已推出Patreon Summary．遲下有聲音版/影片版．Bitcoin嘅嘢．JP Morgan又新高。加密貨幣市值大過流通法幣。十個製造業大國。 Pixar 如何用顏色操弄你情緒。日本高鐵如何淘空小城市。蘋果出事東方最快報。鄧成波個仔。新馬仔個仔鄧兆尊。 (Patreon)

小版務兩個（都重要的）— 已推出Patreon Summary．遲下有聲音版/影片版

快評幾句— Bitcoin嘅嘢……

大師冇點你—JP Morgan又新高

每日一圖— 加密貨幣市值大過流通法幣。十個製造業大國

Good Read — Pixar 如何用顏色操弄你情緒。日本高鐵如何淘空小城市

FB Post Summary —  蘋果出事東方最快報。鄧成波個仔。新馬仔個仔鄧兆尊。

1. 拿，上得返網啦，即時不偷懶。今次有段版務，所以較長，而且都重要，所以放前。

小版務兩個— 已推出Patreon Summary．就快會出聲音版/影片版

2. 而家你見我出完Patreon文，都會Facebook Page同Instagram（@ivanliresearch）（你唔係未follow下話？！）寫段summary．當然係為咗吸啲新讀者。以前都有，但以前只係template copy and paste 一段，而家我係寫完正文再即時打段summary．似乎效用較好。咁對於現有讀者，個好處當然係你可以好快知道我篇文寫乜，可以決定即時睇定遲下睇全文。我估有用。

3. 會唔會對啲現有讀者唔公平？照計唔會。雖然段summary有時都成千字，但畢竟都係大濃縮，加上冇圖冇link冇細節，學唔到嘢的。

4. 第二，以前都講過，而家差不多真搞。有啲讀者都未必鍾意睇咁多字，或者未必方便睇字。咁我決定搞一個聲音版或影片版（只會是但做一個，但影版版其實包埋聲音版，下面解）。唔係由我讀啦，亦可惜冇可愛女聲讀，由我嘅最好朋友（一個佬）去讀。留意唔會照字讀（否則我搵機械人軟件得），而係佢會演繹。

5. 影片版又點？都差不多，好似我以前Homeblogger啲收費短片咁（上面個圖），呀佬朋友會演繹篇文，但在電腦碌住我篇文落，開埋圖呀link呀咁，段片cap佢desktop，佢老哥個樣在一角。你睇到就係上面張圖。

6. 咁你話，影片版咪即係包埋聲音版有嘅嘢咯。係丫，你問我就梗係影片版，但，考慮到大家嘅Data用量嘛。你唔要文字版嘅，好可能係坐車聽，唔係用WiFi

7. 所以好簡單，你地決定，去投票吧，我會搞個Poll（唔使在呢度投或者PM我了）

8. 另外，人力物力時間嘛，所以額外收費的。玩法就係20美金VIP嘅就有，想要呢個聲音版／影片版嘅咪upgrade，覺得搵笨咪照舊，我好均真的。而現有啲20同40蚊VIP？當然自動享有呢個新玩意了。希望6月行到，唔得就7月

快評幾句— Bitcoin嘅嘢……

9. 今日唔講股市，講Bitcoin，上面寫得較長，所以真係快寫．唔知成個故事嘅，可以睇文。好快講：先係Tesla話收Bitcoin，自己買埋一份，Bitcoin價狂升。然後出業績話你知沽咗啲。再之後忽然間Tesla話唔收，話唔環保（哈哈，今日先知？），Bitcoin價插水，仲要Tesla疑似已經沽咗啲（後來又話冇，到時就知）。

10. 合唔合法？應該合法。其實就算係股票都未必犯法，何況係自由aka冇王管嘅Bitcoin。賤唔賤格？不重要，呢個Patreon一般唔理呢啲咁意識形態嘅嘢，況且一樣大把人維護佢

11. 我只關心係投資上嘅implication．雖然Bitcoin 2018年打柴後仲有得再大升，絶對令我估唔到。但我最初質疑嘅嘢，結果都真係出現。既然你忽然間可以有第二隻狗狗幣又話好過Bitcoin，咁你隻嘢有幾獨特？點解會值錢？

12. 至於在你同我嘅影響，眾所周知我買咗啲BTCC.B，當然輸錢，點都有兩三成。但，最緊要你知道自己做咗乜。我買嗰時已經講明，預會輸晒，當係個option，just in case 佢成功，但我係估佢會失敗的。咁因為佔我組合比例唔多，輸晒咪輸晒—但如果你廿萬身家去買十萬甚至買廿萬，就另一回事。呢個又係好好嘅例子，教你去分散，同埋控制你嘅注碼。

大師冇點你—JP Morgan又新高

13. 呢隻都真係成日講，冇事後孔明。亦係我唯一一隻渣嘅美資銀行股—當然我有VISA同Paypal，但冇其他美資銀行或保險公司，香港就有啲，歷史原因，亦都係為分散。

14. 但的確銀行係冇乜前途的。你睇圖，雖然美國金融股（冇細睇，應包埋保險，甚至VISA）升穿咗2007年高位。但，估值係不停咁跌。不過留意呢個估值係相對估值，相對於標普指數，未必係自己嘅估值跌（雖然我都相信係有呢個因素），亦部份因為其他嘢（科技股）估值升。

每日一圖— 加密貨幣市值大過流通法幣。十個製造業大國

15. 加密貨幣市值大過流通法幣—其實冇乜意義，你可以話係反面教材。點解係同「流通法幣」嘅金額比？而唔係股市，或者存款？你平時會唔會聽人講「歐元市值幾多」或者「澳元市值幾多」？

16. 十個製造業大國—幾有趣，當遊戲玩都得，我嘅演繹都未必啱。不過又係留意度乜，係度value added。所以唔同「出口」，而GDP就計value add，同時亦應該知道中國嘅東西value added 不算太高，例如整一部iPhone，出口金額就成部電話，但計落GDP只係value add，可能只係一百幾十蚊。留意下，即使咁計，都仲係中國最多。但美國都有第二，應該因為個value add相當高。日本韓國德國都係某啲產品嘅出口大國，然後你見人口多N倍嘅印度並冇特別高。更加得意係，越南呢？人口多，又話啲出口去晒越南，但十大都冇影。你可以研究下點解，相信都係value add嘅問題。

Good Read — Pixar 如何用顏色操弄你情緒。日本高鐵如何淘空小城市

17. 兩篇都有啲深，十分好學嘅咪睇下。

18. Pixar 如何用顏色操弄你情緒— 點解Pixar啲片咁收得？故事好？固然。但做乜咁感動？除咗故事好音樂好對白好，仲有啲顏色全部背後都計過度過，完全係精準計算（BTW，唔好高估你啲獨立思考）。背後全部係學問，同埋錢。仲有，之後嘅玩法，係會用啲「你自己都睇唔到或唔知睇咗嘅顏色」去影響你。都幾恐怖。諗起啲潛意識廣告咁，例如會有啲一閃而過嘅字，你都唔知出現過，但植入你個腦。N年前布殊就在廣告抹黑戈爾，閃個RAT字。留意唔少國家都禁呢啲廣告。BTW，Pixar嘅母公司，正係迪士尼，梗係要買。

19. 日本高鐵如何淘空小城市—都係悶嘅課題，但因為講日本應該多人有興趣。佢以日本為例，咁大家都知，中途站啲政客，一定希望啲高鐵（日本就係新幹線）停自己城市，講帶嚟商機製造就業咁。但實情係咪？往往相反。首先呢啲往往係利益輸送，有時無啦啦要兜路去啲細站，就係因為係重要選區（呢個例子係田中角榮）。你亦可以睇埋「日本列島改造論」（亦係田中角榮），原本希望通過鐵路，振興啲鄉下地方。結果就係剛好反效果：交通方便咗，以前啲去唔到大城市嘅人都走埋去大城市，鄉下地方更加空洞，大城市更加擠迫。基本上亞洲絶大多數地方（中國台灣日本韓國泰國越南菲律賓）都面對呢種問題

FB Post Summary —  蘋果出事東方最快報。鄧成波個仔。新馬仔個仔鄧兆尊。

20. 真係大鑊，近排啲FB文收視好好，仲要一篇比一篇好。我不如轉行寫八卦新聞算。雖然我寫嗰時都知多人睇，但估唔到反差咁多

21. 蘋果出事東方最快報—寫嗰時只係知台灣蘋果日報唔出紙版，未知凍結黎智英嗰部份。但留意，真係東方仲報得快過蘋果自己。然後篇文我寫咗一啲我對媒體嘅觀察，以及新趨勢，唔止紙媒難做，網媒都好難做，成個生態會碎片化。同時仲寫埋台灣報紙嘅亂象。

22. 鄧成波個仔—寫死人嘢都係敏感，我都寫得小心啲。但大家心入面都係諗，波叔真係個仔累死，臨老過唔到世。然後話你知，人就係冇嗰樣想嗰樣（你同我都係），窮人想發達，有錢人想人地真心鍾意佢唔係貪佢啲錢，富二代就當然要追夢證明自己。咁就易出事啦。去花天酒地不事生產呢，其實好難敗到老豆副身家。搞生意就會啦

23. 新馬仔個仔鄧兆尊—承接上篇，正面例子當然係鄧兆尊。講錢，佢老豆應該唔會多過波叔。但佢就好在冇乜大志，唔會又搞生意又做娛樂大亨，慳慳地就一拖三，精神面貌不知幾好。呢啲先係快活人生。

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。