ivanliresearch

柳暗花明又一村．你個倉蒸發咗幾多？拎去同指數比下．估下Yahoo有幾多market share？FAAMG似乎仍有點貴．股市高估值我可以點？提升投資自我修養的3件事．太古和其他的時間 (Patreon)

Published:

2021-05-13 20:08:14

Edited:

2021-05-13 20:19:15

Imported:

2021-07

Content

快評幾句— 柳暗花明又一村

大師冇點你—你個倉蒸發咗幾多？拎去同指數比下

每日一圖— 估下Yahoo有幾多market share？FAAMG似乎仍有點貴

Good Read — 股市高估值我可以點？提升投資自我修養的3件事

FB Post Summary — 太古和其他的時間

1. 算係忙完各樣嘢，傾咗好多（所以去到太古城），但，真係永無止境，傾完，就去實行了。當然唔係投訴抱怨，講到尾都係幸福嘅。雖然最幸福都係舊年8月至今年3月呢半年，又返住康宏，又有Patreon．我都係個鍾意懷緬當年嘅人，但始終要move on（而我亦好早開始將呢啲想當年嘅嘢拎嚟寫文，例如今日篇FB Post Summary）

2. 十分感激大家。

3. 又，今日嘅每日一圖同Good Read依然正點，特別係兩個圖。

BTW，而家多數打完篇文我都會打段 summary．你可以在我Facebook Page (ivanliresearch) 或 Instagram (@ivanliresearch) 見到。

快評幾句— 柳暗花明又一村

4. 真的，why bother？昨日寫咗篇教你應對股災點算好，但根本係平時心法嘢，而其實，甚至都唔係股災。固然你可以質疑點解係5/10/20，但即管用返比較常見嘅講法：5%係pull back，10%係correction，20%係bear market．咁我地而家在邊？

5. 即使未計今晚（星期四晚）嘅小反彈，呢輪（不過係三日）嘅跌浪，道指跌5%唔夠，標指4%，納指8%。咁呢啲幅度，根本正常過正常。你可以又翻睇Charlie Bilello 嘅文。今次回調，甚至唔會在個表出現，5%都未夠。（納指就有）。

6. 更不用講嘅係，老細，而家先5月，但年初至今，道指同標指都仲升緊差不多10%（納指少啲，仲有得升）。咁你都唔滿意？「除非你全部係頂位時買咯」「但我冇叫過你」

7. 港股嘅，就冇咁過癮。恒指國指高位都跌10%咁滯，科指更加係跌30%。誇張。

8. 唔知大家買乜股，可能港美比例人人唔同。咁你自己睇下，你嘅美股持倉較高位蒸發咗幾多，港股亦係。十分粗略嘅計法，美股嘅，你持倉應該較高位蒸發5-10%。港股嘅，應該高位跌咗15-25%左右。拉勻嘅，大約高位你跌咗10-20%。我本人？就梗係冇10%。

9. 但你唔使同我鬥，亦可能我好彩，或者係我膽細，升嗰時唔夠閣下彈得多。重點係，如果你自己嘅倉位，高位蒸發超過20%，甚至去到三四成嘅，就真係檢討下，到底自己買咗乜，或者幾時買，買咗幾多。

10. 當然冒險不一定係錯，但如果你已經好苦惱嘅，咪證明你冒唔到咁嘅險咯。我買嘅BTCC一樣高位蒸發兩三成。隻WISH（不要提了）都有讀者有買，跌到七彩（我都有買，一齊輸）—但我唔係拎好多錢去買呢啲嘛！

11. 遲下希望寫篇「投資必勝法」（大意），唔想太廢太虛無，但又真係人人不同。我希望幫到「最大多數人」。你當好似早餐A咁，希望Fit到最大多數人嘅情況。

每日一圖— 估下Yahoo有幾多market share？FAAMG似乎仍有點貴

12. 估下Yahoo有幾多market share？—少少標題黨。但故事係由Verizon（你當係美國數碼通啦）賣Yahoo開始講。唔少人以為Yahoo香咗，「咁都仲有人買」？但，你當對家低能？幾多評論都認為Verizon賣得太平。Yahoo值乜錢？都話再垃圾都有個價。何況，你留意下，佢在digital marketing嘅market share，同 Google Facebook比得啖笑，但，大過咩LinkedIn Twitter Snapchat. 實情Yahoo嘅MAU（每月活躍用家）你知唔知有幾多？有……9億！

13. FAAMG似乎仍有點貴—真係是日好圖。「我早啲見到就好」。眾所周知，過去幾年好大段時間，FAAMG升極都有。而我亦話你知，啲增長仲係好勁。但似乎我都仲係有個盲點：有幾勁先？都真係好勁丫，但，個股價都係脫咗節的，升得快過啲盈利好多。你睇歷嚟標指最大5間公司市值佔成個指數市值嘅比例，同埋佢地盈利佔成個指數盈利嘅比例，大約係同步的。呢個圖訊息量好多，留意FAAMG雖然話霸王，但，你睇佔成個指數盈利，都未及八十年代啲銀行同石油。當然，亦多得亞馬遜係唔太賺錢嘅一間公司。但仲有，個圖其實一路係講標普指數最大嘅5間公司，而家當然係FAAMG，但當年就唔係啦。

Good Read — 股市高估值我可以點？提升投資自我修養的3件事

今日兩篇都完全貼題，講返投資。

14. 股市高估值我可以點？ — What Can You Do About High Valuations？應該我週末會寫一篇，但你可以睇住原文先。Charlie Bilello嘅文真係好。留意佢篇文星期一寫的，當時都未大跌。美股估值明顯好貴（覺得估值唔重要嘅，祝你好運），咁你可以點？篇文有講。但冇心機睇嘅，一個字：分散。其實同我一路叫你嘅差不多。

15. 提升投資自我修養的3件事— 一般少分享經濟日報上面嘅呢啲文，好多都太虛幻。但，呢篇比較好。當然，唔少同我講嘅都相似。但反而有趣係第一點：你唔使做分析員咁驗屍（亦冇必要），亦唔使係咩行業專家（早兩日節目都有講：如果唔識車就唔可以講車股，咁車房仔發晒達啦）。但至少你最好知道，間公司點賺錢，有乜威脅，佢嘅競爭優勢在邊（所謂的護城河）