ivanliresearch

Sell in May？唔係下話 Google Visa LVMH 新高。蘋果 Facebook 業績極勁，盤後勁升．科技新股首日回報低咗三成。近年啲奧斯卡電影全部叫好不叫座．黑天鵝之父話Bitcoin似足龐氏騙局。麥當勞雪糕機不解之謎． Aberdeen 改名做 Abrdn (Patreon)

Published:

2021-04-29 05:42:40

Imported:

2021-07

Content

快評幾句— Sell in May？唔係下話

大師冇點你— Google Visa LVMH 新高。蘋果 Facebook 業績極勁，盤後勁升

每日一圖— 科技新股首日回報低咗三成。近年啲奧斯卡電影全部叫好不叫座

Good Read — 黑天鵝之父話Bitcoin似足龐氏騙局。麥當勞雪糕機不解之謎

FB Post Summary — Aberdeen 改名做 Abrdn

1. 出咗街，加上呢排不停睇業績寫業績，簡短啲。但照舊，今日嘅Good Read 好睇

快評幾句— Sell in May？唔係下話

2. 講真的，任何人同你提（留意，只係提）「Sell in May」，都可以對佢講嘅嘢打個九五折先（唔包括本文，當然你訂年費都有折）。真係討論都嘥時間。只係啲傳媒（仲要係老一輩嘅）冇嘢做，一到五月又要講下呢啲，正如even worse，一到聖誕又講「聖誕鐘買匯豐」。而講得出呢句嘅都真係老態龍鍾。當然好多時啲記者都WTF，但老細要做又硬著頭皮要搵人問，好慘的。

3. 「之不過」，你睇真啲呢，如果以六個月咁計，的確5月-11月嘅美股回報，係咁多個組合中最低嘅。原因我都唔知。

4. 之又但係，幾樣嘢啦。首先，上面講嘅嘢似乎係遠古年代發生居多（亦即係，最初有呢句嘢出現，總有啲原因），近年似乎係冇呢回事嘅，例如舊年美股5月就升12%。過去5年嘅5月，美股都係升嘅！甚至過去9年都升咗8年，只有一年係微跌0.3%。

5. 而即使你睇第一個圖，所謂「最差」，平均都仲係升，亦有65%嘅情況係升市。

6. 教訓都好明顯啦？不再重覆，stay invested，同埋唔好time the market

大師冇點你— Google Visa LVMH 新高。蘋果 Facebook 業績極勁，盤後勁升

7. Google業績就寫咗了，VISA睇都未得閒睇，LVMH就由買嗰下已經出post啦，好似5%咁，幾好架啦。

8. 至於蘋果同Facebook，一個字，勁，今晚寫。不過你睇股價反應明顯Facebook勁好多，亦都盤後新高。蘋果業績係勁，但長遠都係要諗下新增長點在邊，可能係服務，但暫時只係中規中矩。有機會嘅game changer係廣告。

每日一圖— 科技新股首日回報低咗三成。近年啲奧斯卡電影全部叫好不叫座

9. 科技新股首日回報低咗三成—留意只係講IPO，因為直接上市嘅（例如Coinbase）根本好難量度「第一日升幅」。由三月開始，啲回報低咗一大截了。呢個亦係新股遊戲嘅規律之一，亦因為咁我並不太熱中於呢啲嘢。個關鍵係有幾隻回報好，之後投行定價就會定得貴，變相令到唔吸引。

10. 近年啲奧斯卡電影全部叫好不叫座—Facebook都有寫過，藝術可能幾主觀，但至少奧斯卡啲評審品味，同大眾越嚟越脫節。你見以前啲最佳電影好多時都係幾賣座，但而家再冇咩Titanic之類嘅嘢

Good Read — 黑天鵝之父話Bitcoin似足龐氏騙局。麥當勞雪糕機不解之謎

11. 黑天鵝之父話Bitcoin似足龐氏騙局 — Nassim Nicholas Taleb你未必聽過，但正係佢本書將「黑天鵝」呢樣嘢發揚光大。唔識點講，但佢可能係現世中我見過最聰明嘅人？又，佢最初係幾睇好Bitcoin的，但而家改變睇法—不過，我覺得轉軚冇問題，死撐先係問題。

12. 麥當勞雪糕機不解之謎—過癮！唔知大家有冇做過麥當勞。我就有，但好似冇玩過雪糕機。如果有玩過嘅留意下，部機係十分之「Black Box」，要襟好多唔同嘅掣入好多數字先開到，仲要有hidden menu！但呢個都未係最精彩，總之部機就係一個謎，而壞咗你只能搵返麥當勞嘅指定人士幫你整—呢個就最好玩嘅地方：部機係成日壞的，而你唔知點解，而公司係會貴一貴賣畀你。