話咁快咪又繼續打牌。騰訊700業績，好難睇。恒指季檢兼博入港股通攻略。兩隻搏收購／私有化對象—金朝陽878，Lionsgate。小版務（不太重要，趕時間可skip）—投咗票未？有聲音同影片版 (Patreon)

話咁快咪又繼續打牌

騰訊700業績，好難睇

恒指季檢兼博入港股通攻略

兩隻搏收購／私有化對象—金朝陽878，Lionsgate

小版務（不太重要，趕時間可skip）—投咗票未？有聲音同影片版

話咁快咪又繼續打牌

1. 拿，都係講返多少少港股啦，雖然長線嚟講我都係乜股都講，亦講真，大家信我嘅判斷嘛。冇理由人人話講發夢股我又轉晒台咁（雖然嗰時我都有講，但唔會係好多篇幅）。人講我又講嘅，你唔使睇我啦。

2. 美股嘅，反而靜靜地，唔算太多嘢講。Bitcoin話咩高位跌咗跌咗五成幾，但再講一次，同個「金融系統」嘅連結仲係好細。你2018年高位跌八成都係咁啦，我知，而家機構參與多咗，但原則不變。

3. 你見「幣災」當天（星期三晚），道指都跌600點（好多咩？2%左右咋喎），但又好快有支持，納指直頭差不多收復全部失地。今晚（星期四）已經全線反彈，可見市底仲係極強。你高位追啲唔知咩股嘅，就你個人問題。

4. 港股嘛，星期四就小回，但你見啲科技股反而翻生（事實係科指升1.3%），都會係好事。一來大家（我都係）照計都唔少科技股，二來，亦係風險胃納嘅指標。即係有一排日日都係港鐵66，煤氣3，領展823新高，就夠晒悶—但當然我地都有方法應對。

騰訊700業績，好難睇

5. 係真係「difficult to read」，唔係ugly．你信第一反應嘅，睇南非Nasper，似乎對業績收貨。或者睇荷蘭上市嘅Prosus（Nasper子公司，騰訊堆股票在呢間下面），反應都正面（都話，全球市場我都睇）

6. 不過啦喎，你睇ADR呢，就麻麻地，一度仲要低過香港嘅價。

7. 最後，睇返同分析員預期比。留意騰訊份嘢有「兩個盈利」（原因很深，不解），分析員多數都睇”non IFRS”嗰個，咁你見，業績係普普通通咁咯。

8. 講到尾，就係唔算太好，亦唔係太差。但，似乎冇乜再多嘅壞消息，而股價都回咗唔少。所以，照計現價幾吸引。

9. 最後，可能有人知，今日（星期五）恒指季檢後，騰訊嘅比重就會又減低—冇計，因為指數權重有上限，但根本呢啲就同基本因素完全無關，如果因為呢啲嘢跌，先係買入好機會。

恒指季檢兼博入港股通攻略

10. 聽日就恒指季檢，早兩日快講過，但仲可以跟進下。

11. 睇返報導，有引埋中金份報告（分析員就係做呢啲嘢，我以前都係），咁熱門京東9618網易9999大家知啦，但做乜又講多次？有乜新嘢？就係有埋佢計嘅被動資金流入。

12. 咁留意返，不能只係呢個數字大細就估對邊隻影響大。因為，你堆嘢本身嘅成交唔同嘛。同樣係1億被動資金流入，對騰訊影響可能好細，但對隻中小型科技股就好大影響。

13. 不過，我已經幫你計埋（太瑣碎，唔放Excel了），即使計及成交額，都仲係應該試下短炒京東，同埋網易。

14. 而實際上，仲會睇埋其他因素：例如你間公司本身得唔得。即係例如落空嘅，股價大跌嘅，咁有冇得守先？你間公司本身奇奇怪怪，甚至以前有啲係炒上搏入指數嘅，一落空，就永不翻身。但如果公司業務本身都吸引，就算落空，就算大跌，我都有得守下。

15. 而照計京東同網易，都係OK嘅公司。所以想買嘅，可以試下今日（星期五）買。

16. 順手講埋，炒入港股通都係一個好嘅主題，因為入咗去，就真係可能唔少北水買。但更加難貼（以前返工又係做呢啲嘢）。咁上次篇文都有提，估醫渡科技2158同心通醫療2160。你見昨日（星期四）兩隻都炒起咗，照計仲有得玩。但又係嗰句，輸死無命賠，我都唔知啲公司做乜的，其實名都幾乎冇聽過。

兩隻搏收購／私有化對象—金朝陽878，Lionsgate

17. 由於呢排冇乜閒錢嘅關係（不過埃汾太已返工，之後又鬆動啲，噢耶），呢排（講緊今個月）都冇乜加大倉位。對上買嘅就係愛馬士，LVMH（兩者都有微利），同埋BTCC（已輸四成，但冇斬，輸十成我都唔斬），有貼出嚟（但唔好當老奉，並不代表我買嘢沽嘢會話你知，most likely都唔會，唔係有乜陰謀，係未必咁得閒，亦唔想啲讀者經常問點解點解）

18. 但首先強調返，根本由舊年3月開始我都冇減過倉，只係有兩隻嘢賣過（Tesla，同埋Voyager Digital），講明短炒，前者已沽一半，後者已沽清。而當然佔我唔多錢，沽咗嘅錢亦拎嚟買其他嘢

19. 我平時每個月定期買嗰啲都有繼續。仲有以前堆美股，咩FAAMG呀，NetFlix呀，Visa Paypal BlackRock SPGI 迪士尼 ASML Nike呀，都全部仲持有的。

20. 咁即係，我都係渣住嗰啲嘢咯。有機會先貼晒出嚟（但唔貼銀碼）。有讀者話唔知有邊幾十隻美股我成日講，講真，真係太懶了，你睇得一兩個月文實知啦（上面嗰幾段，咪又講咗次，雖然未講晒）

21. 搞咁多嘢，都係為咗講以下兩隻嘢，可能得閒細講，但most likely 唔會。兩隻有乜特色？都係等賣盤或等私有化。耐唔耐就推下呢啲嘢，因為核心嘢樓上講咗啦，咪推下呢啲九世都唔郁，但一扑中就升一截嘅嘢。原理同隻創興銀行1111差不多。呢啲嘢特色係，往往市升佢又唔升，市跌佢又唔跌咁。（但當然，唔會完全唔受影響）

22. 講明先，我冇持有，亦都冇打算買（都話冇閒錢），但如果好多閒錢我可能會玩下嘅（「靠大家即時上40蚊會員仲即時畀年費啦」）。同樣地，輸死無命賠，但照計呢啲M&A target好少會咁

23. 開估，一隻係金朝陽（878），Facebook Page有講。做乜的呢？主要收租，銅鑼灣金朝陽中心（有兩座）。咁你話，收租嘅仲唔仆街？「仆咗啦」，但一年蝕億幾之嘛，今年斷估唔差過舊年。200億book 喎，24億市值，負債不多，而大股東80歲都嚟緊（固然有仔女），搏下私有化都有得諗。但當然唔知等到幾時。

24. 第二隻嘛，美股，Lionsgate（LGF），拍戲的，呢排都幾強，低位升咗3倍幾，頂丫。搏乜？畀人收購。咪講笑，當年在GoBear（舊年7月）已寫，一定係行業整合，呢啲細公司等賣。

25. 呢排有乜新嘢？Warner Media同Discovery合併，Amazon就想買MGM（占士邦，Rocky，留意同賭場酒店無關）。為乜？為咗打NetFlix同迪士尼。咁你大約估到，細公司就成為被買嘅對象。

26. 又，以前舊文（未開Patreon前）都寫過信和83私有化，大約係2020年4月嗰時寫，固然十劃未有一撇，但都真係仲有錢贏，因為當時實在太殘（已經係計3月股災反彈後）

小版務（不太重要，趕時間可skip）—投咗票未？有聲音同影片版

27. 近400人投咗票，但你未投嘅可以投下。正路6月就會推埋 聲音版，同埋影片版，有人演繹（唔係我，係我朋友，一個佬）。當然影片版包埋聲，但聲音版咪用少啲data同埋你可以唔使望住。咁因為都多咗嘢搞，所以係20/40蚊VIP先有，現有嘅20/40就當然自動有埋。最後，現有嘅文字版當然照舊。

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。