嘉年華郵輪CCL。金價。一仔282。Dynam Japan 6889。 愛馬士 BlackRock就固然新高。但Monitor List嗰堆仲有趣。 基金過去表現不等於將來。偷襲珍珠港後股市跌幾耐？ Passion economy and the future of work．股市旺真係有助消費同就業 (Patreon)

快評幾句— 嘉年華郵輪CCL。金價。一仔282。Dynam Japan 6889

大師冇點你— 愛馬士 BlackRock就固然新高。但Monitor List嗰堆仲有趣

每日一圖— 基金過去表現不等於將來。偷襲珍珠港後股市跌幾耐？

Good Read — Passion economy and the future of work．股市旺真係有助消費同就業

FB Post Summary — 我的十倍股

1. 今日嘅兩個圖都好正，Good Read都正（特別係第一篇）。又，留意下我真係好多時都放返晒舊link，真係功夫嚟的。但當然都再一次多謝義工讀者整咗個index（好有用，當然可能有10%時間我要在自己電腦搵，例如個標題冇提隻嘢，或者串錯字之類）。

快評幾句— 嘉年華郵輪CCL。金價。一仔282。Dynam Japan 6889

2. 正常呢啲應該係星期二四嘅format寫，但邊得你預計到。先講嘉年華郵輪CCL，唔少讀者都買咗，新讀者睇返舊文，真係得意之作，寫明疫苗一路推就買郵輪股。留意近期新聞係其他公司多，例如雲頂香港678又話出公海（冇推過的），之前業績已經幾乎資不抵債。理論上起死回生有得炒，但風險太大，我唔會買。另外加勒比郵輪，同挪威郵輪都話開船，反而CCL唔算多新聞。但都係成堆嘢一齊郁，CCL差不多52週新高了（下面monitor list都有）

3. （BTW，你見本人真係搵返晒啲link畀你，一方面見到我真係日日睇好Q多嘢，仲要有儲埋整理埋，呢啲都值回票價啦。如果我只係求其吹水打幾千字其實好快，但Patreon一篇文我要搞兩三個鐘的）

4. 至於金價嘛，實不相瞞本Patreon舊年8月剛開時就係叫人買金，我都有買（ETF啦），齊齊輸錢。但，你咪理，呢排碌下碌下又上返1900蚊，舊年分段買嘅應該都唔會點輸錢。而相信近期金價升，除咗因為通脹期望高，亦同Bitcoin大瀉有關，呢排真係走勢掉轉（順手你可以睇下，舊年8月時啲文簡單好多，而家質同量都高咗，而我冇加價的）

5. 一仔嘛，復牌。我就廢事講咁多，但似乎以往嘅走勢，都係高開然後再升的，因為總有啲人見到升先再去追。你開市飛入去然後收市前沽咗佢，我估有得玩下。當然我唔會買，有乜事亦自求多福，始終以往走勢不等於次次都咁。

6. 最後，Dynam Japan 6889，當然有私心。間公司請過我去日本（仲要係我第一次去日本！），我以前寫過報告添。日本公司，開彈珠機場（睇日劇或電影就知係乜，悶到九彩的東西）。出咗業績，仲有指引。咁你估都估到業績勁差，但股價亦一早大插。而家仲有派息（好過冇咁），而指引都預今年點都好過舊年。我都會放入monitor list．另外聽日佢地個業績會我都會去嘅。

大師冇點你— 愛馬士 BlackRock就固然新高。但Monitor List嗰堆仲有趣

7. 上面寫得長，咁core List愛馬士BlackRock新高我唔再細講。

8. Monitor List 雀巢同 LOReal都新高，但亦冇乜特別。BTW，唔知咩core 咩monitor嘅，睇舊文。

9. 另外港股呢，呢三隻我都係有嘅，但冇乜特別，一隻安踏係我嘅十倍股（但買得少少有鬼用咩，詳情睇下面FB Post Summary）．另外兩隻悶嘢，N年買落。

10. 反而最好玩係monitor list入面一堆未創新高，但造得幾好嘅嘢。第一隻CrowdStrike，我應冇乜講過，但係在康宏做時下屬搵嘅嘢，幾好的東西，電腦保安。但我冇買又冇推。至於郵輪CCL樓上講咗。剩返嗰堆係乜？都係啲併購對象。幾隻係媒體，DropBox就舊年提過（拿，環環相扣呀）

每日一圖— 基金過去表現不等於將來。偷襲珍珠港後股市跌幾耐？

11. 基金過去表現不等於將來—呢個真係相當有趣嘅現象。解嗰時好多人都明，但做決定時一樣會犯錯。可能就係人腦嘅弱點。想講嘅係，想像你畀非洲食人族捉咗，然後叫你估下下一季呢個烏啦啦共和國足球冠軍係邊隊。咁當你手頭有報紙，你對堆波一無所知，正路你都係買榜首嗰隊，或者舊年拎冠軍嗰隊。合理嘅。但，基金呢？就有啲問題。好多人鍾意睇Track Record，勞蘇基金都不停畀人捽（但我係忽略的。又，有興趣PM。），往往見到隻嘢過去幾年做得好，就覺得以後會好。但，財經節目都話你知過去表現不等於將來。更有趣嘅係，似乎仲要係負相關！之前做得越好嘅，之後唔止係冇特別好，而係會特別差。點解？reversion to mean 咯。又或者佢地買啲嘢已經去到泡沫。Cathie Wood今年亦係一個例子。

12. 偷襲珍珠港後股市跌幾耐？—話說今日係道指125週年！道指雖然唔多科學（寫過幾次），但歷史夠長。呢個圖係WSJ做嘅，講真做得幾差下。原意係好，睇啲大事後道指會點。但，只係睇6個月同12個月兩個點。無論如何？你睇，偷襲珍珠港後，股市一樣一年就返返高位。可見你擔心啲咩頁岩氣爆煲呀韓仔基金呀，真係多餘。

Good Read — Passion economy and the future of work．股市旺真係有助消費同就業

13. Passion economy and the future of work—非常之咁好睇，只係佢比較Passion Economy同 Gig Economy（UBER司機呀，外賣步兵呀嗰啲）個表已經夠正。Passion Economy 呢？你睇我嘅文咪已經係。留意下人地點樣可以組織到一篇文出嚟。不過留意寫文嘅係私募基金，佢地應該有投某幾間公司，可能有偏頗。

14. 股市旺真係有助消費同就業—聽落好似常識咁，但都要認真研究。固然表面數字睇到，股市旺呢，之後就見到消費同就業都強。但，統計同邏輯101都話你知，相關性唔係因果，A然後B亦不代表係因果。會唔會根本只不過股市係經濟好嘅領先指標，即係唔係股市好導致消費就業勁，而係經濟好引致呢啲嘢，只不過股市早一步反映經濟，而並冇直接影響消費就業？認真嘅研究話你知：股市真係直接影響消費就業的。

FB Post Summary — 我的十倍股

15. 我的十倍股— 唔記得呢度有冇講過，但anyway，隻安踏我係十幾蚊渣到而家。拿，十倍股呀，你試過冇？但，亦不忘自嘲。我買得多嘅，退咗休啦。但我只係買得一手，皮幾嘢變十幾萬，都係幾勁，但唔會令我生活有明顯改變（你話幾百萬變幾千萬就唔同）。好簡單教訓：買得唔夠大嘅，升幾多都只係自high．所以點解要stay invested．你雞仔注話一年升幾成，但我成副身家買嘅嘢一年升一成，最後邊個多錢？

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。