Bitcoin 崩盤冇拖冧股市。媒體股併購潮。 LVMH又歷史新高， Nvidia績前有力。契媽未有好多流出。英國股似乎抵買？醫生趕食飯就叫你唔好驗乳癌。六個資本主義的迷思。加密貨幣大屠殺快到？LSD有助創作？恒指季檢後續 (Patreon)

快評幾句— Bitcoin 崩盤冇拖冧股市。媒體股併購潮

大師冇點你— LVMH又歷史新高， Nvidia績前有力

每日一圖— 契媽未有好多流出。英國股似乎抵買？醫生趕食飯就叫你唔好驗乳癌

Good Read — 六個資本主義的迷思。加密貨幣大屠殺快到？LSD有助創作？

FB Post Summary — 恒指季檢後續

1. 影片版／聲音版已經搞得七七八八，玩法會係兩樣都做，開一個Post搞掂。個Post會係video format，然後audio as attachment．想睇片嘅睇片，唔想睇樣唔想浪費data嘅（但試過啲file應該好細），咪就咁download個audio file開嚟聽。準備定升級去20/40蚊會員吧，應該6月上架。現有嘅20/40當然自然享有。而冇興趣睇片聽聲嘅，咪一切依舊，文字版照做。

2. 另外，並非我親自錄音（邊有咁好精力），但由我最好嘅朋友（都應該唔使one of the）錄，大家就唔好批評佢，有乜就話我啦。佢冇收大家錢，唔應該畀讀者毒舌（雖然大家一路都相當愛護我）

3. 今日照舊，三個每日一圖，三篇Good Read。不過其他嘢較長，呢兩部份寫短少少。

4. 仲有，週末嗰篇真係巨著嚟的，記得去睇下。

快評幾句— Bitcoin 崩盤冇拖冧股市。媒體股併購潮

5. 恒指固然企得硬，但美股更強。Bitcoin甚麼大瀉會影響股市？完全冇喎，畢竟好大程度係另一個世界（雖然係多咗企業參加）。信啲末日論者真係死十次都唔掂，通脹又話影響企業盈利，通縮又話冇人消費，人口升又話冇飯食，人口跌又話冇動力，油價跌又話頁岩氣破產，油價升又話影響成本 —根本呢啲嘢就有贏家有輸家，但，「你見股市長線係升的」。係有原因的。

6. 另一方面，Amazon應該差不多正式宣佈收購MGM（占士邦，洛奇，留意同賭場酒店無關）。MGM冇上市，而呢單嘢都傳咗幾日，冇乜特別。特別在邊？真係行業併購潮了。之前就Warner Media同Discovery合併（走漏呢隻，但實在炒得太貴）。咁剩返嗰啲，都係等賣盤。

7. 早幾日同大家寫過Lionsgate（拿，環環相扣呀！），繼續有反應。另外，畀埋個圖你睇，其他細嘢都係等畀人買。Lionsgate都真係太細，但一樣有機會被人食，仲有更細嘅AMC Network都可以諗（留意唔係戲院嗰間，小心搞錯），Discovery 已賣，Fox就個名比較衰。我會覺得可以諗ViaccomCBS。我有閒錢會買，可惜冇。

大師冇點你— LVMH新高，Nvidia有力

8. 我都知有啲讀者覺得呢個環節幾悶，但我就係要話畀你知，唔少股票都仲係日日新高（其實有幾奇？美股都離高位不遠，5月埋單分分鐘仲有得升，做乜又叫晒救命？）。LVMH買嗰時我都貼埋出嚟啦，咁而家執7%左右咯，一個月咋喎，仲要坐得安心。

9. 另外分享下，其實我好早已經買過LVMH，當時仲要係在墨西哥（旅行啫）用ETrade買，時為2012年。我嗰時仲話夠晒全球化，我在墨西哥用美國券商買一間賺大陸人錢嘅歐洲公司。嗰時股價幾多？我都唔想睇，心痛。點解沽咗？後來ETrade撤出香港定乜嘛。呢個故事教訓？好股真係長渣。亦唔係馬後炮，唔係佢撤出香港，我真係唔會賣。（忍唔住望咗，5倍呀，陰功）

當然你可以話，咁如果隻嘢爆煲呢？你又及早避咗。咁但，首先雖然未必事前估到，但你揀嘅股票，應該有前途嘅大機會過爆煲啩。另外，我一隻LVMH升5倍，夠我輸幾隻total loss啦。

10. 至於Nvidia，上次FB Post（唔貼link了）又有好多人批評，咁當然落廣告就會多街外人（我都係想咁啫）。但，理得你丫，我係唔使識晶片的，即係得罪講句車房仔砌機佬發晒達未？上星期講過，拆股嘛，呢排股價都強。早早推過（但唔算成日寫），早早買咗啦。但你又諗下，而家630，3月都見過460蚊。唔係舊年3月喎！係今年3月！嗰時又話驚又止蝕走咗嘅，又錯失好嘢了。呢度都差不多四成。聽晚（星期三）出業績，我有時間會望下。

每日一圖— 契媽未有好多流出。英國股似乎抵買？醫生趕食飯就叫你唔好驗乳癌

11. 契媽未有好多流出—呢個圖只係ARKK，但成檔嘢情況都差不多。留意啲基金或ETF，資產規模升跌，有兩個原因。一個就啲股票升跌，另一個就係有新錢入/有人贖回。咁固然Cathie Wood堆嘢高位跌咗一大截，但你見fund outflow其實唔算多，似乎啲友仲對佢有信心。又不過，千萬唔好以為契媽好頭痕。實情，佢嘅AUM一度去過500億美金。都唔使講多，我地計一個月，佢好似1% fee，都已經4000萬美金管理費，減埋咩分析員嘅錢，至少都落袋七成。你諗下係幾多錢？根本一個月搵嘅錢已經成世食唔完。希望第時勞蘇基金都有咁規模。

12. 英國股似乎抵買？—個圖已解釋一切，脫歐之前，英國股市同世界差不多估值。之後就折讓，而家更大。固然脫歐唔係冇影響，但照計乜都反映晒啦。新讀者留意，之前都寫過文推英國價值股（拿，環環相扣呀！）。另外勞蘇基金都應該會買英國股。

13. 醫生趕食飯就叫你唔好驗乳癌—之前Good Read寫過，醫生生日嗰日開刀，病人係特別易死嘅。固然個個行業都話自己專業，但數字唔呃人。今次類似嘅東西，畀你見到，醫生在臨收工前，或者放飯前，都係比較少叫病人去驗乳癌嘅。原因？你話呢？成個研究在呢度 

Good Read — 資本主義的迷思。加密貨幣大屠殺快到？LSD有助創作？

14. 六個資本主義的迷思—作者提出資本主義支持者相信嘅一啲嘢，然後提出反駁。都係大路嘢，本人當然不同意，但當然睇下其他嘅觀點。雖然，都冇乜好新鮮。你可以試下駁上駁。當然，可能你同意作者，而你都反資本主義。但我諗……你訂呢個Patreon，好難係好反資本主義啩？

15. 加密貨幣大屠殺快到？—亦都唔係好新鮮嘅觀點，不過亦可以重溫一次。我亦一早有諗到呢個問題：當權者點會畀你挑戰到佢控制貨幣嘅權力？除非你變無政府主義咯。

16. LSD有助創作？—呢篇就過癮啲啦，純學術研究，但真係見到LSD可能有助創作。點解？因為「正常人」諗嘢有個譜，會諗返以前經驗。但take咗嘢，就會亂咁跳，九唔搭八，拋開咗呢啲常規咁喎，會令你啲意念亂咁撞埋一齊。當然，有乜副作用，值唔值得咁玩就另計。

FB Post Summary — 恒指季檢後續

17. 恒指季檢後續—想星期一開市前寫，所以直接在FB Page出咗。都……冇乜特別。不過仲想玩嘅，可以睇下個Post。又，個Excel我放埋在呢度了。呢度attachment 有。留意係下星期五（6月4日）收市後生效，即係應該嗰日有啲異動。但近幾次見到，都冇乜嘢可以玩。不過如果咩友邦1299騰訊700之類忽然跌落嚟，就係買入好機會。

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。