［驚？我嚇大架！］本輪所謂調整嘅教訓。四千字心法長文 (Patreon)

點解我驚都驚冇過？

今次小調整嘅教訓—睇長線。唔好成日睇股票。寫Trade Log

Stay invested，每個月有錢就去買股票。好過你捉高低位

止蝕overrated（但仲有少少用），止賺完全搞笑

睇埋其他指標：美匯，美債債息，VIX

美股一年平均回報有幾多？你應該有乜期望？（送埋隻Excel你玩）

一年15%已經好盡，多數基金經理甚至都做唔到。咁，你係邊位？

我一年目標回報幾多？問錯問題了。出海打魚嘅嘢，邊到你決定

1. 小小節目調動。呢篇類似號外，原本星期六出。今日送咗畀你先。至於原本星期四（幾個故事嗰款）星期五（有Good Read嗰款）嘅文，都會週末寫埋。另外仲有篇講Charlie Bilello嘅「高估值點算好」，都應該會週末整埋。

2. 好亂？咁總之你都係見到有齊咁多篇文啦。信我，忽然調動係為你好的。寫足4千字呀！

點解我驚都驚冇過？

3. 點解我冇驚過？因為我係一個樂觀嘅人，況且股票長線係升嘅。

4. 你都唔使再睇埋其他嗰三千字。

5. OK，正經啲。好簡單，至少因為我經驗夠，見過咩叫真股災，你呢啲咩3日跌4%真係唔好拎出嚟講。但我亦唔係特別年老，明明大家都見過舊年3月啲慘況。所以亦要講，因為我有記住以往嘅事，有由錯誤中學習，唔止係望住呢一刻。

6. 實情咁耐以嚟（咁梗係計我買股票以嚟啦，2004年，冇你想像中咁早），我稱得上好驚嘅，只得兩次，一次係2008，一次係2020。冇了。亦係呢啲可以上到報紙N年後都會做專題嘅市，先會令我驚。

今次小調整嘅教訓—睇長線。唔好成日睇股票。寫Trade Log

7. 教訓？都可以比幾個你。首先，我係個睇長線嘅人。而你真係唔使成日望住個市。我嘅工作就要，你好可能唔使。拉長少少睇，件事已經唔同晒。你如果一個星期先睇一次？你會見到今個星期只係跌些少。拉到一個月？你發現根本只係返返去上個月嘅位。有乜問題？拉到年頭到而家嘅？扯，我贏緊超過10%呀。達晒標！（下面會詳解）。咩話？年頭你冇貨3月先仆入去？咁當然要檢討下。

8. 另外都提過，我寫trade log。講到好似煞有介事咁，好似我呢啲本身成日寫嘅嘢有優勢，但冇人要你真係寫篇文分析乜鬼。總之你係紀錄低，你買股票，賣股票，嗰刻諗乜。咁第時再檢討下就得。可以就咁錄段音，或者Instagram 寫兩句都得。例如：「仆街啦，今次世紀疫症，唔知跌到幾時，沽晒啲股票先」已經好夠。如果你嫌成日要紀錄太煩嘅，咁又可以諗諗：你係咪Trade得太多

Stay invested，每個月有錢就去買股票。好過你捉高低位

9. 另外，亦係一句，stay invested．早兩日甚至有讀者想撈底，我都冇特別叫佢。咁你撈到嘅你好嘢。但根本唔使做到咁準，我只要唔好在低位打靶震騰騰沽走，就已經好夠。記住，同2020年3月一樣。我唔使識撈底，我冇低位沽已經夠

10. 止乜鬼蝕？你早兩日止咗蝕嘅，又好後悔了。當然有時啲股票太鑊嘅，咁你話好似WISH咁，我輸兩成日沽咗，咪唔使好似而家咁（我都仲渣住）。理論上係，但又可能會錯過好公司。於是你發現了，講到尾睇間公司得唔得。有時係事後先知，但講真，當時買WISH都知間公司流流地，純係貪心。所以你事後的確可以話呢隻應該止蝕的。但，真係咁易一早分到？你見好多公司好公司都高位跌兩成啦。所以我係用另一個方法：我贏嘅股票夠貼呢啲輸嘅東西。而又講真，唔想玩呢啲嘅，就不如買指數咯 — 你好少會個指數都 隻隻死晒一沉不起的。

止蝕overrated（但仲有少少用），止賺完全搞笑

11. 當然了，止蝕都仲有一定作用（真的，事後諗，WISH呢啲都係想鬥傻，擺明我都唔多信間公司）。更罪無可恕嘅係走去止賺，真係切記唔好。當然我都知有啲公司可能你買完升一倍，然後唔走，之後跌返原位甚至仲要輸。但，一般嚟講，好嘅公司係唔應該會咁嘅。

12. 另外，我到而家都成日表達唔到「每月投資」嘅意思。呢個唔一定係月供，但我意思就係：如果係普通打工仔，個個月尾出糧嘅，咁理論上可能個個月有啲錢剩，咪拎晒去買股票咯。你不一定要個個月買同一隻嘅，我以前試過ABCD ABCD咁買。但始終重點係，嗰個月係買股票嘅錢，咪拎去買。股災？照買。好貴？一樣買。

睇埋其他指標：美匯，美債債息，VIX

13. 同時間，只講今次嘅小調整（好似5%都未到），點解真係唔驚？你亦可以睇埋其他指標。

14. 你睇，債息係升，但都冇突破之前嘅高位，市場係咪真係驚通脹？（但留意，十分弔詭，理論上，唔計咩通唔通脹，當避險意識厚呢，債息應該跌—人人買債嘛，搶高債價，而債價同債息係相反關係）（更頭痕嘅係，普通避險就係唔要股票，買債，債價高，債息低。但到最驚恐呢，就債都唔買，掉出街，2008同2020就有呢啲情況）

15. 咁又同樣地，睇多個指標，你見美匯指數，升少少，但同之前啲位畀真係爭好遠。個市場有幾恐慌？

16. 最後，好多人都知，睇埋VIX，係搶高少少。但真係唔係咩大災難

17. 留意我啲圖全部都用year to date，幫你拉長少少。甚至都唔好同舊年3月比（太極端了），就算只係在今年計，剛剛呢啲震幅都係濕濕碎啫

美股一年回報有幾多？你應該有乜期望？

18. 然後真係最後（但呢部份幾長），當然人人想贏錢，贏得多好開心添。但，be realistic．你可以睇下美股過去N年，一年有幾多升幅。或者睇下啲咩傳奇投資者，一年有幾多回報。

19. BTW，當然係geometric mean，Compound annual growth rate（CAGR）．第一年100%，第二年-50%，咁你嘅回報係  （1+100%）*（1-50%）再開平方根，再治一。即係0。事實即係你個倉100萬變200萬再變返100萬。千萬唔好走去100 +（-50）除2．唔好笑，好多人都係咁。只係兩年我仲要畀咁極端嘅數你當然識笑，但計10年好多人都係加埋晒除10，是錯的。

20. 唔識計嘅，Excel幫到你。我送埋畀你，睇晒最近廿幾年嘅美股（標指）回報，但不再一一細解點計，相信讀者自己明。

21. 咁，真係好視乎你由邊年計起（係好大分別，啲理財撚就係咁忽悠你），為免煩我就當而家係2021年剛剛1月1號，OK？咁過去一年回報（2020），係18.4%。兩年（2019 2020），係（1+18.4%）*（1+31.5%）再開方再減一，即係24.8%

22. 好了，其他就Left as an exercise to the reader。直接睇製成品，Column G．睇一年嘅平均回報，18.4%。睇兩年嘅每年平均回報，24.8%。咁當然任你睇幾多年。打後全部有。（BTW，我係識用”PRODUCT”的，但我將呢舊嘢變到任何普通人都識睇）

23. 「然後不如我地將呢堆嘢再算術平均」，G嗰堆嘅嘢平均，就係12.4%。咁你話唔睇咁多個G嘅，睇少一兩年嘅，有埋其他數，自己玩，Column I．

24. 撚咗一大輪，咪話你知，G嗰堆數嘅平均，12.4%。拉少幾年可能高啲。因為美股近十年升得勁，而對上一次真股災係2008年（2020年都算，但好快收復晒，睇年回報睇唔到）。

25. 重點係，我想你接受嘅係：一年15%回報，已經好誇張。講到咁強嘅美股，都係咁上下，more or less．

26. 15%回報亦即係大約5年一個開，10年可以4倍。30年就64倍- 呢個我估亦係比較合理嘅投資年期（你以為係三個月？）。我當你30-35歲開始有啲錢碌到，然後投資到60-65歲左右。64倍，10萬變640萬

27. 類似嘅東西你應該聽啲保險佬sell 你都聽過，複利的威力，rule of 72．「問題係佢畀你啲紅利5%都冇」。我地Back test 返，30年前嘅標指，300-400點。而家先4000點，喂，邊有咁多倍？10倍咋喎。恒指呢？哈，一樣，30年前3000點，而家30000。又係10倍咋喎

28. What went wrong？就係，根本上面講嘅15%，都係極進取了。你睇返98年到而家嘅CAGR，只係8%左右（Column G最低嗰格）。一年8%，正係30年10倍。

29. 不寫太長，但首先你見到，8%同15%，拉長嚟講差天共地。但又記住，8-10%回報似乎係比較合理嘅（近年美股明顯唔止，可能因為印錢）。而最後記住，你真係要由頭坐到尾先拎到呢8-10%一年嘅回報。而我再講一次，你100萬身家拎5萬買股票贏一個double，你嘅回報係10%，唔係100%。

30. 咁你睇返，即使係今年，美股到而家都好似唔止10%。舊年更不用講。即係個市冇欠你乜，呢個回報甚至比歷史正常仲要好啲。怪就只怪你唔買得大。真的，我成副身家滾10%（樂觀但不算太超現實）玩三十年，好過你只係拎幾皮嘢扑中隻升幾倍嘅嘢（然後仲要其他嘢輸錢）

一年15%已經好盡，多數基金經理甚至都做唔到。咁，你係邊位？

31. 大約係咁，「咪又換個方法講差不多嘅嘢」。中途都寫得有啲亂，並唔係我寫得最好嘅文。但始終記住重點：你嘅「預期期望」，應該合理少少。你話8%太令人傷心，你覺得可以有15%，相當進取，我都唔會笑你，近年真係得。但你話可以一年20%嘅嘅，就太過火了。

32. BTW，呢類東西，亦可以幫你過濾好多騙局。美股都只係一年15%（相當進取），咁更高嘅東西，你冒緊乜風險？

33. 或者最後換個角度睇，大市都不過係一年15%（極進取了），而你又記得，多數基金經理仲要係跑輸大市。咁即係，咁專業嘅基金經理（部份呃飯食，但整體應該都叻過普通人啩？），都只係15%唔到 —點解你覺得你可以超過？

我一年目標回報幾多？問錯問題了。出海打魚嘅嘢，邊到你決定

34. 最後一句，都有讀者問我，有冇咩目標一年要幾多回報。甚至有問勞蘇基金（未死的，詳情呢度，有興趣PM我，似乎今年有機會搞得掂）目標回報幾多。只能答你，你問錯問題了。

35. 好不負責任咁答，當然係越高越好。但我嘅比喻係出海打魚，邊到你自己決定？2008嗰啲咁嘅市，我點目標回報？係咁跌，咁我要點先拎到個目標？掉轉頭，2020年咁升法，唔通我夠目標就沽晒佢變cash？

36. 我發現都幾多連登仔，或想「全職炒股」嘅人，都有呢個習慣，會問「100萬本，想每個月賺2萬生活費，現唔現實？」。首先，24%現唔現實，上面答咗你。但另外，即使你調低咗，都係唔多現實。唔係咁運作的。嗰個月搵唔夠2萬咁你點？賭大啲？

37. 不過弔詭嘅係。同我好熟嘅，可能聽過我自己有個目標，就係一個月要有30個新讀者（扣除退訂嘅）。亦可能有人聽過，村上春樹寫文，每日規定寫幾多頁。唔夠都一定要完成，就算好興奮亦不能多寫。

38. 有乜分別？就係，大佬，你控制件事，定件事控制你嘛。村上春樹當然可以控制寫幾多頁。我控制唔到幾多讀者，但我可以谷廣告，而多過30個我亦唔會收手。仲有，寫多幾頁要付出多啲嘢，谷多啲讀者都要付出。但投資，時來運到，你賺10%，同賺100%，出嘅力往往一樣。

39. 比較realistic嘅反而係，「例如你畀自己一個小目標」。好戲劇嘅嗰啲「40歲之前我要有XXX萬」，反而唔離地（當然，你唔好38歲先嚟講）。你project 自己收入，同埋長期投資回報咯。

40. 或者簡單啲嘅，同昨日篇文講差不多。你咪定期比較下，自己同各項指數比較，成績如何。記住第29段講嘅嘢喎。如果長期跑輸指數好多嘅，咁勸你都係買指數基金，或者幫襯勞蘇基金。

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。