ivanliresearch

恒指算爆冷，但北水名單算扑中。愛馬士創新高。Nvidia拆股入道指？ CEO 越老公司股價越唔掂。其實通脹真係有咁高？Google嘅top search results，當然係自己。投資嘅嘢都係悶悶地好 (Patreon)

Published:

2021-05-21 21:01:06

Imported:

2021-07

Content

評幾句— 恒指算爆冷，但北水名單算扑中。

大師冇點你—愛馬士創新高。Nvidia拆股入道指？

每日一圖— CEO 越老公司股價越唔掂。其實通脹真係有咁高？

Good Read — Google嘅top search results，當然係自己。投資嘅嘢都係悶悶地好

FB Post Summary — 金朝陽通告

1. 都係嗰句，柳暗花明又一村，早排有啲各樣事務，結果一如以往，最後冇想像中咁差。近排依然仲係忙忙地，但都算係忙啲比較有意思嘅嘢。勞蘇基金繼續搞，聲音/影片版應該下個月有，兩樣一齊做。20/40會員限定，但你可以下個月先轉，而唔使取消的，只會收你差價。

2. 然後話咁快又去到6月。又可以好殘酷咁問你：道指/標指/納指年初至今升12/11/5%，恒指/國指/科指升5/0/-5%。自己對號入座，即係你美股應該賺9%起碼，港股應該打和，拉勻應該賺緊4-5%。你睇返歷史嚟講，算係不錯。望下你嘅倉位，年初至今要輸錢嘅，又係檢討下。唔係批評你，而係切忌自大。如果指數拉勻都升嘅，咁你仲要輸錢，又有幾巴閉？

快評幾句— 恒指算爆冷，但北水名單算扑中。

3. 市場算靜，所以重點留意返恒指季檢。結果你可以去睇，改制係第一次，果然有啲意外。只係加咗三隻，仲要係有啲爆冷，大熱嘅京東9618同網易9999都落空咗．咁之前股價都彈咗上嚟，照計會有些少壓力。

4. 你見美股嗰邊股價，明顯低過香港，但又唔算太多（2%左右），至少冇嘔突，所以你見影響唔係太大。而都話兩間公司基本因素都算強，所以先唔怕搏（順手講一次，將美股股價乘 7.8，然後京東就除2，網易就除5—點解我知？你訂Patreon咪就為咗呢啲嘢，唔使自己去搵然後仲唔肯定啱唔啱，我幫你慳晒時間）

5. 仲有，平安好醫生1833我有貼，結果亦係倒灶，股價炒得仲勁，照計又會有啲壓力？不過都仲係比較好嘅公司—但當然，實務冇京東網易咁扎實，估值又誇張。

6. 另外，出咗「恒生綜合指數」名單，入到呢個名單而又符合其他條件嘅，基本上會入「港股通」有北水買。咁冇點你了，之前兩篇文都貼咗醫渡科技2158同心通醫療2160，結果成功扑中。又係已炒上，照計有一轉升，買咗嘅可以好好坐，未買嘅？如果風險胃納夠勁嘅，都可以搏的。

大師冇點你—愛馬士創新高。Nvidia拆股入道指？

7. 又係循例貼下，亦都推咗，又有買埋，不用多講。當然由我買到而家（畀埋紀錄你睇冇得呃，自己搵，費事再貼），「只係」升咗8%。但，好似一個月咋喎，我就好滿意啦。

8. 咁除咗呢個外，都畀啲新嘢。Nvidia股價幾強，一度上返600蚊，我都早早買咗（早過呢個Patreon），有提但唔算成日提。最新搞作？一送三紅股，「頂，即係一拆四啦」。搞乜？唔知，但你見股價正面。因為似乎有機會入道指。雖然成件事係相當反智的，道指影響力亦遠不及標指，追入資金都少好多（應該追標指嘅資金多10倍有多）（拿，又幫你查埋呀）。但始終，呃多個指數，都似乎對股東有利？應該會在Facebook Page寫多啲

每日一圖— CEO 越老公司股價越唔掂。其實通脹真係有咁高？

9. CEO 越老公司股價越唔掂—幾適合啲年青人自high，「雖然後生係指四五十歲」。不過話說回頭，大路論述你都知，老手有經驗，有track record，有人脈（其實未必幫到公司，而係因為佢有人脈所以有人請佢）。但我地要實證嘛，咁見到，標普500指數成份股嘅CEO年紀，同股價表現，關係並不太大，但勉強去睇，係負相關嘅！即係老嘢是overrated．當然仲有兩樣嘢，第一係未計人工，其實冇乜意思，雖然老嘢理論上人工會高啲，但上到CEO級數好大舊都係睇option，股價得嘅，你咩年紀拎嘅回報冇乜大分別（固然老嘢有機會R大舊啲option）。第二當然亦係時間軸，拎2020年頭到而家，咁明顯見到好多科技股勁升，而呢堆股一般CEO都後生，如果你用今年情況又唔多同（不過，你計多幾年嘅，科技股照計跑贏更多）

10. 其實通脹真係有咁高？—係有啲賴皮，但聽咗先算，況且，我估聯儲局真係會用呢套賴皮標準（放晒風）。平時嘅CPI PCE睇按年（同按月），但呢個圖，睇「兩年」嘅物價變幅，咁你見一拉到兩年，而家啲咩通脹水平，根本唔係咩特別高—亦即係，多得舊年嘅低基數嘅。

Good Read — Google嘅top search results，當然係自己。投資嘅嘢都係悶悶地好

12. Google嘅top search results，當然係自己—篇文都舊，但講下個源起，就係Google剛宣佈會用AI（Google就有資格講AI啦）簡化佢地嘅search，其中一個核心工具就係MUM（Multitask Unified Model）．不過，似乎最重要嘅目的，係令你根本唔使去第二個website，留返在Google嘅樂園中。例如你見你上Google 問啲問題（上圖），佢都會彈埋答案畀你，根本你唔會離開佢個Page．又，可能會畀人話反競爭呀下。以前都寫過，你上Amazon search，第一頁好多都係佢自己嘅private label，實惠牌啲朋友。

13. 投資嘅嘢都係悶悶地好—篇文相當淺，照計不用我多講。但根本悶悶地係可以發大財嘅。仲有，我有個唔知點稱呼嘅奇怪理論，姑且叫做「等價交換」。本人以為「有成就感」「有意義」嘅工作，理應就會低人工啲。Lets say你去做空姐空少見到好多嘢，咁你咪肯收少啲人工咯。或者當你教書好過癮見到啲小朋友好開心，咁你咪肯收少啲人工。我返工對住成班不惡不赦嘅人渣，自然就要拎多啲錢去補數。同樣道理，你要過癮，咁個投資回報應該係拉低咗的。正如你要無風險，就自然低啲回報。