ivanliresearch

抽水潮？通脹？幣災？驚都冇驚過！LVMH 愛馬士 ASML BlackRock JP Morgan L全部新高．LionsGate KraftHeinz 全部新高．扑歐洲公司表現幾好，今年歐股仲勁過美股。之後睇埋Spotify．兩隻三星ETF：高息房託3187，FANG+ 2814 (Patreon)

Published:

2021-05-25 20:05:39

Edited:

2021-05-30 21:32:42

Imported:

2021-07

Content

抽水潮？通脹？幣災？驚都冇驚過！

Core List：LVMH 愛馬士 ASML BlackRock JP Morgan 全部新高

Monitor List：LionsGate 雀巢 KraftHeinz 全部新高呀

扑歐洲公司表現幾好，今年歐股仲勁過美股。之後睇埋Spotify

兩隻三星ETF：高息房託3187，FANG+ 2814

抽水潮？通脹？幣災？驚都冇驚過！

1. 都話唔好自己嚇自己。要擔心嘅大把嘢有得擔心，通脹啦，收緊監管啦，全部都擔心得有理。仲有加密貨幣大跌（呢個講過根本唔使擔心）。仲有，抽水潮啦（我亦冇驚過），但根本碧桂園服務同微盟嗰200億嘢，算係乜？股市就係要嚟集資架啦，你以為用嚟畀你發達？（副產品嚟啫）

2. 凡事樂觀嘛。人民幣三年新高你又唔講？更重要嘅，債息一路都唔上（我都有啲意外），最新仲要跌返1.6厘樓下。咁通脹又係咪要咁驚？

3. 港股嘅，相當強勢啦，升成500點，成交都唔錯。仲有你見啲強勢股，港交所388騰計700同埋啲科技股，都有啲力，望落OK靚仔。仲有堆券商股（大陸啦）表現都不錯，有得短炒下，但千萬唔好玩長線，週期股，來來回回得個桔。例如隻中信證券6030，龍頭啦，而家5年新高。但，2015年成36蚊。

4. 美股呢？寫文時（星期三晚半夜）牛皮，但我地推嗰啲股票有啲都不錯，下一段講。

5. 簡單嚟講？五月表現好似麻麻地，但都唔見得係咩要輸錢。我成日都強調呢句，因為，而家咁你都叫悶叫救命，到真係大跌嗰時點算？而呢日係總會發生的，根本避唔到（未睇過嘅睇舊文，環環相扣呀！）

Core List：LVMH 愛馬士 ASML BlackRock JP Morgan L全部新高

6. 原本應該係聽日「大師冇點你」先寫，但聽日又唔知咩情況，況且今日比較多想法，即時update咗大家先。

7. 為求清晰，以後我會分返開兩個Watch List cap圖（研究下點樣分享畀大家）。一個叫core（以前就咁叫Ivan，但感覺太odd了，唔好意思貼出街），一個叫monitor．有乜分別？你應該估到，買咗同未買嘅分別。

8. 應該包到大半（但未必絶大多數）我推過又鍾意嘅股票。Core嘅不用講啦，我有買嘅。Monitor嘅呢？一般嚟講都係我想買的，但基於種種原因未買（主要係冇錢）。「靠大家了」

9. Core嘅就暫時得美股，因為好似冇同大家講過我買咗乜港股，而好多都係陳年買落，廢事慢慢解釋，例如我廢事貼隻匯控5出嚟你又問我做乜買咗，但我真係有的。但Monitor嘅就包埋港股，例如咩中銀航空租賃2588，金朝陽878，信和83，新意網1686嗰啲。（我對大家幾咁好，搵返晒舊文畀你，順手再多謝義工讀者幫手整目錄，有用的。你可以試下搵股票編號，唔得就搵公司名，或者試簡稱，多數我都將啲嘢炒雜放晒上標題，好過用tagging）

10. 好，入正題，見到今日個Core list，都有五隻嘢創咗新高。咁LVMH愛馬士之類唔再講啦（其實極早已經推，不過我自己都係上個月先買，「唔計2012年嗰次慘劇」，有圖有真相，真係在墨西哥買的。未沽嘅而家升5倍）

11. 順手講埋，在福布斯排名，Bernard Arnault已經成為世界首富。但彭博榜未係。計法有啲唔同，不必深究，但邊個話一定要高科技（而更進一步，邊個話你要高科技先買到股票？車房仔發達未？）？都未得閒寫Domino Pizza股價跑贏同年上市嘅Google呢件事。

12. 另外留意，LVMH市值其實先3200億歐羅，同堆10000億美金嘅Big Tech爭好多，但點解佢係首富？因為佢渣好多！

13. JP Morgan同BlackRock嘅，不講了。而唯一一隻core上面創新高嘅「新科技股」，係ASML（你唔係話我知佢係舊經濟下話？），近期有單嘢，在韓國開廠。咁就各自表述啦，韓國人當然視為勝利，日本人就十分酸，台灣人就覺得扯咪又係幫台積電打工，中國網民就估可以偷雞供貨畀中國（冇咁易吧），反中國嘅又話會殺埋中資廠。任你點對號入座，你亦明白點解我對呢啲爭拗好厭倦，但點都似乎係好事，股價升就得。你拗一大輪，冇買嘅，又有乜用？

Monitor List：LionsGate KraftHeinz 全部新高呀

14. 至於Monitor List上嘅，LionsGate創咗新高啦（雖然由我推開始唔係升好多，應該話我推嗰時都升咗唔少），仲有，雀巢，以及再早一日KraftHeinz都新高。不過呢兩隻算有提過（民生品牌FMCG），但成堆之中唔算我最心水。雀巢根本由頭到尾都冇點平過，KraftHeinz就之前有啲古惑嘢（畢菲特都中招）。反而我仲係留意 P&G 聯合利華Unilever之類。

扑歐洲公司表現幾好，今年歐股仲勁過美股。之後睇埋Spotify

15. BTW，今日提過ASML，LVMH，愛馬士，雀巢，聯合利華Unilever。知唔知有乜共通點？全部都係歐洲公司。港股固然麻麻，美股今年勁，但邊度更勁？就係歐洲！ 估唔到呢？台灣你都仲可以講台積電，歐洲基本上冇咩科技股（勉強就係ASML，但做硬件，唔係Big Tech平台），又再證明，唔使咩high tech嘅，夠殘就得。你Cathie Wood堆嘢夠高科技啦（好似），而家一來一回，應該跑輸啲歐洲股四成以上。

16. 我地樓上呢，都包咗好多歐洲最大嘅公司了，「其實你去買ETF都得」（有機會寫）。詳情可以睇呢度，睇國家嗰個column．有邊間我好少寫？有，就係藥廠（唔識睇），同埋法國嘅L’Oreal（今日又新高）。都係鍾意嘅公司，但回都冇回過。已放埋入Monitor List．

17. Meanwhile，我仲會留意Spotify，冇錯係你聽歌嗰間，一樣歐洲公司，但美國上市（所以點解要睇美股）。你可以睇下王弼講，另外，比較少人講嘅，有冇諗過遲早會畀人成間買起？當然唔係蘋果，而係可能NetFlix迪士尼之類。BTW，我同王弼有幾面之緣，算係知我乜水，但唔相熟，冇私下PM過。佢寫啲嘢我未必全部同意，亦未必啱新手，但我覺得不錯的。

順手同大家講埋，勞蘇基金除咗港股美股，係仲會買日本歐洲（包埋英國）的。台灣韓國就難啲啦（因為唔多歡迎外資），除非美股有上市。有興趣嘅PM報咗名先，冇錯講咗好耐，但亦不急在一時。曾經有一排我以為會八萬五，但最新話你知，相信今年內搞到嘅機會唔細

兩隻三星ETF：高息房託3187，FANG+ 2184

18. 最後，快講下三星（資產運用啦，唔係電話）嘅兩隻嘢。隻亞太高息REIT 3187之前講過，早排都一路想推，但成日都冇寫，又冇買，上市至今表現不錯。詳情睇舊文，主要係日本，澳洲，新加坡。而家未必極抵，但至少分散到地區風險（部份啦）。我甚至覺得，買唔起樓或唔買樓嘅，可以每個月買啲，變相收租。