港股頹到何時？Black Rock又新高。Twitter有契媽同Elliot增持。美股業績勝預期反而要跑輸。通脹已經幫緊美國企業賺更多錢。通脹預期好高，但現實呢？唔好Follow Your Passion。網上媒體難做之謎。Patreon估值升3倍去到40億但炒人，CEO道歉。 三國無双影評 (Patreon)

快評幾句— 港股頹到何時？

大師冇點你— Black Rock又新高。Twitter有契媽同Elliot增持

每日一圖— 美股業績勝預期反而要跑輸。通脹已經幫緊美國企業賺更多錢。通脹預期好高，但現實呢？

Good Read — 唔好Follow Your Passion。網上媒體難做之謎。Patreon估值升3倍去到40億但炒人，CEO道歉

FB Post Summary —  三國無双影評

1. 嚟到五月，歡迎各位新讀者，真係粒粒皆辛苦。今日亦係寫得較長，但埃汾啲私人問題都叫做過咗最差嘅情況，多謝大家關心。當然大家不離不棄就係最好嘅支持，財政狀況好嘅可以加碼join 20蚊或40蚊會員。 會推介畀朋友或者幫我宣傳下（特別本身係KOL嗰啲）更好。

2. 又，雖然我而家冇返工，但VIP約食飯呢個節目仲係有嘅，不過時間難啲就咁解，畀啲恒心耐性就得。

3. 而本人承諾返呢，會多啲去回返啲舊文（之前有一輪冇回了）。當然正路地你在Patreon上面DM我會比較快，so far 所有人我都覆晒的，頂多有時隔幾日。

快評幾句— 港股頹到何時？

4. 呢個都係一個好問題，但記住你去怨呀去鬧呀都唔會改變到現實，但同時間我亦唔會麻目樂觀。你見呢排好少寫港股，就真係冇乜好寫，表現都係相當頹。

5. 但更令你氣結嘅係：恒指原來4月都仲有350點升幅，1.2%。而更吹啤當然係年初至今仲要升到4.5%。講真，計平均嚟講絶對唔差，但同你感覺真係兩回事。亦係我成日講嗰句，港股垃圾？「咁你跑輸恒指甚至輸錢嗰啲朋友係乜？」

6. 不過現實亦係，美股升幅就勁得多，4月仲要係好強勁嘅一個月（同樣地，你未必覺）。亦因為咁我都寫美股多，但不代表會唔寫港股，更唔係沽晒佢，我自己暫時都係可能六七成美股三四成港股咁。

7. 順手講埋，如果你成日有呢啲「個市升但我感受唔到」嘅諗法：咁好明顯因為你啲嘢跑輸大市，當然只要你揀股就有跑贏有跑輸，但爭得太遠嘅，不妨諗下係咪太少投放於指數ETF（呢個係保證你表現唔會同大市爭太遠嘅方法，亦保證唔會周街贏錢你輸錢）

8. 之後可能會再講下點解港股頹勢，但你話大陸或香港經濟唔好咩？又唔係。真係要講可能同政治有啲關，但唔係你諗得咁表面嘅嘢。而係美國雖然有民主又向左轉blah blah blah，但始終資本主義，shareholder capitalism仲係大調，極端嘅就會話「根本乜黨都係為富人服務」（未必錯）。但中國嘅情況啦喎，明顯你公司賺唔賺到錢，甚至股民賺唔賺到錢，並非佢嘅首要考慮。國情不同，咁但講投資，就似乎搵啲友善啲嘅環境好啲。

大師冇點你— Black Rock又新高。Twitter有契媽同Elliot增持

9. 未得閒細寫，但之前見有啲留言話呀大師冇點你啲股都冇推過，或者N年前提過一次又當係。著實冤枉。咁呢啲現象總有發生，唔會話冇，但肯定唔係多數。事實你見我推嚟推去都係嗰十幾廿隻東西，而唔少都係我有渣住嘅（低調地話你知）。當然我渣咗幾多就唔會透露啦，有啲讀者要求貼個實倉，咁部份（小部份）我都貼咗，愛馬士 LVMH之類嘛，其他就睇心情睇情況。又講真，「唔係咁少錢就想睇我底牌下話」，而from day one 呢個Patreon都唔止係畀貼士或貼個倉你貼我買，有咁簡單你就發達（亦唔使要我），我亦都發達（又唔使埋你）。

10. 咁講返，BlackRock真係成日力推，不用多講。不過想講一樣嘢，將來可能細講，但早排有講資產增值稅，有個講法話其實會推晒主動基金啲錢去ETF，固然你ETF買嗰時大賺都要交稅，但主動基金仲有多一層：其他人贖回嗰時，你隻fund都會硬食稅，咁亦轉咗落其他人度。所以分分鐘對BlackRock有利。Bloomberg文。

11. 至於Twitter嘛，業績後大插，我覺得跌多咗，出完第二日（星期五晚）仲要插多一下，但低位已急彈。原因？因為Cathie Wood買，仲有另一大基金Elliot都買。夾埋都3億美金，雖則隻嘢平均一日都十幾廿億成交嘅。我估應該有個反彈吧？

每日一圖— 美股業績勝預期反而要跑輸。通脹已經幫緊美國企業賺更多錢。通脹預期好高，但現實呢？

12. 美股業績勝預期反而要跑輸—呢個可能大家都見到嘅現象，你見Microsoft Amazon 蘋果業績明明好都要跌。我之前都提過，但之前話啲統計講升跌，我話唔得全面，要睇埋個市嘛，應該計相對表現。話口未完就有，呢個真係計相對表現。你睇返史上好少會咁，佢計業績前業績後，史上差不多每次都見到業績好嘅應該跑贏大市，平均都0.5%（一日喎，好多架啦），極少會係跑輸—但，最近兩次就係咁。任你解讀，可能係估值，或者市場變得更有效率。

13. 通脹已經幫緊美國企業賺更多錢—近期熱門話題，應該可以熱返一年半載，將來都有機會出文講。咁但首先，你睇業績，基本上見到通脹係發生緊。證據你睇啲Profit margin就知，一路嘅利錢係改善緊，九成係因為加價。咁你話，人工呢？首先，好多公司而家都係scalable，生意做多咗成本唔會點升，第二，亦因為暫時勞工都未有好大議價能力。不過將來可能會改變？

14. 通脹預期好高，但現實呢？—現實係投資者嘅通脹預期都幾高，呢度嘅預期嚟自啲TIPS，你當係美版iBond，真金白銀跟通脹派彩，imply出嚟嘅通脹照計可靠過啲經濟師（or even worse，你啲網友）口講。咁你見通脹預期係咁升，係咪市場最聰明？但官方嘅PCE始終冇乜點升。咁係PCE會爆升上去？定投資者太顧慮？以前都貼過圖講，一般歷史上見到都係投資者杞人憂天多。當然不代表今次都必然係，邊有包生仔。

Good Read — 唔好Follow Your Passion。網上媒體難做之謎。Patreon估值升3倍去到40億但炒人，CEO道歉

15. 唔好Follow Your Passion—呢個主題成日講，叫人追夢相當廉價，哈哈，你追之嘛，最好你辭咗份工。就係怕有啲人聽完真係走去不惜一切去做。Passion當然重要，但有兩個好大嘅盲點：第一，你想做鍾意做，不等於你做得好，不代表有人睇有人畀錢，你夢想係唱歌但五音不全，咁關人鬼事？第二，當你嘅興趣變成工作，就點都打個大折扣—特別係你好可能開頭要面對一段冇乜收入嘅日子。Follow Passion好難駁，但實際上多數係overrated

16. 網上媒體難做之謎—原題係Scale Was the God That Failed。The Atlantic嘅文其實好好睇，但真係冇時間睇到咁多嘢。無論如何應該一個月有幾篇免費的，你應該睇到。言歸正傳，佢應該唔止講純網媒，而係講所有嘅digital publishing．難做當然係指難賺錢，難賺錢當然係指同以前比。原因好多，篇文都冇講晒，但其中一樣嘢講返以前報紙嘅競爭細好多（大家在香港可能唔覺），互聯網就打破晒地域競爭。同埋最後亦都發現即使做大，啲廣告費都係乞食，亦係供求，每個網都想去追廣告，大家鬥平。而最後只有Facebook Google 之類先最有競爭力。

17. Patreon估值升3倍去到40億但炒人，CEO道歉—其實我比較少寫Patreon（as a company）嘅嘢，可能都係刻意的，留返遲下先一次過寫。但，明顯公司過去一兩年增長好快，特別係香港。明顯生意好咗好多，早排先拎咗1.5億美金，估值亦由上一輪（舊年9月）嘅12億，升到最新40億。之但係，剛剛又炒咗36人，又唔係缺錢，都幾奇怪。純粹就話公司方向調整，舊有嘅人唔啱用咁解。作為用家（你同我），相信大家都覺得公司唔少嘢做得唔多好，但講真，又唔見得有更好選擇，可能勉強係SubStack？又睇下換完血後公司會唔會有乜改變。

FB Post Summary —  三國無双影評

18. 三國無双影評 —冇乜公共性，事忙，都冇乜寫太多文。但，呢篇文係近期爆紅嘅，都幾大鑊，因為之前啲Post都冇乜人睇，我以為係Facebook又壓低咗我個reach呀之類（每個Run FB Page嘅人都成日有嘅妄想），咁但，既然呢篇多人睇，即係冇咁嘅事，即係應該係之前啲文唔得啦，so sad．無論如何都係Patreon優先，但嗰邊嘅文都寫。亦係要大家幫手like and share，有用的。

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。