非農數據失望美股新高，恒指執位，劉熾平減持騰訊700。AMCX（唔係AMC）大升。Nvidia 新高。 DroxBox好殘，Box都係，SalesForce都係。蝙蝠好長命。 Youtube好賺錢（其實唔係）。如何像哲學家思考。 費馬最後定理。熊貓有喜炒起東京上野餐廳股 (Patreon)

快評幾句—非農數據失望美股新高，恒指執位，劉熾平減持騰訊700

大師冇點你— AMCX（唔係AMC）大升。Nvidia 新高

每日一圖— DroxBox好殘，Box都係，SalesForce都係。蝙蝠好長命。

Good Read — Youtube好賺錢（其實唔係）。如何像哲學家思考

FB Post Summary — 費馬最後定理。熊貓有喜炒起東京上野餐廳股

1. 繼續置頂，出咗聲音版同影像版，唔想睇咁多字嘅可以去訂，可以免費試聽試睇一篇先。呢篇當sample，所有讀者都睇到的，畀啲意見。另外，仲改善緊啲嘢，會有四個模式，週末會畀大家投多次票，等你地揀一個。

2. 都見有啲讀者話咁快upgrade咗20蚊或40蚊會員，但之前幾百人投票的喎，仲等乜？記住只係收你差價，同埋年費都可以係咁運作。

快評幾句—非農數據失望美股新高，恒指執位，劉熾平減持騰訊700

3. 夠晒得意，昨日先寫過，ADP就業數據（私人嘢，一般啲人俗稱叫小非農）好靚，加埋個所謂「美版盈富基金」（都係昨日寫），就令債息即抽高，科股股震走。

4. 點知今日呢？出官方非農數據，表面睇好似勁，但記住都係睇同預期相比點。而結果個數字同預期都爭好遠。估67萬，結果得56萬。

5. 結果？債息咪即時又跌，美股又翻生，然後科技股又有力。

6. 好屈機好搵笨？都係的。固然之前都已經有人話（呢個圖係ADP後，官方出之前）ADP可能高估咗。但，都唔係咁易估。咁你走去day trade嘅真係極難玩。解決方法？都好簡單，咪唔好受咁細嘅波幅影響

7. 不過拉長少少睇，似乎點睇美國嘅職位復蘇，都係越嚟越慢。開頭當然係威係勢，而家已經冇乜力，似乎都幾難咁快回返到疫情（但股市一早升穿晒）。留意返呢個圖係未出官方數據嘅，條線係街估嘅圖，咁結果真實出嘅數仲差。

8. 至於港股嘛，悶的。你見即使係恒指換馬，反應都不大。話咩減權重嘅友邦1299，跌都唔跌，騰訊700都只係跌少少（下段再講）。之前叫大家睇嘅心通醫療2160同醫渡科技2158，前者彈返啲，後者小跌，照計仲可以睇多陣。但高位急跌就自己走了，不能我捉住你隻手幫你買埋的。呢啲明知係短炒嘅嘅當然自己睇緊啲。

9. 騰訊700啦喎，我知，劉熾平減持嘛。但講真，so what？唔係我或你畀佢更熟間公司，但好多時管理層自己都唔知間公司有幾勁，況且，升咗咁多咪沽少少。你睇劉熾平甚至馬化騰歷嚟沽過幾多次？ 次次你都當睇淡公司前景，仲得了？冇事，驚都冇驚過。

大師冇點你— AMCX（唔係AMC）大升。Nvidia 新高

10. 記住，係AMCX，電視網，唔係meme股AMC戲院。有講過AMCX咩？梗係有。陳年有一次，搵唔返。但最緊講媒體股併購潮都有寫過。而LionsGate都日日新高。拿，環環相扣呀

11. 至於Nvidia，「冇乜特別丫」，又新高。但留意，呢隻真係之前大把機會你買。3月大屠殺固然跌好多，但4/5月時一樣有一浸跌。3月嗰時跌兩成幾近30%，4/5月呢浸都跌15%，你點「止蝕」？我就一直坐到而家。始終呢啲公司有實力（應該識分架可？），固然都總有個價要睇估值，但好多時都可以彈返上嚟，因為業務呀，收入呀，盈利呀係一路上。你睇其他啲發夢股好多都香晒。呢個咪分別。做乜係都要不停問我拎新冧把呢？呢隻又唔買？哦，升咗好多。咁3月又唔買？4/5月時又唔買？

每日一圖— DroxBox好殘，Box都係，SalesForce都係。蝙蝠好長命。

12. DroxBox好殘，Box都係，SalesForce都係—相對地啦下，呢個圖幾好。近幾日都寫過下Dropbox（環環相扣呀！），基本上都係等賣盤。Box都係一樣。你睇Price to Sales，兩間都相當平，但當然亦因為佢地嘅生意增長差。睇埋其他嘅，尾三係SalesForce（CRM，睇名就知做乜），本人有買，但少講。因為好似仲潛緊水，陰功。當時就係佢地高價買完Slack冇耐。不過CRM點都唔似想會賣盤，會一路玩落去。另外，老牌嘅Adobe都過癮，至少同CRM一樣，在自己領域算獨當一面。CrowdeStrike我都鍾意，但冇買，亦少寫，只係放monitor List，網絡保安嘢，呢排咁多網絡攻擊，照計有利。但相當貴，最近出業績其實不錯，但一樣要跌。有機會細講下。

13. 蝙蝠好長命—Er…..唔關金融事（呢度從來冇話只貼金融嘢），由病毒源頭開始講。首先留意，啲動物嘅壽命，往往同質量（即係體重）正相關。但，在輕嘅動物之中，蝙蝠係離地地長命嘅。咁有乜啟示？就好咯，就好適合啲病毒。鍾意睇全文都可以，不過好多蝙蝠的。

Good Read — Youtube好賺錢（其實唔係）。如何像哲學家思考

14. Youtube好賺錢（其實唔係）—Fortune嘅文，我不甚同意，特別係個標題。冇錯，之前都寫過，Youtube嘅廣告收入增長好強，超過成間公司嘅收入增長，而家係growth engine．但篇文話more profitable than ever我就唔同意，根本佢成篇文除咗個題都冇講profit．佢都有提，喂，開支大喎。正路地Youtube係蝕錢的，買咗咁多年都係，否則一早分條數出嚟。不過，亦可能只係時機未到。如果YouTube收入不停咁升，咁總會係變有利潤吧。係嘅話，Google股價仲唔爆升？拿，而家好買啦，到時升咗先追入去又話摸頂。梗係平時悶嗰時先買啦。

15. 如何像哲學家Fashionable Ideas思考— 長文，啲字唔深，但課題較正經。咪就係講「哲學家如何思考」，留意佢入面有講「司機的知識」呢個故事。有啲知識係冇乜用嘅，識得整合先係能力，但好多人明明係前者就以為自己有後者。另外仲有講，有啲所謂嘅Fashionable Ideas，好快過時就冇用。亦都叫你唔好急急去下結論。偏偏呢個年代啲人就最鍾意講。利好定利淡？買唔買得過？會唔會爆煲？嗯。

FB Post Summary — 費馬最後定理。熊貓有喜炒起東京上野餐廳股

16. 卒之有動力寫返兩篇，而個原因就係在第一篇講

17. 費馬最後定理—夫子自道。但係講證明費馬最後定理嘅Andrew Wiles背後嘅故事。證明固然難，但更有趣係，佢孤單作戰咗10年，唔想比任何人知佢做緊呢個研究。結果佢係不停咁交啲「行貨」。人地仲以為佢回塘。唔止係因為大學唔係開善堂（佢嗰啲應該已經終身制），而係，如果佢一路唔出文，人地就會估佢搞緊乜大嘢。冇錯，我Facebook都好一排冇出文，就係搞緊大嘢。唔止係勞蘇基金（未報名PM），同埋呢個錄音版。仲有壇大嘢！

18. 熊貓有喜炒起東京上野餐廳股—而呢篇，東京上野動物園熊貓有咗，就正係我交嘅「行貨」。冇法，係要一路keep住收視的。咁但，分分鍾呢啲行貨，讀者會更鍾意。

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。