Domino’s Pizza上市以嚟回報好過Google，點解？有乜啟示？ (Patreon)

2004年夏天Google 同 Domino’s Pizza 上市，你會買邊隻？

邊個話High tech一定跑贏？

但明明我睇股價唔係咁喎，你係咪搞錯咗啲嘢？

點解Google 股價跑贏，但依然係買Domino’s Pizza好啲？

Dividend reinvestment 十分重要！

1. 今日呢篇原本以為好簡單，點知搞落都幾複雜。但冇法，我係唔會呃讀者嘅。既然係複雜，我冇法特登簡化件事，咁只會令你冇得進步。

2. 另外，卒之覆晒你地嘅PM，實在忙，唔好意思。希望會令啲以為我唔回post而cut咗嘅人回心轉意。再唔係新一個月再加入都得的（記住，計美國時間，我建議你香港時間星期三6月2號先好做），到時會有埋影像版聲音版。

2004年夏天Google 同 Domino’s Pizza 上市，你會買邊隻？

3. 原本係一個十分簡單嘅故事。介紹返，今日嘅主角，兩間公司。一間Google（GOOGL），一間Domino’s Pizza（DPZ），兩間都家傳戶曉，相信不用介紹。

4. 另外留意，Google 有三個share class，A股B股C股，你買得到嘅係A股（GOOGL）同C股（GOOG），為簡單本文用Class A（GOOGL），我自己買嘅都係Class A，至於有乜分別買邊隻好，自己睇文，不在本文討論之列

5. 好啦，呢兩間公司聽落完全唔啦更，但有一個共通點：佢地都係2004年上市的，仲要只係相隔一個月。一間新經濟（好似係）一間舊經濟（好似係），幾大對比。

6. 咁如果你活在2004年，叫你揀一隻買，你會揀邊隻？好難講，但我估都有超過一半人揀GOOGL．

7. 然後而家你身處2021年，咁我再問你，畀你坐時間光返去，只能買一隻，你會買邊隻？應該十個有十個都話買GOOGL。

8. 咁，似乎就錯啦。GOOGL本身已經係一隻難得一見嘅好股（當然你當年唔知），但DPZ升得仲多！

邊個話High tech一定跑贏？

9. 咁樣寫篇文你大約估到，梗係有啲counter intuitive 嘅嘢。如果只係吹捧科技股點巴閉，冇乜好討論。正係因為DPZ反而回報跑贏GOOGL，先夠神奇嘛。

10. 跑贏幾多？我地睇下。留意唔少文講過呢個現象，講得比較好嘅係CNBC呢篇。小心啲，係2020年2月嘅文，剛剛好大跌市之前。但問題不大，陣間補充。

11. 留意篇文都冇乜特別，除咗個圖。咁話畀你知，同樣係2004年上市，如果你當年買入去，GOOGL回報差不多2900%，1蚊變30蚊。不過DPZ仲勁，5400%，1蚊變55蚊。標普指數呢？1蚊變5蚊咁上下。原來舊經濟low tech嘅DPZ跑贏新經濟high tech嘅GOOGL

12. 留意，佢內文係寫GOOGL 1蚊變35蚊（唔係30蚊），同時寫DPZ，1蚊變56蚊（唔係55蚊），但呢啲都不太重要。

13. 仲有，我講過啦，佢篇文2020年2月，咁打後到而家，DPZ升咗15%，但GOOGL升咗55%，陣間會用到呢兩個數字，記低佢，但一樣唔係重點。（順帶一提，知道邊啲地方唔使執著，係極重要嘅技能，但唔易學）

14. 我話你知，上面佢個圖，甚至你可以質疑佢啲數字。如果你自己計，會計到同CNBC唔同。話埋你知，你分分鐘係計到相反結論，即係DPZ跑輸。但都真係不重要！最重要係，唔該你記住：GOOGL升好多，但DPZ一樣都升好多，比得上GOOGL，某啲度法之下（例如CNBC）甚至勁過GOOGL。放心，邊個真係多啲，對我地討論嘅嘢冇致命影響。嫌煩嘅，skip下面呢段，直接去「點解Google 股價跑贏，但依然係買Domino’s Pizza好啲？」

但明明我睇股價唔係咁喎，你係咪搞錯咗啲嘢？

15. 呢度真係要插播，有啲煩，但會學到啲嘢，我盡量簡短。你會話，喂，唔係喎，我自己計到唔係CNBC咁嘅？所以都話，世事冇咁簡單。

16. 先講GOOGL．呢個就係股價圖。股價而家2356，當年係54。大約1蚊變44蚊，17年喎，複合回報（CAGR，compound annual growth rate）25%左右。你話，喂，樓上CNBC話1蚊變30蚊喎—哦，咁都話之後再升咗55%嘛，30蚊再升55%，大約啱數，大約1蚊變44蚊。

17. 然後你再執著啲，搵返當年啲新聞（其實呢篇係2020年嘅當年今日）。拿，咁就大鑊啦。明明話佢定價85蚊，第一日收市100蚊（好彩唔係升跌好多，否則啲計數更煩），咁做乜我個圖係54蚊？

18. 你大約估到了，因為拆過股。一拆二。但點解仲有啲偏差，就唔好問我了，可能係爭一日。唔知同後來再拆咩A股C股有冇關係。總之記住：你一般搵到嘅股價，都係會調整拆股合股。

19. 好啦，in case 你個人真係好有求學精神，講多樣嘢你知，包你人都癲。頭先篇當年今日有講，當年GOOGL上市，估值230億。而家市值呢？16000億（股價圖有寫）。70倍喎頂。點解多過股價升幅？應該計邊個？

20. 短答案：應該睇股價，因為市值唔關你事，你拎住係股票。長少少嘅答案：因為公司發過唔少新股。例如做乜？例如獎勵啲僱員啦，例如收購啦等等。實情2005年GOOL有5.8億股，而家7.3億，都攤薄咗26%。所以市值升得多過股價，又係記住呢點。

21. Sum up：GOOGL去到CNBC篇文嗰日（2020年），1蚊變30蚊。去到今日呢？1蚊變44蚊。市值就1蚊變70蚊，但唔關你事。

22. 至於DPZ，冇咁煩，應該冇拆過股冇合過股，IPO價14蚊，跌少少，同股價圖嘅起點差不多，很好。而家呢？427蚊。咁你計到，1蚊變30蚊咁滯。CAGR 22 %，喂，明明點都低過GOOGL喎（望下樓上嗰段sum up！）．

23. 同埋，做乜CNBC個圖話1 蚊變55蚊？CNBC篇文2020年，打後股價仲要升咗少少。你用佢篇文嘅股價（373），根本只係1 蚊變27蚊

24. 更煩嘅係，當年DPZ上市，大約10億市值。而家呢？165億。完全少過晒上面嗰段嘅數字喎。

25. 先解咗市值嘅問題，你又估到了，都係同股數有關。但同GOOGL相反，DPZ一路回購，當年6900萬股，而家4000萬，縮咗好多。所以股價升得多過市值。

26. Sum up：DPZ去到今日 1蚊變30蚊，但點計都唔係CNBC篇文所講嘅1蚊變55蚊。市值就只係1蚊變16蚊。

點解Google 股價跑贏，但依然係買Domino’s Pizza好啲？

27. 嚟啦喎，首先複製返頭先Sum up講嘅嘢：GOOGL去到CNBC篇文嗰日（2020年），1蚊變31蚊。去到今日呢？1蚊變44蚊。DPZ去到今日 1蚊變30蚊，但點計都唔係CNBC篇文所講嘅1蚊變55蚊。

28. 你會見到，明明計股價，點計都應該係GOOGL跑贏，但做乜CNBC話DPZ跑贏？亦係我地今日想講嘅重點：Dividend reinvestment．股息再投資。

29. 如果你極之小心睇CNBC篇文，會見到呢句：Domino’s, including its dividends, would have netted you a higher return.

30. 留意，Dividend reinvestment唔止係計埋收息，而係我將啲股息再瞓埋落去同一隻股票到。而又留意，如果間公司一路成長，股息跟住盈利上，往往可以升得好勁，滾雪球，往往派息多過你當年嘅成本價。例如DPZ，當年一季一股派0.2，而家一季一股派0.94，升咗5倍（咁啱佢嘅純利都差不多升咁多），咁你整晒落去，日子有功，就好甘！香港嘅例子？你睇港交所，而家半年派嘅息已經幾蚊，隻嘢當年上市先係3.88。

31. 可能有啲資深啲嘅讀者都聽過，「以股代息」，原理一樣。即係你揀收股息唔收現錢，收同樣價值嘅股票。只係因為近年少咗公司做呢樣嘢，而最出名嘅匯控5又人人恥笑，個個炒科技股，就好少有人再講。

32. 而Dividend reinvestment同「以股代息」，原理係一樣的。前者嘛，你收到股息，咪拎去再買佢啲股票，當然你亦可以選擇用咗佢。後者呢？直接唔經你手。當然仲有好多技術細節上嘅分別，例如可能你收得幾百蚊股息，唔夠買返一手，咁「以股代息」可以照買碎股，之類。

33. 實不相瞞，計及啲「以股代息」，我啲甚麼匯控5呀，領展823呀，回報可以爭一大截的。可惜而家冇Bloomberg，好難計，但唔緊要，用美股示範一樣。呢個網幾好用。

34. 咁你睇到了，由IPO到而家，DPZ，如果只計股價，咪13.5變427。另外留意，仲要收咗息（而你冇reinvest），1蚊變34蚊咯！幾勁啦係咪？一年23%左右。

35. 但，你同計埋dividend reinvestment嘅圖比，就爭好遠了！計埋dividend reinvestment，即係我收到DPZ嘅股息，買返佢嘅股票，唔係拎去食Pizza，就緊要咯，一年28%，1蚊變65蚊！睇返上一段，冇reinvest嘅，只係變34蚊，爭一大截。亦都係因為咁，DPZ回報先可以高過GOOGL！

36. 我順手亦幫你check埋，如果計到2020年2月，的確就差不多係一蚊變57蚊。同CNBC篇文寫嘅差不多。證明佢冇搵笨。唔計呢？1蚊變30咋。

37. 最後畀多個例子你，咁你話，咁啱因為DPZ升得多，息又派得好。唔好咁屈機。咁簡單啲，標普指數。由2006年4月計起（點解？因為我開始做分析員），計到今日，有幾大分別？

38. 見到了，冇reinvest嘅，1蚊變4.3。幾好啦。但有嘅，1蚊變5.1。都真係爭一截的。

（至於你話GOOGL？因為根本冇派過息，所以有冇reinvest都一樣）

Dividend reinvestment 十分重要！

39. 慌死你唔明，畫出腸：記住，dividend reinvestment 好重要。固然而家好多美股公司都唔多派息，只做回購（但，why not both？DPZ兩樣都有），但你買港股嘅，一來回購不多，二來亦唔多做「以股代息」。正路你買得港股，應該係曾經收過下股息嘅。

40. 咁應該拎去做乜？拎去再投資！當然實行上未必咁易，頭先講過，你有時收到股息都未夠買一手，re條春咩。但，記住個原則。

41. 特別係，你少錢嗰時，真係唔係好覺的。我當你組合堆嘢3厘息（尚算實際啦），我10萬蚊嘅，一年收3000蚊，就真係去次日本冇咗，你亦未必會拎去買多手任何股票。雖然，拎去買美股都得，冇話唔可以拎啲股息買第二隻。

42. 但當你去到50萬嘅（呢度好多讀者有啦，亦係勞蘇基金入場費，咁我見都唔少讀者有興趣）（btw，未報名PM我），一年收15000蚊息，唔係叫做好多錢，但夠你買一手股票。

43. 於是你發現，其實咪又係等於叫你「儲多啲錢」，stay invested，睇長線，又一示範。但記住人係種好特別嘅動物，當你係上一段，個倉50萬嘅人。我叫你一年儲多15000蚊，你未必肯做，亦未必做到。但當你收到15000股息，你又只會當橫財咁洗咗佢—而呢15000蚊「本來」唔係你嘅收入嘛，我唔係要你份糧再渣乾啲，只係呢舊錢，使下唔好洗咗佢，或者，唔好洗晒佢。

44. 結論？有錢就拎晒去買股票啦，日子有功，拉長時間，有十幾年，你見到分別真係好大。

45. 其實呢篇文用咗好多篇幅講啲技術細節嘢，因為我力求清楚，雖然我知好多人都覺得亂，但，「你試下自己寫篇丫」。咁真係咁複雜嘛。另外，啲數字可能有啲出入計錯，但講真的，唔影響我地成個結論。所以唔好太執著。

46. 但放心，DPZ跑贏GOOGL，啟示唔只係得 「stay invested，有以股代息就用以股代息，收到股息就再買股票咁簡單」。係仲有好多其他啟示嘅，可以寫多幾千字，但幾時講？下篇先講，費事拉到咁長。

47. 又，我真係寫到尾先發現，原來唔少券商（港股美股台股都有！）都有幫你做股息再投資，詳情我未睇，亦唔想幫人免費賣廣告。但有嘅，不妨幫襯下。

＝＝＝＝＝＝＝＝＝＝＝＝＝＝＝＝＝＝＝＝＝

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。