納指大跌，科指大跌。驚通脹，定加息先？兩樣唔同嘅嘢嚟喎。耶倫係鴿派？鷹派？其實主要係「膠派」。加息？有乜驚？2017年股市有冇大跌？通脹不利盈利？NetFlix加價10%你係咪唔睇先？至於人工，而家科企請幾多人？仲係以前Walmart General Motor咩 (Patreon)

納指大跌，科指大跌。驚通脹，定加息先？兩樣唔同嘅嘢嚟喎。

耶倫係鴿派？鷹派？其實主要係「膠派」。2014年佢咪出過事咯

加息？有乜驚？2017年股市有冇大跌？

通脹不利盈利？NetFlix加價10%你係咪唔睇先？

至於人工，而家科企請幾多人？仲係以前Walmart General Motor咩

納指大跌？但Black Rock 同 SPGI又新高喎。受惠通脹舊經濟股呀

1. 晏咗出，但今篇卒之有啲大啲嘅事講下。當號外都仲得呀。平時講下冧把甚至講下個股新聞甚至其他花邊嘢，大件事位就講啲心法嘢宏觀嘢嘛。但總不能日日講呢啲，正如亦不能日日講個股。

納指大跌，科指大跌。驚通脹，定加息先？兩樣唔同嘅嘢嚟喎。

2. 昨晚（星期二晚）美股科技股大瀉，納指明顯跑輸，然後你見去到今日港股（星期三）都係科技股弱勢（科指跌到3個月新低），值得一講

3. 首先股票跌有時未必有原因，畀你話我去搵到原因亦未必啱。但幾明顯地，唔係因為業績差，科技股點睇業績都好。亦唔係因為經濟數字差，點睇都好。但當然，股市幾時都同實體經濟可以好脫節，既然舊年經濟數字好似好差但股市狂升，咁到經濟好時，股市點解唔可以跌？定你以為好似做實驗咁，經濟數字好—＞公司盈利好—＞市場開心—＞股市升，咁？諗嘢唔好咁直線咁表面。當中嘅虛妄好多篇文都講過，不重覆，但至少你諗下，係咪要官方出嚟講，你先知經濟好唔好？而如果人人都知經濟好，一早就升晒啦

4. 咁大家可能都聽到有評論講，驚通脹，驚加息（留意，可以係兩樣唔同嘅嘢）。通脹可能下一節先講，但先講「加息」，做乜忽然間會加息？

5. 舊文有寫過，聯儲局幾乎講明2023年底都唔會加息（當然可以改口），但市場明顯唔信（所以啲文真係環環相扣的！）。咁首先，如果市場都真係預加息，咁而家再有人講，照計唔係意外嘅事丫，「拿，一早睇死你要加啦」。

6. 不過今次前因後果比較特別，因為係全無先兆下，耶倫忽然間話可能防止經濟過熱要加息。耶倫何許人？呢個就係最好玩嘅地方

7. 熟呢一刻時事嘅，知道佢係拜登嘅財長，老少少嘅，就知道佢係上一任聯儲局主席（現任嘅係鮑威爾，都2018年玩到而家，侵侵年代中途接手的）。

8. 咁問題嚟啦喎，做乜財長，走去評論加息？似乎就有啲失言，仲要佢係上手聯儲局主席，咁即係教鮑威爾做嘢？定公然唱反調定點？

耶倫係鴿派？鷹派？其實主要係「膠派」。2014年佢咪出過事咯

9. 耶倫任內嘅評價，都算係好嘅，不過有一點幾有趣，好多人當係佢「鴿派」（唔加息嘅就鴿dovish，進取加息就鷹hawkish，市場術語），特別係上任時。但，你見正係佢任內，美國走出咗2008年金融海嘯後嘅零息，卒之開始退市加息。（留意個圖去到2018年中，鮑威爾接手後都有加息，然後2020年爆疫，極速減到零息，直到而家）。亦正因為耶倫加息，先畀侵侵係咁鬧，話做乜奧巴馬可以享受低息而佢唔得，間接令佢離任。

10. 你問我嘅，其實聯儲局主席，未必完全可以「政治獨立」，畢竟都要總統點頭先有得做。但可能並不存在咩「個人意志」，「鷹派鴿派」之類，都係睇數字食飯。況且係成個委員會，唔係主席一言堂。伯南克（Ben Bernake耶倫再上一手，金嘯海嘯前接任，再之前嘅傳奇主席格林屍斑Alan Greenspan留低呢個計時炸彈畀佢）固然一早畀人話係Helicopter Ben直升機派錢，亦有人質疑如果唔係佢做，金融海嘯會唔會教雷曼會唔會不停印銀紙。但去到鮑威爾年代，咁樣爆單世紀疫情，根本任何人坐嗰個位都係咁做。

11. 講返耶倫，其實係「膠派」。真的，固然佢今次好快已經出嚟澄清返，但未免講嘢太唔經大腦了，不在其位不謀其政嘛，仲要唔係啲官方場合。而我話你知，根本佢剛上任時（2014）年又係整咗鑊咁嘅嘢，當時佢上任不久，記住嗰時已經零息咗5年幾，大家都想知幾時加息（係咪同而家情況好似？），當時佢話係停止擴表後「一段好長時間」，但佢再補多句，around six month．結果就震散晒市場，爆發一場小股災（當然勁過星期二晚好多）

12. 講咗咁多，無非交代前因後果，而講到尾，都真係聯儲局說了算，不在其位嘅就唔好咁多聲出了。

加息？有乜驚？2017年股市有冇大跌？

13. 而你問我？加息？yo，使乜驚先？又係嗰句，睇嘢唔好咁表面。What we talk about when we talk about 加息？乜息先？如果你講係聯儲局嘅Fed Fund Rate（即係耶倫講嗰個，亦即係佢以前可以搞，而家變咗鮑威爾搞嗰個），咁我地舊文寫過（所以！真係要長期訂長期睇！），你見股市對呢個Fed Fund Rate，冇乜特別走法的。2017年加息夠係咁升，到2018年就係咁跌。

14. 相反，睇呢度文耐少少都知，股市正路最敏感嘅，係長息，例如以10年美債為準。原理舊文都有講過下（拿，真係環環相扣！）。呢個息就主要係市場力量，大家對長期嘅通脹或經濟前景點睇，就近乎唔受聯儲局控制（當然聯儲局可以直接買債，但另一個機制了）。咁債息有冇因為耶倫講嘢而升呢？又好似冇。

通脹不利盈利？NetFlix加價10%你係咪唔睇先？

15. 於是乎，我地可以去到第二個問題。通脹。記住呀下，驚通脹同驚加息係兩回事。關於通脹將來仲會寫長文講，心急嘅可以星期六去買本經濟一週，我專欄有寫。但你問我就好簡單，通脹重臨？通脹過去十幾年甚至幾十年都冇走過，何來重臨？印咗咁多錢，你睇太古城幾錢尺，PTGF PTBF貴咗幾多，咩NFT 比特密當道，新屯門中心都賣730萬（我住屯門都咁講，新屯中又唔新，交通又唔方便），邊樣唔係通脹？所以通脹梗係一直都在。唔好畀官方嗰啲咩CPI PCE撚化你

16. 之但係，點解通脹升對股市差？個邏輯在邊？咁我地好基本講法，市值＝純利Ｘ市盈率（微觀睇就係 股價＝每股盈利Ｘ市盈率），咁你可以諗下，通脹，對而家啲公司，特別係啲科技股嘅盈利，有利定有害？提示：呢啲公司多數都唔使點請人。提示二：講到尾，all about pricing power，公司有冇能力轉嫁落去消費者（即係你）身上。咁你估下？

17. All due respect，iPhone加價5%你會唔會轉去用Oppo？Facebook廣告加價5%啲公司會唔會轉去落MeWe？NetFlix加價10%你係咪返去睇TVB？你話呢？

至於人工，而家科企請幾多人？仲係以前Walmart General Motor咩

18. 所以，通脹應該唔會對盈利負面，就算加埋人工都係咁話（況且，而家啲大公司請好少人，你估仲以前Walmart General Motor咩），當然由消費者（即係你）去負擔（所以，記得買股票）。

19. 咁公司唔會賺少咗錢（most likely 賺得更多，昨日先講過，拿，真係環環相扣！），但的確，可能對個估值，即係市盈率，有影響。

20. 但，篇文早少少咪提過，聯儲局加息，不見得會影響股市。咁好可能最後都係睇長債債息有冇升。既然係咁，唔使化簡為繁啫，我咪睇住個債息。債息唔升嘅，你通脹再升，係咪會拖低股市？我就覺得唔會啦。某程度上，通脹更加迫人買嘢保值添（不過，個前題當然係啲息口唔狂抽，如果我買美債都5厘息嘅，使鬼買你啲得3厘嘅公用股咩）

21. 拿，真係環環相扣架！（等我遲下註冊呢句嘢先）

納指大跌？但Black Rock 同 SPGI又新高喎。

22. 容許我最後貼一貼，你見即使星期二晚納指大跌都好，Black Rock 同 SPGI（拿，真係成日推呀）照樣可以創新高。正如星期三港股，長江基金1038（都算有推下）都新高，中銀香港2388同恒生11（中銀都有推下嘅，恒生就冇）都表現幾好。

23. 固然，正路地你唔會渣好多，應該都唔會補得返你科技股跌嘅錢。但就真係唔使隻隻都輸咯，有得幫補下。當然又係嗰句，升嗰時你又嫌做乜唔滿倉科技股，係，我知，買騰訊都唔夠，最好借孖展然後買騰訊輪嘛。但針冇兩頭利，3月嗰時啲讀者先叫晒救命，我講係今年3月喎！事實證明，你嘅忍痛能力，遠不如你預期。所以都係分散啲吧

24. 順手講埋，做乜Black Rock 同 SPGI咁強？一來呢兩間公司都十分scalable，收入升幾倍都唔使多好多開支。二來，你發現通脹升溫嘅擔心，反而影響科技股多啲，呢兩間算舊經濟 — 但唔係明明話科技股有加價能力？係，盈利上係，但估值太高嘛。

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。