業績前瞻：Facebook Apple Amazon Google Microsoft （有Excel玩） (Patreon)

Google今年升33%，收入應該仲會增速

Microsoft挑戰2萬億市值，但收入增長係5間中最慢

Apple增長近N年最勁，仲可能加派息加回購

杯葛Facebook？收入增速應該10季最高

Amazon—明明增長好勁，但股價大半年都橫行

1. 多圖，少字，但個Excel真係緊要（Attachment有）。留意上兩次出業績已經有類似嘅嘢，我就不停咁將佢做得更好。咁你其實自己由頭開始整係好煩嘅，「呢啲亦係護城河」。

2. 雖然我幾鍾意寫業績（分析員嘛），但唔算成日寫，因為怕大家悶。事實如果你冇買嗰次股票嘅，未必會有心機睇。咁所以我一寫，就搵啲最大最值得睇嘅公司，正係啲大科企 Big Tech。就算你唔買，冇興趣買都好，都應該睇，呢啲公司影響緊成個世界，同埋其他股票。

3. 特別係如果你一路留意住，睇得十次八次業績，就會慢慢見到公司如何面對不同挑戰（例如忽然殺個肺炎出嚟），點樣受其他嘢影響，同埋邊啲公司真係有「護城河」，邊啲係一震就散（但留意，冇「護城河」嘅公司唔一定不值得買，只係長期持有同短期投機嘅分別，你炒航空股郵輪股都可以好好玩的，但真係不能長期持有）。

4. 再加上，呢啲科企多人睇多人講，乜都唔識想了解下市場點運作嘅，由呢啲公司開始最好。一句講晒：學到嘢的。

5. 今篇我先講五大科企FAAMG（NetFlix之前出咗），仲有啲其他公司，例如Tesla，Twitter，Pinterest，甚至其他非科技公司，就可能星期一日頭整多篇文講。可能咋下。

6. 首先睇啲大圍數字，你大約都睇到，今季（2021年第一季）嘅收入同每股盈利，差不多全部都低過上季（2020年第四季）。但本身冇乜特別，因為有季節性，特別係Facebook 同 Google好大程度係廣告公司，好多時第四季業績特強，蘋果同亞馬遜亦因為聖誕節買嘢，多數都第四季強。所以不能死牛一面頸，呢啲情況下，你睇按季增長就冇意思的（另外都留意，啲公司其實財政年度唔同的，最煩係蘋果，甚至唔係跟日曆，但大約你用返日曆上嘅四季啦）

7. 留意返個時間表，Tesla係星期一（收市後，其實美股多數都收市後出，但當然有例外）。Google，Microsoft同Pinterest係星期二，蘋果Facebook星期三，Amazon Twitter星期四。大約都順住呢個次序講（Tesla就下一篇文先講，星期一晚前寫得切的話，但其實都唔使點睇業績）

Google今年升33%，收入應該仲會增速

8. 先講Google，長期都推介又長期都持有（其實差不多咁多隻Big Tech都係），剛先創歷史新高，但留意呢個唔係你唔買嘅理由（雖然心理上可能要克服下）。今年股價升33%—你估到我想講乜了，都唔明啲友發乜神經，居然話呢啲嘢升得慢。路遙（都唔使好遙）就知馬力，你堆發夢股香晒，Google繼續慢慢升。

9. 講過了，公司大部份收入都係嚟自廣告（Search + YouTube），仲有啲雲端收入。咁之前嘅文提過（呢篇真係堅嘢），Facebook啲廣告加緊價，SnapChat收入又咁勁（舊文寫咗，遲下要放埋隻嘢落監察名單），明顯話畀你知個數碼廣告市場幾咁勁。（又證明，啲文真係要成日睇，環環相扣的）

10. 市場預每股盈利15.5（美金，下同），收入去到516億，按年升25%—有幾多公司可以長期有呢個增長？留意舊年疫情初爆時，公司受好大打擊，因為收入唔少係旅遊相關嘅廣告，舊年第二季仲錄得史上首次收入倒退（跌2%），但去到第三季已變返14%增長，第四季23%—今次預升25%，即係增長繼續加快（當然舊年個基數都細）。

11. 另外亦可以留意下雲計算Google Cloud，暫時只係佔總收入7%，但上季收入按年增長有47%，有機成為新增長動力。

Microsoft挑戰2萬億市值，但收入增長係5間中最慢

12. 同樣地，又有乜好講？又係剛剛創咗新高。今年都升20%。記得舊年啲友又話唔郁呀升得慢呀，你睇，幾咁冇耐性？公司19700億市值，離20000億一步之遙。

13. 街估每股盈利1.78，收入去到408億，按年升16%左右。留意上一季大約係17%增長，即係應該唔會再加速，而事實公司相對地係冇乜受疫情影響嘅，甚至仲有少少受惠（個個在家工作嘛）

14. 看點當然始終係雲計算，同埋Azure．仲有留意下公司對各種收購有乜評語。似乎冇乜特別亮點？不過可能正係期望低先有驚喜。

Apple增長近N年最勁，仲可能加派息加回購

15. 股價的確表現麻麻，年初至今基本上原地踏步，跑輸大市，五間之中最差。不過希望在人間，今次業績增長，可能係近N季最勁。

16. 市場預每股盈利0.99，而收入去到769億。留意預期收入增長32%—應該好多年冇試過有咁嘅增長，上季都只係21%，而之前有好多季度係單位數。

17. 當中帶動收入增長嘅，當然係靜咗一排嘅iPhone，街估收入去到432億，按年升49%。街估服務收入去到154億，按年升15%。可穿戴裝置嘅收入去到74億，增長18%。換言之，一切都睇iPhone增長．

18. 留意之前公司因為疫情都幾受打擊，主要係啲貨出唔切，今次業績會大翻身。另外留意公司有機會大增派息，有人估加5-10%。但，做乜唔回購？原來有機會兩樣一齊做，回購額度有機會加到600億（舊年係500億）

19. 另外留意公司應該會開拓廣告收入—美其名係保護用家私隱，實情係限制其他對手。不過留意，最打擊嘅未必係Facebook Google，而係啲中小企，有機會再寫多啲。

杯葛Facebook？收入增速應該10季最高

20. 都算係我愛股之中嘅愛股之一。費事重覆又重覆，但，個個話杯葛，個個話Facebook 已死，搬去MeWe唔用Whatsapp，事實呢？事實我地之前已經貼過Facebook廣告不停加價。咁你估下業績得唔得？

21. 股價呢排就麻麻地，離新高仲有5%，年初至今都升12%，算同大市同步。依然向1萬億市值進發（而家8600億）

22. 市場預每股盈利2.36，收入預會去到237億，按年升34%—留意，都係近10季最高了，Facebook已死？係咩？

23. 另外留意，每日活躍用家（DAU）同每月活躍用家（MAU），街估都仲有增長，分別去到18.8億同28.4億。

Amazon—明明增長好勁，但股價大半年都橫行

24. 最後，Amazon，股價今年表現都算麻麻，升5%，但都跑輸大市，僅僅好過蘋果少少。

25. 街估每股盈利9.58，而收入去到1046億—留意會係連續第二季超過1000億（蘋果再上季就得，今次出嘅業績唔會夠，季節性較大）。增長係39%，其實已經慢過上一季，但以一間咁大嘅公司，仲可以季季30/40%收入增長，好誇張（但當然利錢冇蘋果咁重）

26. 留意股價過去大半年都橫行，主要係公司真係太大了。但，睇返一年收入差不多4000億，市值16800億，個Price to Sales「只不過」係4倍多啲，咁似乎又唔見得係估值離晒地。

27. 值得留意下嘅反而係啲「週邊」業務：ASW，廣告，同埋會員訂閱費（主要係Amazon Prime）

=========================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。