Amazon：業績依然極勁，但明顯唔係平．Twitter：業績唔算差，但股價大插。有機會反彈的。 (Patreon)

Amazon：業績依然極勁，但明顯唔係平

Twitter：業績唔算差，但股價大插。有機會反彈的。

又到新一個月，多謝晒大家。早前有啲個人問題，已經過咗最差嘅情況。

呢篇講埋最後一隻Big Tech，Amazon嘅業績。另外講埋Twitter．遲下另外可能再整篇講晒咁多間嘅，亦都會統整晒啲數據畀你。

Amazon：業績依然極勁，但明顯唔係平

1. 想睇返前瞻嘅，呢度。留意一樣嘢，Amazon其實係疫情受惠股（人人網購），疫情下生意反而增長更快：爆疫情嘅2020第四季，收入增長只係21%，但之後兩季就去到26%同40%，並冇低基數。

2. 留意出現業績股價在盤後表現升4%，但到星期五晚高開後直頭倒跌，固然有啲見光死（但，你見Facebook又唔係咁），亦因為大市都冇乜力。

3. 每股盈利15.79（美金，下同），預期係9.54。純利已經去到81億，按年升220%（即係今季純利係舊年3倍），遠勝預期嘅48億，亦係歷嚟最賺錢嘅一季。所以邊個話疫情打擊公司盈利？至少Big tech唔係。亦因為咁賺錢，所以好難話冇空間加人工（下面會講）。

4. 不過又係，你simple annualize 返，公司17500億市值，市盈率都54倍，記得之前咩Facebook嗰啲低好多喎。當然呢個只係一個好粗略嘅指標。但，不如你諗下，Facebook今季賺錢仲多過Amazon，但市值只係佢一半喎。所以Amazon真係未必係我首選。留意Amazon預下一季純利係45-80億，即係可能不及今季添（當然公司會保守啲），而街係預70億。咁你見指引好似都算保守，不過都話公佈業績後盤後時股價係升4%的。

5. 齋講個收入，就升44%，同上季差不多，10年最勁。留意係連續78季（差不多廿年！）雙位數增長，極少公司做到。最近四季有三季都超過40%，以一間咁大嘅公司嚟講，十分神經。

6. 今季收入達到1085億，高過預期嘅1045億。收入方面公司指引第二季可以再升到去1100-1160億左右，即係可望連續三季超過1000億，街估係1086億。另外留意，公司嘅7.8% operating profit margin（operating profit/revenue）亦係歷史新高

7. 公司嘅Prime day，今年會係6月舉行，正常係7月的，舊年就疫情改咗去10月，咁當然會幫到公司第二季業績，但第四季會難睇啲了？

8. 特別要講下Amazon Web Services（AWS），留意呢部份雖然唔係佔收入好多，亦唔係增長得最快，但係相當賺錢嘅業務。收入去到135億（街估132億），按年升32%，增速係咁多年最勁。

9. AWS嘅盈利差不多42億，按年升36%（上一季增速係28%），亦佔咗公司差不多一半純利。Profit margin 去到30.8%，上季只係28%

10. 至於公司嘅「其他業務」，主要係廣告，收入去到69億，按年升77%。

11. 比較罕有地，Jeff Bezos講到公司嘅串流服務Prime video，第一季嘅觀看時數按年升咗70%。而家大約有2億個Prime會員，2020年頭只係1.5億。

12. 另外留意嘅係，公司國際收入按年升60%，北美嘅先升40%，明顯海外業務將會成為新嘅增長動力，而海外業務剛剛舊年先轉盈。

13. 最後，公司宣佈咗加人工，唔係好多，「10億美金咁咯」。但，Amazon實在請好多好多人，今次話會有50萬人受惠，咁你計到，每人都只係加2000蚊美金，應該係一年喎！

14. 一樣嘢，睇公司真係留意啲業務性質唔同，之前講過蘋果賣硬件仲要賣畀消費者，同其他4間好唔同。Amazon亦有好唔同嘅地方，就係公司要請好多好多人。之前我地都貼過，Amazon 嘅 revenue per employee係蘋果10%，你可以話啲員工「生產力」低，但根本個business model唔同。Amazon好多係藍領比較低技術嘅員工，貨倉工人，司機之類。佢請嘅員工人數，多過其他4間加埋，亦所以特別多呢啲工會問題，亦經常會成為箭靶。

Twitter：業績唔算差，但股價大插。有機會反彈的。

15. 順手講埋Twitter，想睇返前瞻嘅，呢度。之前提過對隻嘢有期望，點知就係極少數地出完業績插水嘅公司。唔知有冇人跟咗中伏，但我都係覺得只係市場太敏感，當然股價升得多都係一個問題（插水之前年初至今升24%，跑贏晒大市）

16. 首先呢，公司係賺錢嘅，已經幾難得，好長時期都係輸錢。純利6800萬，當然好少，但舊年係輸840萬嘅。每股盈利0.16，亦係好過預期嘅0.14。

17. 收入方面，去到10.4億，按年升咗28%，高過預期嘅10.3億少少，亦係3年最高嘅增長，還不錯啦？當中差不多全部係廣告收入，9億，按年升32%。整體都幾好，點解大跌？

18. 當然有啲人話，似乎個收入增長慢咗啲。你見咩Snapchat或Pinterest收入係60-80%咁增長，Twitter作為一間唔算極大嘅公司（市值同Pinterest差不多，而只係Snapchat一半），似乎應該高增長啲？得28%差啲喎。然後你睇Big Tech Facebook Google之類都有30-40%收入增長喎。

19. 聽落呢個理由好似啱，但留意，市場一早都對佢期望冇咁高，事實個收入冇低過預期喎，冇理由而家先忽然嚟覺得佢不如人（當然你可以話，佢本身冇低過預期，但其他人遠超預期，顯得佢差）

20. 可能個問題係在指引方面？下季嘅收入，預9.8-10.8億，街係預10.6億嘅，似乎太保守？

21. 另一樣，亦係唔少報導有講嘅，用戶數目。Twitter用嘅係Monetizable Daily Active user（MDAU），出嚟嘅數係1.99億，街估2億，喂，爭嗰小小咋喎？不過又真係個按年增速（今次係20%，之前27%）放慢咗。

22. 想講嘅係，上次再上次，即係2020年10月出完業績後，公司股價又係大插水，跌咗17%，但之後好快就反彈。我覺得今次係反應過度，可以小注搏的，但就未必係可以渣好長嘅嘢，我自己亦冇打算買（手頭現金冇乜了）