正式出咗聲音/影片版。全部人都可以睇到sample，仲會再執執。 人民幣軟，廣州爆疫情，都係小心啲好。仲有雷蛇創辦人減持。理文化工52週新高！DropBox都係！嘉年華CCL同LionsGate就不用講。 越南是電商必爭之地。美股今年靠盈利支持，好事壞事？Amazon Prime是個騙局。好少靚錶肯畀錢搞好個Typeface (Patreon)

版務—正式出咗聲音/影片版。全部人都可以睇到sample，仲會再執執

快評幾句— 人民幣軟，廣州爆疫情，都係小心啲好。仲有雷蛇創辦人減持

大師冇點你—理文化工52週新高！DropBox都係！嘉年華CCL同LionsGate就不用講

每日一圖— 越南是電商必爭之地。美股今年靠盈利支持，好事壞事？

Good Read — Amazon Prime是個騙局。好少靚錶肯畀錢搞好個Typeface

FB Post Summary — 從缺

版務—正式出咗聲音/影片版。全部人都可以睇到sample，仲會再執執

1. 都仲係有讀者PM我。放心，如果唔鍾意新嘅影片/聲音版，好簡單，唔好理佢。原有嘅文字版一樣照出，只係出完我會搵我朋友再錄一次。

2. 至於有興趣試聽試睇嘅，昨日已經出咗第一篇。係我好朋友錄的。呢篇當sample，所有讀者都睇到的，可以畀啲意見。另外，我地仲改善緊啲嘢，可能有幾個模式，聽日會畀大家投多次票。都見有啲讀者話咁快upgrade咗20蚊或40蚊會員，但之前幾百人投票的喎，仲等乜？記住只係收你差價，同埋年費都可以係咁運作。

3. 影片嘅就咁睇，唔想浪費data（但其實段片好細），或者唔想望住電話/電腦嘅，就去最低attachment搵個audio出嚟。

快評幾句— 人民幣軟，廣州爆疫情，都係小心啲好。仲有雷蛇創辦人減持

4. 昨日講過港股強，科技股強，點知真係得兩日貨仔，到星期三就冇乜力。咁當然星期五仲有一浸恒指換馬兼港股通去玩（醫渡科技2158同心通醫療2160），但我真係覺得個市冇乜力。我就一向樂觀嘅，但怕大家太心雄啫。你見隻快手1024以為有得升多浸，結果星期三都冇力。

5. 再加上啦喎，你見人民幣又高位回得幾快（阿公出術有功）。另外，廣州啲疫情都幾勁下。雖然照計就冇嘢……但，「如果我錯呢？」。唔好忘記個市點都唔算平，啲舊經濟股可以回得幾急。

6. 自己小心啲啦下。但，唔係叫你減持呀下！今年好似好多時我都係覺得小心啲小心啲，但我都冇減持，一路加倉。結果見到就係爬住憂慮之牆而上。

7. 另外，年頭（咁就半年！）提過隻雷蛇1337。都有啲讀者買咗，嗰時2.38，一度見過3.3，升四成呀。然後3月大插，而家上返2.6。最新消息？個創辦人同非執董賣舊股。都賣得幾多下，3%股本。配股價2.405-2.47，我估會隊穿個配股價，條友講就天花龍鳳，但自己就沽貨，仲要沽唔少。唔好飛入去了。

大師冇點你—理文化工52週新高！DropBox都係！嘉年華郵輪CCL不用講

8. 拿，值得威啦啩！枉啲友話冇用！星期二寫完，星期三就52週新高呀，你任何位買都贏錢。之前都有讀者買過的（睇圖）。不過我有啲懷疑，其實呢500萬錢嘅成交，會唔會唔少都係呢度讀者？如果邊位買得好大嘅，私下話一話我知。咁睇法不變，估佢7月出盈喜，我估可以去到5蚊樓上，甚至6蚊

9. 仲有，嚟多單。舊年年尾寫過DropBox，都有讀者買咗。講明係併購對象。最新消息係有對沖基金入局，嗰時22蚊，而家28蚊，新高了。又係嗰句，任何位買都贏錢。可以繼續持有。冇嘅就未必好追了。做乜嗰時又唔買呢？

10. 咁嘉年華郵輪CCL同埋LionsGate我就唔重覆講了，都係monitor list（即係我冇買）上嘅嘢。但CCL唔少讀者有買，可以沽一半咁咯。

11. 仲有core list上面LVMH JP Morgan Nvidia 都再新高

每日一圖— 越南是電商必爭之地。美股今年靠盈利支持，好事壞事？

12. 越南是電商必爭之地—聽落你都唔會意外，經濟好，人口多（太細嘅冇乜規模效應），收入低但冒升中。呢啲你都估到。但你未必估到嘅係，越南嘅online shopping佔總零售只係得3%，差不多全東南亞最低。都幾奇怪，你諗下印尼其實幾相似（人口同收入），但個數字係20%。所以人人爭住搶越南。有乜公司？你可以諗阿里巴巴，但更大機會係新加坡公司SEA（N年前寫過，唔再貼）

13. 美股今年靠盈利支持，好事壞事？—呢個圖幾好，耐唔耐我會更新下。以前都寫過，市值嘅嘢，咪盈利X市盈率。前者唔使解，後者往往受情緒呀，利息呀影響（甚至受返前者影響，盈利升得快咪大家進取）。好啦，留意下，前兩年嘅升市，見唔見粉紅色好大條？差不多全部係由市盈率帶動，multiple expansion，即係原本肯畀10倍而家你畀15倍。但今年呢？完全唔同，由盈利帶動。咁係好事壞事？難講。你睇2017 同 2018都係由盈利升得幾好，但後果好唔同。

Good Read — Amazon Prime是個騙局。好少靚錶肯畀錢搞好個Typeface

14. Amazon Prime是個騙局—睇標題都知左左地，但幾好睇。開宗明義講Amazon Prime，充份利用大家貪小便宜嘅心態，free shipping太吸引。但世上冇免費午餐，根本你買嘅嘢就係貴咗，你自己唔知啫。

15. 好少靚錶肯畀錢搞好個Typeface —過癮嘅文，唔似係我平時share 開嗰啲。講啲名錶，賣到幾廿萬一隻，但其實好多都係幾求其。根本連一個好基本嘅細節：TypeFace都唔會理。結果你幾廿萬買隻票，啲字體同街度買包檸檬茶差不多，冇嚟貴格。順手一提，邊間公司係例外？邊間公司咁細心？正係愛馬士！所以抵人地係奢侈品之王，股價長升長有。最新搞作搞埋Gym添哟，LVMH出3000蚊美金一張嘅瑜珈墊呀。女人錢好錢，但人地真係名牌。

FB Post Summary — 從缺

16. 係喎，再度從缺。冇時間就唔寫Facebook，但任何時間我都在Patreon交足功課嘅。

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。