美股跌乜？跌市點算好？會跌幾多？跌到幾時？咩位撈貨？買乜好？ (Patreon)

美股跌乜？

跌市點算好？會跌幾多？跌到幾時？咩位撈貨？買乜好？

心存樂觀，我就真係驚都冇驚過

舊文推介—冇不勞而獲，你比別人賺得多，因為你肯冒多啲險

小小版務（今次都重要，值得一睇）

1. 今日寫得散啲，但不長（結果又兩千幾字），應該值得睇晒。心法哲學嘢多

美股跌乜？

2. 呢個問題相對地易答啲。雖然都話所有嘢都係narrative，好多news都係fit into story，咁但又講返轉頭，咁記者往往都係問返啲「財演」或基金經理或專家（分別不大），所以都有啲參考價值，至少畀你知道「一般人」諗乜

3. 咁今次你見到，都多數人話你知，都係之前幾日嘅嘢，呢度嘅讀者唔會太陌生。金融危機？唔係。經濟差？唔係。企業盈利大幅低過預期？又唔係？政治風險？又冇。

4. 所以繼續都係講，重啟經濟，通脹重臨。特別係通脹，好多人驚不利股市。咁早排（只係上星期）納指高位震，都寫咗篇文講呢樣嘢，冇乜補充，大家可以重睇一次。簡單嚟講，通脹不利盈利？似乎又唔係。

5. 咁不利估值？就要睇下債息。但你見美債債息，似乎又冇特別抽上去。

6. 講到尾，估值都係極其重要。你估值一高，自然易升難跌，乜都好敏感。你睇台股一樣，你可以繼續講台積電天下無敵 下刪一萬字，正如一年前你講Tesla，但，升多10倍你買唔買？100倍呢？總有個價。咁你見台股一回，就回得極急。但公司咪又係嗰啲，盈利咪又係咁。

跌市點算好？會跌幾多？跌到幾時？咩位撈貨？買乜好？

7. 呢個就深少少啦。特別係第一個問題。講真，問嗰時，你自己都有答案啦。或者你期望有乜答案？跌市點算好？都冇乜點算的，難道你覺得我可以幫你托返上去？

8. 不過現實啲，我估大家問「跌市點算好」，其實你係想問：止唔止蝕／止賺好。或者係，呢段題目後面嗰四個問題，都仲係有意義嘅。正如我在金融界打滾多年，富豪（百億身家以上嘅），師奶，老人，學生，學者，基金經理，乜都見過，往往問嘅都係同一堆問題，只係用不同術語包裝—佢地一樣係想知：嚟緊個市升定跌？幾時買得？買啲乜？

9. 講到尾？不變應萬變，我一向唔主張咩止蝕止賺之類，stay in market 嘛。個個月有糧出嘅，有錢咪照買菭去，唔使time the market。但例如忽然有舊大錢嘅呢？咁都係，等下先。

10. 會跌幾多？講真，真係唔知。但如果係一個大調整嘅，就肯定未咁快。所以我覺得亦唔係咁快諗咩撈底。舊文（陣間再貼link都寫過），你睇下即使強中之強嘅美股，十年牛市都N咁多次10%嘅調整。而家？你道指早兩日先新高喎，高位跌1000點都未有就叫救命或者心雄撈底？

11. 跌到幾時？咩位撈貨？同上，唔知。但可以話你知，而家嘅估值，都唔係咩極吸引。即係例如舊年3月港股跌到24000 樓下我就話應該吸引（嗰時未開Patreon），但你而家港股嘅估值都未算好抵，美股更加唔使講，只係由好好好貴，變到好好貴。但沽咗？又唔知幾時買返。

12. 買乜好？呢個問題就最make sense，但暫時冇乜新嘢，講真嚟嚟去去講長渣嘅，美股好似都係嗰二三十隻嘢，我都不一一重覆了。但OK的，跌市時咪可以買呢啲

心存樂觀，我就真係驚都冇驚過

13. 換個角度講，我其實仲係幾樂觀，甚至覺得未會跌好多（但，未必係好事，係都唔跌，你只會不停在貴嘅位買貨）。點解？頭先講，美債債息都未急抽升，市場點睇都唔係好驚住。

14. 另外，美金仲會跌（都話環環相扣），Bitcoin之類冧都唔冧，發夢股SPCE開市跌10%收市倒升。個重點唔係SPCE Bitcoin之類本身，而係呢啲全部都係「發夢嘢」「貪婪嘢」，risky assets，風險指標，完全都未散。

15. 你睇大股大市嘅，一樣。Nasdaq昨晚（星期二）開市跌得勁，但尾市已經唔少買盤支持，好老套嗰句，你睇啲FAAMG Big Tech（週末詳細寫），增長依然好勁，頂多之前股價跑前咗啲，咁你慢慢盈利追返上，又有得玩過。但你好多公司（包括SPCE），收入都未有嘅，市順時當然照升，升得勁過普通嘢。市差時咪食瀉藥咁（你見Cathie Wood堆嘢都係咁，但人地基金大咗咁多，拎management fee同舊年嘅performance fee 已經幾世唔使做）

16. 港股嘅，一樣之嘛，你睇科指今日（星期三）即時反彈3%。港股係悶咗好耐，但勝在冇乜點升，你美股貴嘅，總有啲人諗買平啲嘅嘢。係，我知，中共搞科企乜乜乜嘛，你知，我知，全世界知，但亦總有個價。

17. 咁你見到唔止大企嘅ATMX強，就連啲細啲嘅微盟2013，恒騰136，祖龍9990，心動2400全部都有可觀升幅。一樣，重點唔係呢幾隻嘢本身仲追唔追得過，而係你見到個氣氛仲在（但又煩氣講句，未必一定好事，幾時都係屍橫遍嘢個個懷疑人生先係最好買入機會。唔知即係點？舊年3月嗰種就係）

18. 咁美股似乎仲係公司好但貴，港股係平但的確中國政府對股市唔多友善（領導人幾時會關心你輸唔輸錢？美國就真係商家富豪有啲影響力）。咁即係點？即係我話，短期港股，長期美股。唔使轉死一邊，可能一半半，或者港股四美股六（事實如果你之前幾年係一半半嘅，應該都會自然變咗港四美六，因為美股跑贏）

舊文推介

19. 另外，畀多幾篇舊文你睇。係呀，有時啲嘢一早講晒。但你再睇可能唔同體會。Charlie Bilello 嘅The Price of Admission真係好文，而我亦寫咗兩篇文（上集，同下集）去解。

20. 跌市？唔使驚。應該話，根本冇得驚，冇得避免。你估真係畀你估到頂減持然後反手造淡咩，出術就得。唔好咁貪心亦唔好咁妙想天開。你可以透過股票長升而搵到錢，正係因為你承受咗呢啲風險，係冇不勞而鑊的。點解你可以賺得畀人地多？因為你冒咗大啲嘅險。學術講法叫risk premium．你想冇風險，就係買美債，1.6%—全無懸念地必然輸錢（因為仲有通脹）。

21. 但偏偏風險呢樣嘢，化做長期就冇咁可怕。股市一日嘅回報，升跌都係可以51-49，但你拉到一年，幾年，就會變咗6/4 甚至7/3開。係透過個時間拉高贏面的，唔係掉轉。

小小版務（今次都重要，值得一睇）

22. 你見有時唔太重要我就真係叫你趕時間唔使睇。今次重要啲。遲咗出文，呢幾日忽然好有動力搞其他嘢。忙緊勞蘇基金（未死的，新讀者唔知係乜可以睇舊文，有興趣可以PM我，暫時唔使任何commitment 或負擔，don’t feel pressured）．

23. 仲有YouTube Channel《小勞蘇頻道》（可以提議下我講乜，另外可能要搵女主播，有興趣或有介紹PM）

24. 同埋可能遲下有audio版嘅Patreon，即係有人讀文你聽—不過20/40蚊會員先有（現有嘅20/40就免費送畀你）。

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。