五窮六絶？Amazon新高就預咗。但SPGI 新高先少人講。拜登上台後股市贏家輸家。九成美股業績勝預期。音質高就個人都高質啲。自由意志根本唔存在？ 早早叫你買Facebook。亞馬遜拆股？康宏除牌 (Patreon)

快評幾句— 五窮六絶？

大師冇點你— Amazon新高就預咗。但SPGI 新高先少人講

每日一圖— 拜登上台後股市贏家輸家。九成美股業績勝預期

Good Read — 音質高就個人都高質啲。自由意志根本唔存在？

FB Post Summary —  早早叫你買Facebook。亞馬遜拆股？康宏除牌

1. 照舊，近期啲業績文都寫好多字，所以呢篇從簡（結果都係2300字！）。另外週末會寫埋Amazon 同 Twitter業績，或者其他非科技公司（分散呀！提過好多次了）

2. 又照舊，今日嘅每日一圖同Good read都好好睇。

快評幾句— 五窮六絶？

3. 美股業績差不多過晒，咁大家有睇文都知堆Big Tech好勁，但其實其他舊經濟股都勁，細啲嘅科技股都勁，只係我冇咁多時間全部講。

4. 之但係，亦都果然有少少見光死（少少啫），星期四晚美股仲創新高，到星期五晚就要跌。但我覺得已經算好。

5. 五窮六絶嘛，當然唔信，但今日正係有記者打嚟問，冇計。咁港股大家都應該冇乜心機（但我冇放棄，仲有每月儲緊啲貨），你見我都少講，但唔會唔講，放心。

6. 美股呢？一樣都好似有啲強弩之末—雖然你留意，我都好似講咗幾個月，而美股就係咁在焦慮在上升。所以亦係嗰句，我覺得會回調啫，咁我可能錯嘛（對上兩三個月都冇回調！），況且沽咗又唔知幾時買返，所以只係叫你有槓杆嘅就減低佢，或者有新錢嘅唔好買得咁進取咁解。

7. 送埋個圖畀你，呢個圖都成日貼，將今次反彈開始（舊年3月），同對上幾次嘅大反彈比下。未必好有科學性，但你見啲圖都跟得足。如果係82年嗰次嘅重覆，咁就已經見頂。如果係09年嗰次嘅重覆呢，就仲有得升，但未來幾個月都會調整下。無論如何，今次標普指數低位已經反彈咗87%，抖下氣好正常。

大師冇點你— Amazon新高就預咗。但SPGI 新高先少人講

8. 週末會寫，但Amazon業績一樣勁，根本成堆Big tech都勁（但唔係隻隻升，主要係Google Facebook升得最勁），亦係嗰句，過去半年大把機會買。但買咗又嫌唔郁，想點？

9. 另外，呢隻SPGI更值得威，因為真係好少人講，甚至你同人講呢隻嘢人地都唔知係乜（不過你講全名，聽到標普環球就會有人）。偏偏我地呢度舊年寫過篇專題文，亦係我得意之作。又，寫完之後又係有讀者買咗，都潛咗一輪水，但你睇去到今年，即時翻生，陰啲陰啲日日升少少。記住係要畀耐性的。

每日一圖— 拜登上台後股市贏家輸家。九成美股業績勝預期

10. 拜登上台後股市贏家輸家—少少標題黨，呢度肯定唔係最勁或最差嗰堆，甚至未必完全關拜登事。但美股年初至今呢四個月，其中一個好重要嘅主題，當然係疫情受控，重啟經濟。咁你見到了，堆咩郵輪股（包括我地力推嘅嘉年華Carnival），賭場股升個不停。相反啲Stay Home股例如Zoom，或者健身器材嘅Peloton，跌到反艇。留意，學到嘢的，畀你睇下股市最基本嘅運作：炒預期，同埋睇估值。即係你死要拗「都未開始上船」「疫情都仲爆緊」「我都仲成日用Zoom」係冇意思的。MGM Carnival 之類之前執笠價，一有聲氣仲唔大反彈？相反Zoom 同Peloton之類咁貴，一有風吹草動即散，係呀，疫情後都仲會用Zoom，但點支持個估值？隻嘢由半年前高位跌咗四成，係咪一個好好嘅教訓？見唔見真係同啲Big Tech有分別？

11. 九成美股業績勝預期—又少少標題黨，唔係九成美股，係九成標普指數成份股啫。不過都夠勁。之前都講過，業績係多數都勝預期嘅（大家打龍通有默契你睇我我睇你），平均有七成幾嘅公司都會勝預期，但呢一轉嘅業績，去到近90%，近十幾年最高了。之但係，又未必即時令股價再升，你見都有啲業績明明好得但股價唔得（例如微軟）

Good Read — 音質高就個人都高質啲。自由意志根本唔存在？

12. 音質高就個人都高質啲—好鍾意呢類研究，今次呢個話你個咪靚啲，唔好疾聲，背景唔好咁多雜音—觀眾自然覺得你有見地，講嘢好有point．冇錯，人就係咁膚淺的，請你唔好高估咩「獨立思考」。又，證明好多嘢都係靠包裝，亦即係靠錢。不過如果只係靚啲嘅咪，花費不多，都應該去投資。

13. 自由意志根本唔存在？—呢篇仲正，但凡多嘢諗嘅問題少年哲學青（即係我），應該早早諗過呢啲問題，甚至係最重要最熱門嘅幾個哲學問題。自由意志，Free Will，到底存唔存在？不過正如好多爭拗一樣，搞清楚定義先—你唔一定要跟人嘅定義，但至少望下，然後諗下係咪你諗嘅嘢。有人認為呢啲只係啲友得閒得滯諗嘅無聊問題，咁可能唔少哲學問題都係咁，但至少呢個「有冇自由意志」嘅問題，影響可以幾深遠，並唔離地。好簡單，如果冇自由意志，咁到底仲存唔存在道德責任？而如果我地不能「決定」自己做嘅嘢，咁仲係咪需要為自己嘅行為負責？道德上，法律上呢？精神病人可以輕判或冇罪，正係因為大家相信佢地「不由自主」「唔知自己做緊乜」。What if我地人人都係咁？長文，但唔算深，值得睇。

FB Post Summary —  早早叫你買Facebook。亞馬遜拆股？康宏除牌

14. 都寫咗唔少文喎，但近期啲文engagement 幾低，靠大家幫手Like and share 下

15. 早早叫你買Facebook—自吹自擂廣告文，但你去睇都會有得著。講下點解咁有信心叫你買Facebook，同埋好多「網友」嘅見識幾咁膚淺，真係以為人人講搬去MeWe唔用Signal Facebook業績就會差。好彩佢地冇膽亦冇錢沽空，否則早早早輸仆街（呢個亦係股市難玩之處：雖然世界好多笨人，你要贏佢地好易，但股市你面對嘅人冇咁笨，況且股市唔係計人頭係計$，而笨人一般唔會好多$）

16. 亞馬遜拆股？—結果冇發生，但亦冇關係，順手畀你了解下「拆股」係咩回事，而點解亞馬遜唔係道指成份股，又點解道指好唔科學，而點解亞馬遜如果想入道指基本上一定要拆股。

17. 康宏除牌—我嘅舊公司（3月已閃），嘻。正式除牌，當然同我冇乜關，我冇持有任何股票。但我亦冇點落井下石，唔係因為怕畀人話我數臭舊東家，而係有啲舊同事有買，咁費事傷害佢地感情了。但，記住，其實CFA就教你唔好買自己公司股票—當然你在騰訊做嘅嘢覺得呢啲講法低能，所以CFA就多數冇發達—但又唔會餓死，好似我咁。

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。