Disney+ 18個月已經上咗1億客，係NetFlix一半．友邦1299：泰國新業務已超過香港，但開返關後仲得了？通脹受惠股：Unilever P&G Johnson& Johnson KraftHeinz雀巢 (Patreon)

Disney+ 18個月已經上咗1億客，係NetFlix一半

友邦1299：泰國新業務已超過香港，但開返關後仲得了？

通脹受惠股：Unilever P&G Johnson& Johnson KraftHeinz雀巢

1. 真係問題天天都多，昨日直頭上唔到網（有圖為證）（而家點寫到呢篇又另一故事），所以遲咗出文。有時都覺得我嘅生活係咪出咗啲問題，成日都冇法真係「專心寫嘢」。當然亦因為埃汾太返咗工，就不能以前咁照顧晒我啲生活細節了。

2. 咁但，扯，正如我講啲CEO一樣，收得你錢，就梗係不停爆鑊不停有難關然後迎難而上啦。唔係點值咁貴？

3. Anyway，幾隻個股想寫下，頭兩隻都係已經持有嘅公司，以前亦講過。都係我認為現價可買，值得長玩嘅公司。最尾嗰堆未買，但都可以揀隻

Disney+ 18個月已經上咗1億客，係NetFlix一半

4. 首先講迪士尼，出咗業績，市場反應係差嘅，股價要跌，留意星期五美股仲係大升市。盈利就遠勝預期嘅，每股盈利0.79，街估0.27（美金，下同）。但收入就低過預期，156億，街估159億。而亦係連續四季數入負增長，不過過去12個月股價就升咗70%。（留意，舊年呢個時間就封晒城，之後基數會好低），今年就曾經係威係勢，近期麻麻

5. 咁但其實大家都未必最關心呢啲嘢，最關心佢嘅串流（BTW，點解有啲公司未必睇收入同盈利就好高嘅學問，有時仲係公司成功引導大家）。Disney +客量麻麻地，低過預期。而家係1.04億付費用戶，街估1.09 億。新增方面，上季上客係870萬，同再上季2120萬爭好遠。不過公司話一早預咗，「唔覺得意外」（可能只係呃你），依然維持2024年上客去到2.3 -2.6億戶嘅目標

6. 另外，個每月ARPU（Average revenue per user）跌30%，去到4蚊。因為當中有唔少係 Disney+ Hotstar，印度嘢（印尼馬拉都有）。唔計就呢舊就5.6

7. 留意，呢個ARPU仲係好低，NetFlix講緊10蚊樓上。咁固然迪士尼係以平取勝，但有冇加價空間？我估有，應該話兩間都有。我呢排睇多咗戲，成日諗個問題：睇場戲都成舊水，你一家大細貴戲院大戲真係六七舊水落樓。咁一個月NetFlix先10蚊美金，something is wrong．

8. 同時間，迪士尼係平，但上客速度之快嚇死你。知唔知Netflix幾多訂戶？都不過係2億，迪士尼已經係佢一半—而佢地搞串流只係一年半。

9. 而講返迪士尼，唔使講都知，佢啲片咪佢個串流嘅殺著，應該點都唔會畀NetFlix，咁大家兩個台裝晒佢地咪最開心。其實之前都寫過文，應該係兩間共存嘅局面（拿！環環相扣呀！），其他公司就…..。

10. 其他業務，就冇乜好提，但當然係向好嘅方向發展。樂園梗係唔得，但全部都已經開返（除咗巴黎），咁當然冇咁多人，拍戲方面亦係冇乜，唯一就係上咗套《浪跡天地》NomadLand，冇錯係奧斯卡最佳影片，但FB都寫過（環環相扣呀！記住睇埋FB），而家你拎呢啲獎，對票房幫助極少。專心拍多幾套超級英雄片啦。

友邦1299：泰國新業務已超過香港，但開返關後仲得了？

11. 另外，也是業績，友邦1299，很重要，因為係少數好嘅港股。另外留意下，今日差不多全部講舊經濟股—唔係新經濟唔好，之前寫足成個星期FAAMG業績添，而係，平衡呀！

12. 業績就不細講好多，反正要解咩係「新業務價值」都要搵精算師，但扯，邊位係識砌電動車先買Tesla？兩樣嘢嚟的。否則啲車房仔（all due respect）變晒股神啦。

13. 咁你見，新業務價值升19%，市場就預升10%。夠架啦，知業績好就夠了，股價又即彈。你見今年都係浮浮沉沉，但呢啲公司唔怕逢低買，可以長玩長有。

14. 仲有睇下啲地區，留意公司唔止做香港，而香港以外嘅地區，新業務價值全部都高過疫情之前。咁當然係香港拖後腿，因為封咗關冇大陸人嚟簽單嘛，但同迪士尼情況一樣，之後就變晒低基數，同埋一開返關就不得了。亦正因為香港靜晒，而家泰國已經超過咗香港，成為第二大市場。

15. 順手講埋，佢最大貢獻嘅，就係大陸市場，就真係在大陸做，唔係嚟香港簽嗰啲，而基於歷史原因，友邦係極少數可以在大陸獨資做嘅外資保險公司。

16. 咁你見到，除咗係舊經濟股，仲要係某程度上分散到啲地理風險，香港又有啲大陸又有啲東南亞都有。一般人嘅其他倉位，都係只得中國美國嘅。

通脹受惠股：Unilever P&G Johnson& Johnson KraftHeinz雀巢

17. 最後，通脹當然係大課題。投資者之前話擔心通脹，令美股所謂「急跌」嘛。咁你心思細密啲嘅，都知要分開問：首先，通脹係咪會真係升？真係升，又係咪會拖低股市？今日（星期一）明報會有篇文，畀個題目你得了：通脹繼續升，股市繼續升，就係我嘅結論。

18. 呢啲大課題當然遲下再寫文講有乜受惠股（都唔易），但講到尾兩樣嘢：公司係咪可以將成本轉嫁用戶（加價能力）？同埋，人工同原材料成本會唔會勒死公司（鍊價能力）？

19. 早前講通脹嘅文（拿！環環相扣呀！）已提過FAAMG 應該兩樣都有。同樣地，奢侈品亦都有。而大佬，當然講頂級嗰啲，所以咪話咗買愛馬士同LVMH。但呢啲股嘅問題係，估值冇乜點平過。

20. 咁仲有乜？建議大家睇黃國英嘅文（地球post，唔怕cap）。前半講少少心法，但後半先重點。佢就係講消費品牌。高端嘅我樓上講咗，但低端嘅呢？佢有講民生嗰啲，即係consumer staples，FMCG（Fast moving Consumer Good）

21. 咁係乜呀？平時我少推的（不過經濟一周年頭我講今年心水反而提咗），亦都好似冇乜買，但都講下。照計你都耳熟能詳，全部都味將軍美心多品牌經營，唔知係乜嘅，自己上維基睇人地有乜品牌，

22. 大路嘅，幾間班霸，有歐洲有美國公司，但照計多數都美股買到（除咗雀巢，好似ADR）。例如有聯合利華Uniliver，P&G，KraftHeinz，Johnson and Johnson，同Nestle雀巢

23. 細講就未有時間，但聯合利華呢，講英國價值股提過（但冇推），早排仲話大手回購（又係呢招）。KraftHeinz之前一直都幾多問題，搏唔搏隨你，我就應該唔會。Johnson and Johnson就多疫苗嘢，成日彈上彈落。

24. 但最重要係，呢堆東西，全部都唔係話十分離地估值，今年亦唔係話升得好多的。

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。