卒之推出聲音版/影片版！港股強，科技股強，留意快手1024．嘉年華郵輪Carnival CCL 創新高！理文化工746 7月必定出盈喜！應該係！Bonus：心法哲學討論：出盈喜係咪一定好事？好事又係咪實升？ (Patreon)

版務：卒之推出聲音版/影片版！

港股強，科技股強，留意快手1024

嘉年華郵輪Carnival CCL 創新高！

理文化工746  7月必定出盈喜！應該係！

Bonus：心法哲學討論：出盈喜係咪一定好事？好事又係咪實升？

版務：卒之推出聲音版/影片版！

1. 拿，進入6月，畀啲新意大家。今日講嘅嘢新鮮啲，亦都講返多啲港股（亦因為港股呢排回勇返，講過啦，我都係睇邊面旺就講邊面）。

2. 仲有，講咗一排嘅聲音版/影片版，已出。我朋友負責。一個Post有晒影片同聲音，影片嘅自己開嚟睇，聲音嘅就去attachment（睇上面個圖，只係sample，入去睇一次就明了）。

3. 除咗方便你坐車跑步之類睇外，留意我地用vimeo，佢有埋1.5倍quick play嘅功能。週末嗰篇Domino’s Pizza vs Google，我地玩過，4000字嘅文，讀出嚟只係15分鐘，快放就10分鐘搞掂。平時啲文就應該10分鐘以內，快放7分鐘（當然我地寫同錄就用好多時間，所以歡迎提意見，但唔好攻擊我朋友）

4. 第一篇當然係完全免費，畀你睇個辦咁。打後就係20蚊同40蚊會員專屬了．亦因為咁，我等到新一個月先launch，大家可以放心去upgrade20蚊會員或40蚊會員，佢只會扣你差價。另外，年費12嘅都可以類似咁轉年費20同40，都只係扣差價。

5. （長氣講多次，現有嘅20蚊同40蚊會員自動享有，唔使做任何嘢。）

6. 歡迎畀啲feedback 我（PM啦），盡量做。

港股強，科技股強，留意快手1024

7. 近期市況唔算太旺，但有趣的，因為好似有啲趨勢睇到。昨日上一篇都有寫過下。首先你見到港股呢排係跑贏美股嘅，唔知係咪都同估值有關。不過更重要係，港股啲科技股係有力嘅。例如你睇今日（星期二），科指明顯升得好過恒指國指。

8. 反而美股就唔係太得，寫文之時（星期二晚）道指標指都升，但納指依然跌，同上個月美股一樣。

9. 另外我都想講講，可以望下隻快手1024。我完全唔熟間公司，但，之前出完業績大插。話蝕錢，但其實係好過預期的。咁而家既然科技股旺返，呢隻夠大，又夠殘，我覺得可以短線留意下。

嘉年華郵輪Carnival CCL 創新高！

10. 拿，core list嗰啲唔隻隻講了，但貼一貼新高嘅東西（主要都係舊經濟股）。講真，你話我貼啲幾廿年前嘅股票就冇意思啫，但呢啲日日創新高，即係你幾時買都贏錢喎，點會冇用？

11. 另外，隻嘉年華郵輪CCL卒之再破頂，因為美國CDC批咗佢地三個港開船，照計仲可以HOLD住，但到真係開船可能就要獲利，或者擔心嘅，沽一半先都得。呢隻我冇買（都話Monitor List冇買），但唔少讀者都有，真係得意之作。2月推嗰時22.7咋，而家30.5。

12. 至於Lionsgate不多講，新高後倒跌，都係併購目標，冇乜其他。

理文化工746 7月必定出盈喜！應該係！

13. 都唔算完全新意，講返隻舊股，但近期少講。理文化工746。唔知係乜嘅讀者可以睇舊文。仲好得閒嘅，我寫過篇4000字嘅專題。第一篇時3.8，第二篇時4.3，而家都係4.3。睇你咩位買，但總之唔係升咗好多，但應該唔會要輸錢。同埋，係跑贏恒指嘅。

14. 有乜跟進？我估公司會出盈喜。實則今日做Youtube節目有提過，可以留意下啲出盈喜嘅公司。但理論上呢，都要埋咗嗰半年數先可以出。咁正路12月年結，6月尾中期業績公司，7月就可以出盈喜。

15. 幫你睇埋，理文化工出過幾次中期業績盈喜，都係7月。但只係估計，公司理論上可以未到7月都出（係得的），甚至唔出都仲可以，有時冇乜準則。

16. 咁但，係咪條數真係會靚到出盈喜？咁好簡單計一計，舊文都有寫，2020 上半年純利1.5億，下半年純利3.5億。只要今年上半年純利，有舊年下半年咁嘅水平（3.5億），咁按年都已經超過100%了，點都有資格出（但記住，公司都仲可以唔出）

17. 咁你估個假設（今年上半年純利，有舊年下半年咁嘅水平）做唔做到？咁只睇一樣嘢，三氯甲烷價格。舊文都有寫，舊年上半年係每噸2000人仔，下半年2200。而家？差不多4000人仔。你鍾意可以每日慢慢睇。

18. （當然你要質疑話其他產品價格全大跌呀，或者啲出貨量大跌呀，或者加左10倍人工嘅，就隨便你啦）

19. 結論？我好有信心，今年公司上半年嘅業績，會比舊年上半年好好多，一個double以上，而公司好可能出盈喜。就算唔出都只係可能唔想（以前都試過），唔好因為唔出而以為業績唔得

Bonus：心法哲學討論：出盈喜係咪一定好事？好事又係咪實升？

20. 不過出盈喜係咪實升？都係一個值得諗嘅問題。甚至出盈喜係咪「好消息」，都可以諗。記住你諗兩個分開嘅問題，第一，係咪好消息。第二，好消息又係咪就會升？（盈警一樣，唔再分開討論）

21. 第一個問題易答啲，答案係睇情況。但我記得某啲分析（例如信報）走去用有幾多公司發盈喜之類去量度個市好唔好或者業績好唔好，就完全錯。首先，頭先講咗，公司業績升幾倍都可以唔出盈喜，根本冇好客觀嘅指引。另外，other things unchanged，如果某公司舊年上半年賺1億，下半年賺5億，今年上半年出盈喜話宣佈賺1.5億，你估股價會點？好可能會跌。見到問題未？

22. 就呢個例子，理文出盈喜我估極大機會，但佢今年上半年「只係」好過舊年上半年嘅1.5億，並不夠。最好勁過埋舊年下半年嘅3.5億，我估都做得到。

23. 第二個問題仲有趣，邊個話出盈喜實升？正如你見好多股票純利升幾倍都跌，有啲蝕到趴街都照升。除咗頭先講嘅半年半年比外，仲有一樣嘢，資深讀者一定知：業績冇所謂好定差，只有勝預期定差過預期。而股價永遠炒將來

24. 兩個演繹方法，首先如果有分析員睇嘅公司，一般市場反應都係睇下同佢地嘅數符唔符合。咁例如分析員一早估盈利升幾倍嘅，你出個盈喜，股價未必有反應啦，如果盈喜話盈利升得一倍，可能仲要跌。

25. 仲有，即使係冇分析員睇嘅公司，好多公司係人人都知業績得唔得。例如啲酒店股呀飲食股呀咁，鬼唔知出盈喜咩，舊年同期咁大件事。咁嗰啲，就算冇分析員睇，都未必有乜反應。

26. 例如一個例子：你見港交所388啲股價，好少業績後會有乜反應的。點解？因為日日幾多成交，你知我知人人知，港交所收幾多fee又人人知，唔會有乜意外的。

27. 所以講到尾，一啲冇乜分析員跟，然後又唔係普通人咁易睇到生意嘅股票。就有機會出完盈喜後爆升啦。例如理文化工746。

28. 咁你話，「大戶」知唔知？如果我係基金經理當然正常一早知，樓上講嘅嘢全部唔係咩秘密資料。但反正隻嘢成交唔多，你有好多人（散戶）會係盈喜後，甚至業績後先衝入去的。

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。