港股有返啲力，希望今次真係持久少少．恒指季檢難炒，但值得留意下．6月記得抽iBond！聲音同片，一齊做啦！ (Patreon)

好啦，港股有返啲力，希望今次真係持久少少

恒指季檢難炒，但值得留意下

6月記得抽iBond！

版務（唔算重要，但反正放假咪睇下）—聲音同片，一齊做啦！

好啦，港股有返啲力，希望今次真係持久少少

1. 呢排都有讀者話我好似只講美股，話自己只買港股（huh？我問佢點解）。實情順得哥情失嫂意，之前又有讀者話自己只買美股（相對地較易理解，跑贏嘛）。「咁我都客氣地提醒返，呢度有1600個讀者」，一係你好似坐小巴咁，包起晒其他人嘅年費，私有化咗我，咪任你話事。

2. 但呢陣子真係寫美股較多，可能佔咗七成。冇法，跟紅頂白，港股真係唔多爭氣。我係恨鐵不成鋼，我就原本大約係渣住一半一半，但慢慢地變咗美股六成幾—因為升得多。講美股貴講咗好多年，新興市場（唔止香港）抵買都好多年，但美股差不多繼續年年跑贏，吹咩。事實我亦講過一個最簡單原因：股票都係睇盈利睇收入增長，而中國政府明顯對啲企業（自己友喎）係冇咁友善嘅，國情不同嘛。

3. 咁但當然，之前咁多年跑贏唔代表之後都會，我講到尾都係講平衡。近期好似見到港股生猛返啲（不過，恒指入面都係主要升舊經濟股。而科指跑贏恒指係靠啲細嘢），又睇下會唔會有啲機會，咪寫返多啲。

4. 但你話買乜？我覺得都係科技股，因為其他已經冇乜好買。Re Open嘅（香港商場呀，零售股呀咁）好多已經炒晒上嚟，而反而開關依然無期。傳統啲銀行（中銀香港2388 同恒生11），亦彈返唔少。友邦1299同長江基建1038仲係好值得買嘅非科技公司，其他都冇乜

5. 所以睇嚟睇去，可能又返返去啲ATMXJ。我知，阿里巴巴9988畀人罰錢嘛，但反映咗啦，業績其實唔係咁差。另外，騰訊700仲係幾穩陣嘅公司，聽日出業績，照計有得諗？（我都持有部份）

恒指季檢難炒，但值得留意下

6. 當然仲有，星期五恒指季檢，詳情不多講，因為今次係「大改制」後第一次季檢，十分複雜。分兩樣嘢：如果你講小型股嘅，照計影響會大啲，但真係好難估邊隻會入。以前我都仲會寫文貼下，今次冇得貼，而唔好忘記估唔中有機會急跌。真係叫我貼嘅，文入面嗰堆我估平安好醫生1833同閱文772，但輸死無命賠，唔好到時跌咗10%又嚟問我點算。

7. 另外，夠膽炒入港股通嘅（有得玩），文入面有貼醫渡科技2158同心通醫療2160，同上，輸死無命賠，我甚至聽都未Q聽過心通（醫渡就聽過，因為個名令我諗起陳年韓劇），亦唔知間公司做乜。但，你要刺激嘛，叫你買Facebook買長江基建又話升得慢嘛，真難服侍。

8. （插播一句，有讀者問我有冇下一隻騰訊。講真，個心態有啲似「嚟多次沙士我實買樓」，首先機會可一不可再。另外，你2018年時騰訊咪又係450蚊跌落260，跌四成幾，十個有九個都叫晒救命又話垃圾又話股王不再又話止蝕啦，你事後睇就易，你只有渣咗放埋一邊，或者月供嗰啲人先易守到。最後，古語有云，臨淵羨魚，不如退而結網，舊年都唔少嘢一個開啦）

9. 你問我，我反而買返大股，關恒指季檢事咩？唔多關事的，甚至騰訊啲比重可能會跌（喂，絶世買入機會呀）。騰訊阿里巴巴美團3690本身都係成份股，你真係搏就諗京東9618同網易9999（我覺得搏得過）

10. 但估係個氣氛利好成個行業。講到尾，你睇長少少，兩三年，收入同利潤增長，都應該係呢啲科企跑贏其他行業。一到有風聲話監管當局「搞夠」，股價可以升好多。

6月記得抽iBond！

11. 未睇嘅可以睇下，今日（星期二）集HomeBlogger比較認真。但多數內容呢度都講過（當然係呢度讀者優先）：通脹會升，股市亦照升，揀有能力加價而又鍊住供應商同員工成本嘅公司。就會係Big Tech，奢侈品，同埋FMCG品牌。

12. 但有一樣之前未講嘅，原本想遲啲講，但怕唔記得，而家講埋。記住，記住，記住抽iBond．上次叫大家抽寫嘅嘢，今次都大約適用，你可以去睇返。截後叫你反省做乜唔抽都再寫咗篇文。

13. 簡單嚟講，全無風險，你可以執到幾舊水至幾千銀，而代價只係上網襟幾個掣，我諗唔到有乜活動更加有生產力。你真係覺得秒秒鐘幾廿萬上落，不屑執嗰幾百幾千嘅，咁當我叫你幫手，你贏到嘅錢，夠你訂一年20蚊或40蚊會員。

14. 感性啲嘅，支持政府（anyone？）嘅，辛苦晒，當派食畀你。反政府嘅，梗係拎返自己應得嘅嘢。有錢唔拎，我真係覺得過意唔去。要等幾年？唔係下話，睇舊文啦，第一日9:30分就沽走佢啦。

15. 今次同上次有乜分別？一樣「保底」2%，係主要留意個通脹預期幾唔同，照計人人都估嚟緊一兩年通脹唔止2%，即係今次隻iBond回報應該會更高。但，「你以為一定係好事」？多隻香爐多隻鬼，你當其他人傻的？而家資訊咁流通，一定會多咗人抽。固然今次金額都大咗（上次150億今次我估去到200億），但阿豬阿狗都講通脹，加上今年股市波動啲，啲友唔會好似舊年咁自大（我求其炒兩日都三成啦！），我估今次認購人數應該破紀錄？

16. 呢個故事順手話你知好老土嘅一句話：只係你啱，往往搵唔到大錢，甚至搵唔到錢。要個市場錯，你啱，然後市場之後變返啱，你先搵到大錢。Successful investing is having everyone agree with you………..later。你知通脹高有乜用？人人都知嘛，反而分薄咗。

17. 策略，唔使講，一家四口（自己搞掂你老母老豆老婆同埋仔女），齊齊抽。每手抽返5手（50000蚊）。咁玩法應該分到最多。當上次咁，你一家四口應該分到12手，應該執到三千幾銀。都係嗰句，嫌少嘅，拎去訂我20/40蚊VIP。「咁你就知唔少錢」

18. BTW，舊文有講，iBond可以係股票可以係債券，你經證券行買就會係股票，銀行買就多數係債券，差不多一定係前者好啲，後者銀行嘅價冇咁靚，因為佢都從中賺到你少少。

版務（唔算重要，但反正放假咪睇下）—聲音同片，一齊做啦！

19. 未投票嘅，可以投下，但照計都大局已定。多數讀者揀聲音only，唔係片。但因為唔係壓倒性（55 vs 45，六四比都冇），所以：我決定兩樣都做！實際點玩仲要試，但應該會係個Post有片，亦有attach audio，自己揀，各取所需。我會冇時間？「我朋友錄之嘛」，我點請佢食飯係另一回事啦。至於話睇文可以skip睇片聽聲難啲嗰啲？咁你咪當呢啲嘢冇出現過咯。

20. BTW，實情出完個poll一個鐘（我半夜三點出喎！），都見到個形勢係差不多。知唔知啟示係乜？Sampling，亦點解你見啲選舉好多時好早已經見到結果，亦係統計佬講嘅「驗血唔使驗到最後一滴」。當然一個反例係你見美國大選，民主黨忽然後勁（但唔係最尾階段），就當郵寄票有關。

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。