ivanliresearch

Bitcoin大跌，會唔會拖冧股市？越多ETF買股價越差？標普指數大半年都冇調整過。投資者沽Bitcoin買黃金？有70%資料就好做決定啦。點解Spotify直接上市。點解睇淡Bitcoin？記得set FB Page as Favorite．創興銀行私有化 (Patreon)

Published:

2021-05-19 20:12:56

Imported:

2021-07

Content

快評幾句— Bitcoin大跌，會唔會拖冧股市？

每日一圖— 越多ETF買股價越差？標普指數大半年都冇調整過。投資者沽Bitcoin買黃金？

Good Read — 有70%資料就好做決定啦。點解Spotify直接上市。點解睇淡Bitcoin？

FB Post Summary — 記得set FB Page as Favorite．創興銀行私有化

1. 今日又係加長版，三個圖三篇文，好睇。為咗搵啲好文貼我有時都幾有壓力，最大問題係：仲要搵啲係免費嘅文。

2. 呀仲有，In case有人未將我Facebook Page set 做Favorite（有埋Patreon summary喎），記得去。個Post有教你點整

快評幾句— Bitcoin大跌，會唔會拖冧股市？

3. Bitcoin急瀉，昨日（星期三）甚至見過3萬蚊，都幾堅，之前高位6萬5，話咁快就蒸發超過一半。咁我啲BTCC就當然不消提，但冇所謂，一早都話預可以輸晒，只佔我成個倉好小部份，所以我先可以咁風騷閒話家常。你成副身家買，甚至做孖展嘅，祝你好運。

4. 睇法？一路冇變，甚至更加強烈，當然係唔信。但唔信先要買，萬一佢升一萬倍我冇份咪大鑊？嚟緊我在經濟一周都會寫（經濟一周畀我賣廣告，所以我先寫）。最初質疑嘅問題從冇解決過，根本拎唔到嚟交易，原來今時今日先發現嘥電，又原來可以有第二隻好過佢，咁有幾獨特？

5. 你身邊總有一兩個朋友話賺咗好多，「所以我都唔明做乜話香港人買唔起樓」。但正經講，Bitcoin as an investment，有一個好大嘅好處：就係比較難買賣。特別係你唔係買BTCC之類，真買Bitcoin嘅，甚至有啲當面交收（然後畀人扑頭）嘅，你唔會咁易跌兩成就沽咗佢的。呢點同香港樓有啲似。難買賣你先坐得耐。

6. 仲有，另一好處係，啲友嘅信念夠晒強，你話顛又好乜都好，豪傑也許本瘋子，不在本文討論範圍。但你相比下下，你美股跌唔夠5%，個個已經叫晒救命呀，又話要減磅呀，又話要止蝕呀咁。你發現買Bitcoin啲友係唔會的。咁如果你係2018年之前買嘅，就要食咗2018年跌八成嗰個浪，都唔係咁易坐得穩，係普通股票嘅，一百個有九十九個都沽咗。

7. 不過呢度主要都係講股票，固然見到星期三晚美股又急跌，同啲Bitcoin一齊。之後兩者一齊反彈，Bitcoin先不講，但美股根本強勢到極，大半年都冇試過回調5%（下面每日一圖有講），咁易玩嘅市都玩唔掂嘅，之後好難搞。好地地買指數已經叻過好多人了，最緊要stay invested，同埋持之以恒。

8. 你見星期三晚真係一齊升一齊跌，但不等於Bitcoin跌引致股市跌（而相信冇乜人覺得掉轉？），亦更可能根本只係風險胃納。

9. 即使Bitcoin高位而家跌咗一半都好，照計對股市唔會有乜大影響。你個別咩Tesla，CoinBase，甚至Square，MicroStrategy（高位跌剩三份一）當然有影響，但其他公司，關人乜事？

10. 固然總有啲人買完會損手，但根本機構投資者就少買，亦好難用到槓杆，金融機構自己更加少。所以，點會造成咩危機？日日都有人輸錢架啦，記唔記得嗰時負油價夠話咩頁岩氣公司破產，又話中國銀行輸錢（事實），又話Interactive Broker有客走數要自己揹（事實），結果有冇事？

每日一圖— 越多ETF買股價越差？標普指數大半年都冇調整過。投資者沽Bitcoin買黃金？

11. 越多ETF買股價越差？—幾時都會有少少標題黨，但個圖訊息量好大。首先留意個Universe，係SP100，就係美國最大嘅100間公司。另外佢計2018至而家，未必係好長嘅時間。但大約見到，越多ETF持股嘅公司，股價反而係差的，有個唔太強但見到嘅負相關。原因？好多，我估最主要係因為，ETF買得嘅都係大，或者好多投資追捧嘅crowded trade．另外留意，佢有講有幾間公司冇顯示出嚟，但fit graph時有計的。仲有，你留意到，差不多隻隻都正回報，「我都唔明啲友點解買股票可以輸錢」。最後，好多細公司好細ETF持股而輸到趴街，但呢個樣本入面冇包啦。

12. 標普指數大半年都冇調整過— 類似嘅圖都貼過，但不妨再圖。首先，調整係指5%，而你見即使係極強勢嘅美股，呢10年都超過十次回調5%，根本不能避免，你點避開晒然後在跌定買返又在下一次跌之前走人？嘥氣。而另外，上次有5%調整已經係大半年前（總統大選前）。你早前3月或者上星期嗰啲，根本連5%都冇，叫晒救命嘅，到底你買咗乜股？

13. 投資者沽Bitcoin買黃金？—當然幅度唔同，但見個形狀都係似，近期有啲互相關嘅關係，Bitcoin跌時黃金就升。實不相瞞，呢個Patreon最初開時嘅call就係叫人買金。咁我當然都有買，輸錢但只係輸少少，咁當然跑輸大市，但我已經滿意，只係當買個保險，如果你係每個月買金嘅應該有得賺添。「但如果嗰時買Bitcoin當然賺到笑」

Good Read — 有70%資料就好做決定啦。點解Spotify直接上市。點解睇淡Bitcoin？

14. 有70%資料就好做決定啦—都係光頭佬啲嘢，知易行難，但拎個神髓，話你知唔使考慮到所有嘢，唔使拎晒所有資料，有70%資料已經好去做決定。問題當然係：你唔會可以量化到幾時係70%，但大約可以用時間呀，各樣嘢去量度。太輕鬆做決定會出事，但諗得太多一樣唔好：因為會浪費咗時間，特別係好多時機會就咁走咗。而做錯決定，冇你想像中咁可怕，因為好多時可以改正。

15. 點解Spotify直接上市—都係正路嘅corporate finance嘢。近年你知啲網民個個鍾意做正義使者，追捧啲Start up小朋友，就仇視邪惡華爾街。公司唔用IPO直接上市，當然好多人讚好。但根本從來都可以直接上市，華爾街投行冇拎支槍指住你個頭，點解仲只係好少公司會直接上市？呢篇由Spotify公司自己人講，當然會有啲偏頗，但講嘅理由都大路：當你唔使籌錢，而公司又夠知名度，咪可以直接上市。但，「唔使新資金點解要上市？」。因為投資者要套現。

16. 點解睇淡Bitcoin？ —亦係大路嘅嘢，但算寫得清晰，不妨又回顧下。留意同場加映仲有篇點解睇好。你問我當然覺得講「睇好」嗰篇嘅講法幾流下。但，Bitcoin嘅嘢，經常都係信者恒信，唔信繼續唔信。唔一定要跟人地提議，但幾時聽下啲唔同立場嘅觀點都係好：哪怕你聽完覺得不知所謂，都係要聽。