ivanliresearch

五月唔窮。科技股開始有力．心通2160 醫渡 2158 炒上！美國人收入1970年已見頂。Sell in May賺少好多。Amazon 也是一間廣告公司．由Only Fans賣鹹相變企業家。貧富懸殊粉碎智利自由市場神話。CNBC 50 顛覆者名單 (Patreon)

Published:

2021-05-31 19:02:32

Edited:

2021-05-31 19:26:53

Imported:

2021-07

Content

快評幾句— 五月唔窮。科技股開始有力

大師冇點你—心通2160 醫渡 2158 炒上！

每日一圖— 美國人收入1970年已見頂。Sell in May賺少好多。Amazon 也是一間廣告公司

Good Read — 由Only Fans賣鹹相變企業家。貧富懸殊粉碎智利自由市場神話。CNBC 50 顛覆者名單

FB Post Summary — 從缺

1. 照舊，星期一就會有三個圖同三篇Good Read，係做到每日一圖每日一篇好文嘅目標的。今日依然好精彩

2. 週末整咗篇Domino’s Pizza回報高過同期上市嘅Google，好東西嚟，記住睇。雖然中間有啲技術細節搞到有啲煩，但信我，呢篇文會令你獲益良多。記住，stay invested，股息再投資，複利的威力，time is your friend

3. Domino’s Pizza回報高過Google呢壇嘢，仲有好多其他啟示，但留返今個星期六再講多篇。

4. 踏入6月，會launch個影片版兼聲音版（不過影片版可能得幾張相，會再慢慢研究），當然會有個免費sample畀你睇，過一兩日吧。同埋都費事大家upgrade 時撞正月尾因為時差而收兩次錢。記住20/40蚊會員專屬，原本嘅20/40會員當然就自動享有。所以都真係早買早享受，優惠陸續有嚟。

5. 仲有壇大計（唔係勞蘇基金）會在短期宣佈兼kick off，不過賣個關子先。聰明嘅讀者應該估到，都係以前提過嘅嘢。亦因為咁會相當之忙

快評幾句— 五月唔窮。科技股開始有力

6. 所謂嘅五輸六絶，英文叫sell in May，結果都似乎唔係好中。亦同好多人想像唔同，今年五月，美股同港股大盤指數（即係道指標指恒指國指）都升，又係嗰句，你仲要輸錢嘅，又真係檢討下。但科技股係差嘅，納指科指都跌。老早叫你唔好只係買死一樣，唔好人云亦云，唔好只係跟潮流。

7. 不過話說回頭，今日（星期一）美股冇市，但你見港股個走勢幾得意：大市唔多郁，但啲舊經濟股跌普遍差（BTW，入面全部係我有嘅股票），新經濟股有返啲力。我覺得可能開始逆轉？當然好難去判斷，所以永遠都唔會叫你買死一邊（我亦唔明有乜必要）。但無論如何，我之前買落唔少Big Tech（美股嘅FAAMG，港股主要係騰訊700），仲係坐得好舒服的，你見呢堆嘢雖然冇舊年咁強，但唔會點令你輸錢。因為啲基本生意仲係好強，頂多係估值有啲貴。就唔同啲收入都冇嘅夢想股啦。

大師冇點你—心通2160 醫渡 2158 炒上！

8. 拿，今日唔再貼LVMH 愛馬士啦，「因為美國冇市」「但其實歐洲照開，愛馬士再新高」。

9. OK正經，畀啲新意。呢兩隻都真係話你知有得炒的，入港股通嘛，寫過兩次。上次你飛入去已經有啲執，而再加上近排啲科技股（OK呢兩隻唔係完全科技股）有返力，我估仲有得升。記住係6月7號生效，下星期一。但同恒指換馬唔同，呢啲股有機會到下星期一之後先再開車。咁點玩？「唔通我拎住你隻手去買咩」，自己睇下升得多唔多執生吧。必要時咪又玩斬邊留邊。記住短炒咋下，勢色不對自己散水，快則炒到今星期五，耐就可能玩到下星期五。

每日一圖— 美國人收入1970年已見頂。Sell in May賺少好多。Amazon 也是一間廣告公司

10. 美國人收入1970年已見頂—呢個嘛，我睇嗰時，篇文係講Why Americans Are So Angry。咁你睇到了，中位數收入，甚至低過當年。但幾個澄清：首先，你計數字當然高過當年，但有通脹。第二，佢係指嗰個年份25歲嘅人，唔係嗰個年份出世。第三，係life time earnings，然後再年度化。咁你見到，同1960年末嗰班友比，1985年25歲嘅（即係而家60歲嘅阿叔），一年搵少4千幾美金，成世就搵少十幾萬美金。不過最後留意，只係計男性。其中一個原因，亦因為女性參與職場多咗，勞工再不稀缺，人工點加？成個報告你都可以睇。

11. Sell in May賺少好多—應該唔使點解了。由1990年開始，買標普指數，1蚊變24蚊。但如果Sell in May避開5月呢？1蚊只變15蚊。人地個圖都叫你stay invested．但仲有兩樣嘢：第一，佢total return，當然係dividend reinvestment．第二，你想像到，我back test 返，總有一個月最差，總可以試下避開而搵到好結果。事實上，呢個圖係美股啫，如果歐洲股，避開5月回報係更好。我想講嘅係，why bother？何必咁樣跳嚟跳去？

12. Amazon 也是一間廣告公司—以前寫過，Google 同 Facebook都係廣告公司。留意Google 市佔率仲多過Facebook，雖然諗真啲好合理，你望下個市值就知。但又留意，Google 煞食係search，YouTube完全冇你想像中咁多。但有趣係，Amazon除咗網購同埋做Cloud（AWS），拍戲（Prime Studio，MGM），實體超市（Whole Food）之類，廣告收入都唔細！都有10% market share．咩人跌緊？正係Google同埋其他公司.

Good Read — 由Only Fans賣鹹相變企業家。貧富懸殊粉碎智利自由市場神話。CNBC 50 顛覆者名單

13. 由Only Fans賣鹹相變企業家—個訪問就真係訪問條女（我覺得不錯的說，BTW，如果有人想知我鍾意邊類女仔，你去睇下就知），原本都美國名校畢業，疫情下畀人炒咗，最初係玩Twitter，但根本搵唔到錢，然後轉為去Only Fans賣相（以我所知冇露點，都係著啲泳衣性感內衣咁）。咁搵到錢（其他文有講，佢收同我呢個Patreon咁上下，但我日日寫到出血，果然冇才華就要勤力啲，我講我），但佢都係停咗，黜解？因為啲友會拎啲相去第度賣呀，叫佢拍裸照呀，send啲露械相畀佢咁。然後佢索性自己搞一個平台！夠晒勵志，成篇文亦講到你知呢個 Creator/Passion Economy 嘅sub-genre 嘅生態

14. 貧富懸殊粉碎智利自由市場神話—左翼嘢，但一早講過唔同立場嘅文我都睇（只要篇文高質）。呢篇文講嘅唔少嘢我同意。介紹返，智利正係新自由主義右翼不干預主義大市場（列根戴卓爾夫人 Milton Friedman 楊懷康芝加哥獅子山學會等等）嘅代表作，一度係成功楷模。經濟增長等等明顯跑贏其他南美國家。但有睇新聞都知之前大示威。表面因為地鐵加價，實際好簡單，因為貧富懸殊。呢個係我地世界面對最大嘅問題，你見即使美國都係咁，唔係民主選舉就解決到的。往往係選過個，最後都係服務富豪。然後選民雖然笨，但唔係傻的，慢慢就會連成套嘢都唔信。全世界都會係向左傾的。

15. CNBC 50 顛覆者名單—其他寫得太長，呢個只寫兩句。就係CNBC每年會列50間公司，你可以同時睇返以往嘅名單。留意，佢只會選未上市嘅公司。咁不代表呢啲公司IPO你就要抽，亦不代表會有好表現。但至少留意下個世界發生乜事。留意Patreon首次上榜。