Facebook：股價新高，呢隻真係值得自豪。一早話你知廣告加緊價啦！蘋果：業績好但股價冇力，iPhone好好賣，但之後點？應該會搞廣告了 (Patreon)

Facebook：股價新高，呢隻真係值得自豪。一早話你知廣告加緊價啦！

蘋果：業績好但股價冇力，iPhone好好賣，但之後點？應該會搞廣告了

1. 鍾意可以睇返業績前瞻，Facebook同蘋果都有，亦證明啲文係有用的。另外留意有時我寫preview時啲文嘅「預期」，同埋到回顧時嘅「預期」，可能會有啲唔同，因為有時唔同source，會爭少少，但一般無傷大雅

Facebook：股價新高，呢隻真係值得自豪。一早話你知廣告加緊價啦！

2. 先講Facebook，不枉我一直推，果然業績強勁，對得住大家啦？更重要嘅係，月頭已經話你知啲廣告加緊價。而你之前見SnapChat Pinterest Google啲業績都咁勁，都估到啲廣告實掂。

3. 出完業績，股價升7%，去到歷史新高了，今年都升咗22%，我都唔明啲人點解覺得表現仲唔夠好。咁總冇可能係你買完，然後幾日升幾成，然後你就落車，然後隻嘢就大插你低位再補返。唔會做得到的，就算你做到，都好快輸返，你亦唔敢買得大。

4. 買入好股長期持有，都係最簡單。雖然有時係咪好股都未必咁易估，但你眼光睇遠啲，自然知乜嘢係好公司。生意利潤長做長有嘅，股價多數都唔會點差，但點生意長做長有？就要靠「護城河」。

5. 講返公司，收入增長去到48%，係3年最高。人人杯葛Facebook？係咩？霸權已死？係咩？圍少啲爐，了解下個世界發生乜事吧。

6. 公司收入去到262億（美金，下同），遠高過預期嘅237億，正如頭先講，增長去到48%。公司預期下一季個增長仲會加快，但當然係因為舊年基數低（其實今次業績都好大程度上關事），去到第三四季就會放慢了。睇下到時股價又有冇影響？但一般都只係睇預期。

7. 公司當然十分賺錢，每股盈利3.3，預期係2.37。純利？去到95億，按年升94%。而Youtube應該仲係蝕緊錢，你話Facebook呢個business model係咪無敵？如果你真係計年度化都幾誇，一年差不多400億純利，而家先9400億市值（就快去到10000億！），咁即係24倍市盈率左右咋喎，以一間增長咁快嘅公司嚟講，似乎唔貴？

8. 又，點解業績咁勁？都唔使講，都話Facebook係廣告公司。基本上，話佢嘅廣告單價就升咗30%，量就升咗12%—價量齊升，勁唔勁？

9. 但更勁係，扯，呢度嘅讀者一早知啦！舊文寫得清清楚楚。冇錯，我都係其他地方睇返嚟嘅料，但首先我會花好多時間睇好多唔同嘅嘢，第二係我會畀錢去訂（呢啲要錢的），你睇呢度即係我幫你畀埋錢。第三係我會幫你整合埋邊啲值得留意嘅，有乜啟示，再用普通人睇得明嘅語言話你知！第時朋友問到底呢條友寫乜，你可以咁答佢。

10. 最後睇下，其實用家數字呢，係略為低於預期嘅。你計每日活躍用家（DAU），18.8億，低過預期嘅18.9億少少。計每月活躍用家（MAU）呢？亦低過預期些少，係28.5億，低過預期嘅28.6億。

11. 但有乜所謂？首先，按年都仲有差不多10%增長。另外，都係同預期爭嗰少少，事實有啲其他source嘅預期冇估咁高。三來，最重要係收入：都講過，少咗啲麻Q煩用戶，可能更好。你要記住，日日上網鬧FB嗰啲用家，同畀錢落廣告嘅商戶，唔係同一回事。講到尾睇結果，個ARPU（average revenue per user）最緊要，9.27，遠勝於預期嘅8.40。用戶多而搵唔到錢，冇用的。

12. 最後可以講埋仲有個數字，如果計「總MAU」，即係Facebook + Instagram + Whatsapp，就去到34.5億的，上季只得33億。

13. 公司最大嘅挑戰？公司都講到明，當然係嚟自iOS嘅改動，遲下會寫文細講，但總之蘋果最新嘅改動，會不利於客戶在Facebook落廣告，因為投放會冇咁精準。蘋果固然係舉私隱之名，但亦可能係為咗肥水不流別人田（下面會講）。你話對FB有冇影響？點都有啲，但可能最後係交啲保護費解決？無論如何，digital ad呢個大勢去咗咁多，根本唔會翻轉頭，客戶總要搵地方落，最後可能死先嘅係啲更少嘅平台。記住啦，一般呢啲嘢，都係有利行業整合，大公司食得更多，因為大公司先有資源慢慢玩。

14. 所以Facebook股價？我仲係相當樂觀，會唔會好快可以突破10000萬億美金市值？升多7%就得。最新iOS變動當然有影響，但公司一早已經講晒你舖，已吹咗一輪，照計唔係完全意外嘅嘢 —當然如果之後業績走樣嘅，有機會再跌過。但都係記住，你要相信公司逢關過關嘅能力，唔好因為咩有「壞消息」就嚇走—冇壞消息點會無啦啦有得畀你平價買？例如之前好多人以為Facebook唔掂，股價吽咗一輪，咁你事後咪見到係買入良機。

蘋果：業績好但股價冇力，iPhone好好賣，但之後點？應該會搞廣告了

15. 好，蘋果，業績係唔錯嘅，但股價反應麻麻地喎，都頭痕。高開3/4%，收市仲要倒跌。但又係嗰句，唔好因為股價唔得就夾硬話業績唔得，業績理應係得嘅，問題係投資者會覺得，之後又點（但，其實呢個問題都出現過好多次，而多數時間蘋果都係有辦法打破預期）。今年以嚟股價都只係上上落落，跑輸大市的

16. 又係講最基本嘅，每股盈利1.4，預期係0.99，純利236億，按年一個開。一樣，你年度化嘅，差不多都廿幾倍市盈率，都唔係別平。但當然，公司有一定季節性，所以有時用T12M （Trailing 12 months）會好啲，即係例如係上年二三四季加今年第一季咁去睇，遲下講。

17. 睇返收入，896億，按年升54%，遠勝預期嘅774億，即係季度嘅新高—留意當然冇「上一季」（4Q20）（官方叫1Q）超過1000偣咁勁，指嘅季度新高係指咁多次1Q入面（官方叫2Q）。而呢個增長，亦係10年最高。奈何公司實在太大，即使業績咁勁，股價你見都唔係好大反應。

18. 然後留意下地域，當然美國先係最大市場，但唔少人都聚焦「大中華」（大陸台灣香港），收入去到177億，按年升88%，都佔咗20%銷售，而且增長好快。但增長最快嘅反而係「亞洲其他」，即係大陸台灣香港日本以下，按年升94%，但亦只係75億—可能大中華市場幾咁大。至於增長唔高嘅日本市場，都仲有77億，始終都有返億幾人，亦都富裕。但增長當然唔快。

19. 然後分返開不同業務嚟睇。首先「所有產品」收入係727億，升62%，而佔總收入超過八成。剩返嘅係乜？係一路都希望可以成為新增長來源嘅收入，「服務」（由iTunes到Apple Music到你課金抽你三成都係），去到169億，只係增長27%，但市場期望都唔高，只係156億。咁你見到了，服務收入暫時只係佔兩成不夠，今次個增長明顯低過產品，但產品有周期，服務收入相對地硬凈啲，到你啲產品收入唔得時（例如遲咗出貨，或未有新model），就會見到服務收入佔多了，以前都試過。

20. 好啦，落到去每一隻產品。冇得傾，大家都知iPhone單天保至尊，上次就因為啲機有啲出唔切，大陸啲廠又停工。今次再加埋啲5G機，都預咗勁，點知畀預期更勁。iPhone數入去到479億，升66%，預期係414億。留意只係iPhone收入已佔公司總收入嘅53%—更加係產品收入嘅67%。但，之後點算？總不能無止境咁換機買機加價。呢個問題都困擾公司多年。

21. 其他各樣產品嘅，Mac機出奇好賣（因為Work from Home），收入91億，按年升70%，街估只係69億。公司預期今季仲可以有50%增長。iPad收入又係遠勝預期,去到78億，按年升79%，街估只係56億。反而啲「其他」產品，啲可穿戴裝置呀之類，就冇乜特別，78億收入，按年升24%，同預期差不多。

22. 但無論如何，Mac機iPad iWatch之類再好賣，都唔會忽然再有幾倍突破，同賣iPhone實在爭得遠。不過呢啲嘢全部可以將用家綁住個「生態圈」，就幫到啲服務收入。都話服務收入已經 169億，已經多過iPhone外任何一類產品，亦遲早會多過晒iPhone外所有產品嘅收入加埋晒

23. 其他財務嘢方面，見到個毛利率去到42.5%，遠高於街估嘅39.8%。當然服務收入高過預期係主因。

24. 仲有，回購，之前前瞻亦都有講。結果宣佈去到900億，都幾誇，留意市場預期（舊文有寫）都只係600億，而舊年係500億，再前一年係750億。似乎會不停靠回購支持個股價，冇計，錢太多。

25. 最後，連個派息都有加嘅，亦係之前前瞻有提。估加5-10%，結果加咗7%，每股一季派0.22。

26. 歸根究底，蘋果同另外幾間大科企有一個好大嘅唔同：佢主要係做硬件，仲要賣畀公眾，係好少有嘅例子。Facebook Google都係平台，主要係廣告公司。Amazon亦都有啲廣告收入，亦係做平台（不過運貨成本好勁）。Microsoft就賣軟件。

27. 咁賣硬件，仲要賣畀客，係有啲先天不足嘅地方，因為你不能不停加價（唔係ASML啲機），而市場總有飽和。蘋果當然一早知呢樣嘢，其中一個出路當然係利用呢班忠實用家，再在佢地身上拎「服務收入」。都話課金都抽你三成，都幾惡。

28. 最新嘅壞消息係，歐盟話App store違反咗反競爭條款，細睇下會點，不過照計應該又係罰錢了事。

29. 最後一樣，我幾乎肯定，蘋果會開始想諗廣告收入。好簡單，你見Facebook  Google賺到盤滿砵滿，好多都係經返iOS平台，點解自己唔撈一筆？未必極端到話「只係借保護私隱之名去掠水」，但，既然有個咁嘅優勢，點解唔用多啲？人人都是廣告商了，連Amazon Microsoft都有廣告收入，蘋果點會唔諗？

30. 周末我應該寫埋Amazon同Twitter，或者其他嘢

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。