好派（但有做啲回購）。所以，基本上得一條出路，就係叫管理層賣盤，大家分錢走人。

15. 不過留意返，DropBox創辦人兼大股東，當然係同股不同權（幾咁仆街，我一路都反對）。趕唔走的，只能畀壓力佢。

16. DropBox嘅業務唔吸引，雖然我係付費用戶（原來7億人得3%畀錢）。因為基本上已經係commodity business，間間大科企都做。人地有錢有人仲可以bundle其他嘢，細公司好難鬥。

17. 留意DropBox估值唔算點貴，5倍Price to Sales，當然同佢地嘅收入增長慢都有關。但SalesForce買Slack嗰時係23倍Price to Sales，反正大科企大把錢，可能有水魚呢？我覺得隻嘢值得睇的，不過我就唔會買（都話冇錢）

AMC 以及其他meme股

18. 實情唔係好想寫，但有讀者問咪寫。問我乜事？同之前GameStop之亂差不多。加上之前都見到，冇BitCoin炒啲美國散仔就炒返meme股（順帶一提，唔係讀咪咪，係讀meem，一個音）。

19. 最新玩法係AMC直頭擁抱散仔，股東有爆谷送，一股都有，吸引啲人落搭。然後高位再批股集資，識玩。但股價大跌後一樣有支持

20. 勉強要解釋呢，特別係一啲幾乎破產嘅公司，咁忽然間有一大堆cheap funding，就真係可以起死回生。

21. 但你用任何角度睇，AMC都仲係貴到無論。唔好廢話講咩重開經濟多人睇戲，你量化先得架。自己睇下個圖。

22. 或者你諗下，AMC已經大過五成甚至六成嘅標普500指數成份股，甚至大過盈富基金嘅管理人State Street。你可以諗下make 唔make sense．舊年State Street 105億收入23億純利，AMC 4億收入虧損30億。我知，股價睇將來嘛，重啟戲院嘛。但，即使頂峰嗰時，AMC收入頂多咪50億，賺錢？由始到終都唔多賺錢，戲院喎，仲有人去戲院？

23. 你見堆嘢呢，都係過山車咁。星期三升到癲，星期四就唔少都急回。我就唔會掂呢啲嘅。成堆可能得Tilray（大麻股呀！），Beyond Meat同Virgin Galactic 可以望下，但都係超貴。記唔記得3月時啲契媽股點死法？

極速快提：理文化工746又新高，三星房託3187新高，雷蛇1337果然隊穿招股價

24. 最後極速提一提（費事寫太長），理文化工746繼續升，逆市創新高，夠晒巴閉。真係我寫完文連續兩日大成交抽上，呼風喚雨，但講明我係冇買的。

25. 另外，仲未有讀者話畀我知佢買咗好多（小量嘅就有）。都留意返，呢啲咁細嘅公司，買得大你可能好難走的。

26. 另一方面，之前提過三星隻房託ETF 3187，創咗新高。我覺得呢啲好過你做定期存款之類（仲有，記得抽iBond，過兩日講）。樓上段嘢佢地send畀我，但我冇收任何利益，除咗佢地端午節寄張粽券畀我。

27. 順手講埋，大師冇點你，雷蛇1337批完股，大插，配股價都穿埋。因為實在太大手貨。另外，都唔係馬後炮，年頭第一次推時，我都話唔信呢間公司。只係貪佢回購。結果正如讀者PM我講，你睇，識玩就梗係回購，然後大手沽貨。首先回購少少錢，沽貨一大舊。另外，回購係用公司錢！但沽貨嘅錢落自己度！

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。