業績三味：Tesla（普通，跌），Google（勁，升），Microsoft（勁，但跌）。甜品就Pinterest（好勁，但勁跌） (Patreon)

Tesla—股價跌5%，賺錢都係靠碳排放，同埋賣Bitcoin（留意唔係買）

Google—50億回購，股價新高。收入增速8年最勁，雲端業務就快賺錢

Microsoft—期望低就有驚喜，收入增速5年最勁，但2萬億市值前抖下先

送你嘅甜品：Pinterest —乜都勁，但估值太貴，業績後插水10%。

1. 一炮三響，今次其實好早已經打完Tesla，但連埋另外兩隻一次寫啦。反正到星期三晚嗰篇唔會寫咁多嘢。

2. 呢篇文遲少少可能我會放免費，吸下客。

Tesla—股價跌5%，賺錢都係靠碳排放，同埋賣Bitcoin（留意唔係買）

3. 咁你見到股價，市場就梗係唔多收貨啦，雖然好多時Tesla股價同啲業績關係不大，但出業績嗰幾日都會反映下嘅。

4. 鍾意可以睇返上篇文，講市場估緊乜，但我呢度貼多次啲關鍵數字預期

5. 首先講返，公司連續7季盈利，恭喜。而純利去到4.4億（美金，下同），史上最高。每股盈利0.93，亦係高過預期（0.75），但市場就係唔多滿意。又或者係，之前一年嘅股價，已經反映咗好多好多好多嘅利好，透支晒之後嘅好消息（但隻股票又唔會話你知，咁點判斷？極之難）

6. 好啦，收入104億，升75%，增速近9季最勁，但只係剛合符預期。細分，都冇乜好大走樣，賣車收入87億，高過預期嘅85億少少。租車收入（Leasing）3億，預期2.9億．太陽能收入（Energy generation and storage）5億，預期5.2億。其他收入9億，預期6.7億，冇乜特別。

7. 但又要講，公司今季嘅regulatory credits（RC）收入，5.2億。咁又係了，公司純利先4.4億，所以有人話根本賣車係蝕錢嘅，只靠呢啲RC頂住。

8. 另外都細講下，到底呢啲RC係乜東東。首先，在收入上，佢係計埋落去「賣車」收入嘅，當然公司有話你知，你可以自己睇。

9. 咁到底呢個收入係乜東東？就係「市場L」諗出嚟嘅一個方法，政府會根據每間車廠生產幾多新能源車同幾多柴油車，去畀呢啲RC佢地，用市場機制做誘因，獎勵做電動車嘅公司，罰啲柴油車公司。咁Tesla只做電動車，當然好多RC在手—但最偉大佢係可以賣出去畀其他車廠，因為其他車廠可能唔夠RC，咁Tesla咪有收入。幾億美金話多唔多，但基本上零成本，支持晒成間公司。

10. 正面啲嘅嘢呢？公司嘅現金流，正數了，2.9億，之後係季季燒錢的，差不多每季燒10億。再加上公司嘅資本開支（capex, capital expenditure ）今季13億，都仲可以有2.9億正現金流，現金流情況大為改善。

11. 當然更得意嘅係Bitcoin，完全估唔到，公司之前好高調咁買，但原來都沽咗10%，套現2.7億美金，而淨賺咗 1億（你可以當係1.7億成本 2.7億賣，即係執59%）．咁事實公司冇話過唔沽，亦冇話唔可以沽，亦冇話過沽之前要話你知。你話唱好然後散貨？吹咩。點睇都唔犯法（況且仲要係Bitcoin，唔係股票，冇乜監管）

12. 不過最後提下你，呢1億進帳呢，並唔計入「收入」，而係一個特殊收益，Restructuring and others ，你又係可以自己睇，好眼利先搵到。

13. 咁即係，公司純利4.4億，但RC佔咗5.2億（應該零成本），Bitcoin又賺咗1億咁咯。仍然啲「本業」輸錢。

14. 咁講返個「本業」，仲有少少嘢可以講。公司預今年出車量按年升50%，即係75萬架，同上次業績時指引一樣。都話要一路睇住間公司架啦

15. 最後，應該冇乜人care，但Elon Musk堆option應該可以生效了，不過應該對公司冇乜特別影響。固然有「攤薄」，但之前股價係咁升嗰時已經知。

Google—50億回購，股價新高。收入增速8年最勁，雲端業務就快賺錢

16. 當然可以睇返上篇文，但就咁睇呢度都得。又係先講股價，你見盤後再升到歷史新高，已經講晒。16000億市值了，第四大嘅公司。咁又容許我講多次，過去半年都不停推呢隻嘢，但又畀人覺得升得慢，有乜計？雖然今年已經差不多升四成。

17. 先講收入，553億，街估 516億。按年升34%，呢個增速，2013年以嚟最勁。賺錢呢？公司都十分賺錢，每股盈利26.3，遠勝預期嘅15.5，按年升1.7倍（超過double）。純利就179億。你拎去睇返個年度化市盈率，22倍，似乎真係唔係極誇張地貴。

18. 睇返個收入嚟自乜，正如一路都講，表面天花龍鳳，但Google講到尾係間廣告公司。廣告收入447億，按年升32%，留意已經佔咗收入嘅81%。

19. 廣告入面可以再拆，例如YouTube廣告收入 60億，高過預期嘅57億，按年升49%。但留意，你計到數，YouTube都只係佔廣告收入嘅13%。最大份係乜？主要search，Google獨步武林嘅業務，但增長係慢過其他業務的。

20. 雲端收入方面， 40.5億，同預期差不多。按年升46%，上次係47%，唔算特別標青，留意只係佔總收入7%。不過亮點係：仲係輸錢，輸10億，但窄咗好多—舊年同期輸17億—雲端業務變賺錢不是夢。

21. 另外都仲要嘅，手頭現金1350億。所以宣佈咗 500億嘅回購計劃，上次兩倍。

22. 其他冇咁重要嘅？Traffic acquisition cost（TAC） 97億，比預期93億為高。

23. 另外留意，收入增長最高嘅區域，係亞洲，44%。嚟自邊？你話入唔到大陸？我就唔多肯定，固然你在大陸用唔到佢嘅服務，但留意大陸嘅公司可以照落廣告，Facebook嘅情況都係咁，都有一定嘅收入嚟自大陸。搞清楚用家同埋客仔嘅分別。

Microsoft—期望低就有驚喜，收入增速5年最勁，但2萬億市值前抖下先

24. 果然期望低有驚喜。Again，可以睇返上篇文，但不睇關係都不大。公司收入升 按年19%，同其他科企比未算好誇（業務成熟好多），但同自己比就係2016年以嚟最勁。

25. 每股盈利就2.03，遠超預期嘅1.78。純利155億，按年升44%。冇錯，收入增長唔高都見利潤升得咁快，唔少業務（Windows and Office）成熟，唔使好多新開支。

26. 收入417億，高過市場預期408億。指引都強，下一季估收入436億至445億元，而分析員估430億。

27. 明明就很掂，但唯獨係股價唔掂，創新高後盤後跌返啲。2萬億市值仲係爭一步。應該買入機會？唔好夾硬因為股價跌就話個業績唔掂，識睇業績得唔得好重要。

28. 各種業務方面，先講好多人好有期望嘅Azure，收入按年增長 50%，增速同上季一樣，街就預會放慢到46%，但留意公司一路都冇畀實數話你知到底收入有幾多（應該，唔係太多）

29. 另外，商業雲方面（主要係Office 365），收入177億，升33%，智能雲收入151億，升23%，高過街估嘅149億。智能雲有乜？又包埋咗Azure，仲有其他一堆包括：Windows Server, SQL Server, Visual Studio, GitHub and Enterprise Services

30. 另外，PC業務都有130億收入，升19%，高過街估嘅126億。呢瓣包乜？Windows啦，但仲有遊戲（Xbox），同埋search（Bing啩，我估）

31. 最後，Search advertising，應該佔收入唔多，但個勢頭幾好，收入升17%，之前一季只係升2%

送你嘅甜品：Pinterest —乜都勁，但估值太貴，業績後插水10%。

32. 已寫得太長，況且又唔係核心推介，我自己亦冇買，所以求其寫兩句。想睇詳情自己睇（當然我都揀啲寫得最好嘅source）

33. 好簡單，你見收入升78%，高過晒預期嘅75%。下季嘅指引都勁，話預加速度105%。其他各樣嘢都勁，又有錢賺，唯獨係活躍用戶人數差少少，亦都估下一季都麻麻。但，正如之前講Facebook Twitter嘅情況，講到尾收入最緊要，用家少啲啲唔係咁大問題。

34. 所以我估，都係因為估值太貴咯，上次篇文都有講。又重覆一次，故事人人識講，但總有個價。不過如果真係插10%，可能算吸引？