懶理資本增值稅，美股又差不多新高，但Bitcoin已散晒．ASML Google SPGI Visa 齊齊新高．英國CEO減人工美國CEO加人工。NetFlix風光不再？Bitcoin搵笨？NFT搵笨？財演自白。蘋果抄Tile三叔抄蘋果。借錢畀歐超聯天地不容。 (Patreon)

快評幾句— 懶理資本增值稅，美股又差不多新高，但Bitcoin已散晒

大師冇點你—ASML Google SPGI Visa 齊齊新高

每日一圖— 英國CEO減人工美國CEO加人工。NetFlix風光不再？

Good Read — Bitcoin搵笨？NFT搵笨？

FB Post Summary —  財演自白。蘋果抄Tile三叔抄蘋果。借錢畀歐超聯天地不容。

快評幾句— 懶理資本增值稅，美股又差不多新高，但Bitcoin已散晒

1. 頂丫，原本話預有個調整，點知美股星期五晚已差不多全數收復失地。再講一次，傳得加資本增值稅，就係堅嘅，當然未必好快，亦可能有政治阻力（但我覺得個方案算聰明，個針對範圍適當，唔會太少又唔會太多人）。所以真係不能亂沽貨或清倉。

2. 同時你見，一話加資本增值稅，堆加密貨幣就就散晒—不如諗下，會唔會你買股票賺到錢要交稅，而炒Bitcoin就唔使？固然你會話個技術而家唔會暴露你身份，睇好嘅仲可以話，會令更多人唔買股票去買Bitcoin添。但，我嘅睇法係，會唔會畀你咁著數？政府有機會一次過搞埋呢樣嘢。無論如何，睇法不變，唔信Bitcoin，但買少少，免得佢升好多。

4. 最後講下，你見港股又有返啲力，特別係啲科技股。（張圖唔係全科技股，只係我有望嘅股票）。原本以為係因為美股加資本增值稅，有機會啲友轉戰港股（其實呢個講法唔太有說服力），但諗真啲似乎唔係。無論如何啲環球Big Tech仲係有吸引力

5. 不過，我星期一明報篇文會講，有冇諗過，香港甚至大陸都可能收資本增值稅？之前都吹過。美股就貴，中港股市就先天不足（共產黨並不視股市向好係首要任務），值得再諗下其他市場分散下。你見我呢排都寫啲歐洲股，甚至遲啲係日本—唔係呢啲地方特別吸引或唔會收稅，但始終啲估值冇咁誇。

大師冇點你—ASML Google SPGI Visa 齊齊新高

8. 都不用多講，講真的，天地良心，覺得我推嘅嘢整體都不錯啦。咁事實亦係你未必會跟晒，一來好似推好多隻（其實都唔算，嚟嚟去去嗰廿幾三十間，頂多有時短睇十間八間），二來跟晒亦未必有錢，三來人性亦未必會。但，選擇性跟嘅，就會有時跟咗啲伏嘅冇跟啲中嘅。咁都冇嘢嘅，不過你可以自己諗返點解會咁，點解呢堆嘢都新高但你啲嘢話唔掂，只係「唔好彩」，定有其他原因？係咪你偏向買啲投機味太重嘅嘢，或細嘢？到叫買Google VISA你又耍手擰頭呢？要理解自己嘅問題在邊。

每日一圖— 英國CEO減人工美國CEO加人工。NetFlix風光不再？

10. 英國CEO減人工美國CEO加人工—英國CEO就一向低人工過美國，你見美國嘅人工係幾倍。呢個原因好多，一來啲公司唔夠勁，二來文化唔同，三來股市表現不同。但更有趣嘅係個走勢，越拉越開，美國CEO就疫情都加人工，英國就減。但兩樣嘢：首先，畀你睇到，CEO唔一定人工唔會減。第二，舊文都寫過，CEO嘅職能係乜？係為股東爭取利益，即係股價升。咁美股係升喎，英股係不濟喎，所以有咁嘅分歧好合理。

11. NetFlix風光不再？— NetFlix之前嘅業績真係出奇地差（又有寫過！），最大問題係上客，仲有指引埋之後都會慢。拍埋個圖睇更加見到幾震憾。不過，留意下，其實2019年上客已經見晒頂—點知殺出個肺炎，真係行運。幾明顯見到NetFlix客量增長見咗頂，除非入大陸（但冇乜可能），但你見股價都只係跌10%—留意公司而家相當賺錢了，同埋，係咪有唔少加價空間？呢排我諗嘅嘢：你出街睇套戲一條友都成舊幾水喎。

Good Read — Bitcoin搵笨？NFT搵笨？

13. Bitcoin搵笨？—原題係Why Cryptocurrency Is A Giant Fraud，大騙局一個。入面講嘅觀點……都唔係好新，我提過，其他人都提過。但首先the market can stay irrational longer than you can stay solvent （幸好冇乜人走去沽空）。另外，因為錢印得太多，就好多呢啲古靈精怪嘢。我的睇法同之前差不多，唔認為可以咩取代貨幣，做交易媒介。但作為取代黃金，作為放錢泊錢嘅工具，似乎有得玩。而我嘅做法亦係拎少量錢去買，in case 真係自己睇錯而班友發達。

14. NFT搵笨？—NFT，「即係一段籃球入樽片又話值幾千萬」「求其整張pixel畫又值錢過梵高」，你見我更少講，因為亦冇乜可以投資嘅方法（Bitcoin都仲可以買下GBTC之類，所以費事討論。但唔知咩係NFT嘅，可以睇下篇文。留意係the art newspaper，將佢比喻為鬱金香泡沫。「但最初啲友都係咁講Bitcoin」「咪又係升到癲」。無論如何，睇法差不多，但我覺得NFT更加搵笨，亦反正冇乜方法可以投資，避之則吉。

FB Post Summary — 財演自白。蘋果抄Tile三叔抄蘋果。借錢畀歐超聯天地不容。

呢排寫啲文好似冇乜反應咁，大家記住幫手share and like

17. 財演自白—冇乜公共性，但都同大家分享下做乜我而家好少上電視節目。同埋我都係覺得而家搞Patreon最啱我。

18. 蘋果抄Tile三叔抄蘋果—寫過唔止一次，現實金融世界嘅「抄襲」，真係同好多正義網友諗嘅唔同。個舉證門檻好高的，特別係你要講到犯法。咁你話唔犯法但不道德，現實亦話畀你知消費者投資者完全唔介意。例如啲社交平台，都係你抄我我抄你。科技嘢一樣係咁，蘋果嘅Air Tag一樣唔係咩原創，但佢有自己iOS平台，先係殺著。值得諗下嘅係，各種公司嘅「護城河」係乜？唔好以為你有點子你有idea就係殺著。

19. 借錢畀歐超聯天地不容—呢篇就非球迷都要睇啦，我當然反對歐超聯，但唔知係乜唔想理都冇關係。不過，JP Morgan出資呢個賽事，就畀某啲評級機構下調佢ESG評級。咁都得？亦證明ESG呢啲嘢有幾好笑。黃賭毒煙酒你覺得唔好，理解。請童工甚至新疆棉唔鍾意，都明。但，出錢畀球會搞個新賽事都變咗天地不容？咁借畀錢地產商起樓係咪又天地不容？

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。