資本增值稅震散美股．對股市影響？睇返歷史咪知。又唔係第一日收．Bonus：成日話等調整嘅，可能有機會等到．SNAP（簡稱Snapchat）業績 (Patreon)

資本增值稅震散美股—政府莫財嘛

對股市影響？睇返歷史咪知。又唔係第一日收

Bonus：成日話等調整嘅，可能有機會等到

醒多個小菜：SNAP（簡稱Snapchat）業績

1. 呢排嘅作息規律咗（加上，商場裝修鑽嘢），早睡早起，所以見好多時我都日頭先寫文。未必會成為常態，如果太不便嘅話我知，但暫時呢排咁作息，似乎對我身心好咗。

資本增值稅震散美股—政府莫財嘛

2. 昨晚嘅震憾彈，當然係加稅。甚至唔係之前一路講嘅企業稅（之前都一路驚會震散市場），結果爆出嚟嘅係資本增值稅　capital gain tax。雖然只係傳聞，但由權威嘅媒體爆出（所以真係同你啲網友仲係唔同的），你當係真嘢。咁你見到，即時震散美股。

3. 道指400點嘅跌幅唔算多（之後收窄到320點），但已經係近一個月最大跌幅（可想而知個市根本冇乜點跌過，之後會講）。咁如果只係400點當然冇乜好討論，其實2000點都冇乜好討論（10%未夠），但會唔會繼續跌？

4. 我當然唔係律師，又唔係美國公民，所以未必完全理解啱。但資本增值稅，就我理解，就係你賺股票嘅錢，咪抽你一舊咯。對美國公民嚟講唔係新嘢，而家都有，但大增咁解。以前大約係24%，而家話加到43%。

5. 香港人一定覺得CLS，匪夷所思，畀埋條命你好未，我賺到錢關你乜事，做乜打劫我。但This is America，或者話根本全世界好多地方都有。而完全抽離咁睇，當然亦係因為想收窄貧富懸殊，亦加上啲基建大計令到政府冇錢。反正大家讀過下書都知，政府抽稅，本身就係財富再分配。

6. 之前嘅企業稅，富人稅，可能都係呢個方向，但我都寫過文話呢兩種稅未必易抽到，企業富人可以走。咁可能資本增值稅會易啲？遲下再研究。

7. 而今次針對嘅，係100萬美金收入以上嘅人。我唔肯定收入點計，計打工定計埋投資收益（似係後者），但無論如何，一年收入有100萬美金嘅，點都係當人了。留意佢並唔係依身家而抽。

對股市影響？睇返歷史咪知。又唔係第一日收。

8. 講咁多，對股市影響點？先講學術（點都係重要的），學院派等等，話你知，你計discounted cash flow 計 PE 計 咩 Gordon growth，一般都完全唔關呢啲稅事—你抽企業三成稅就唔同，直接影響盈利嘛。但你抽個投資者，關公司基本因乜事？況且又唔係得美國人買美股。點會隻嘢忽然冇咁值錢？

9. 情況同之前香港印花稅差不多，唔應該會影響股市指數（成交就會影響）—除咗係一啲同股市有相當大關係嘅公司，例如港交所之類。咁你美股你可以話金融股有啲影響，但其他嘅唔會關事

10. 但實務上呢？投資者當然唔係咁諗。將心比己，你係美國公民，你會點？正常地過去一年幾股票嘅，全部都sit on good gain—咁我梗係而家沽咗佢啦！鎖定啲利潤嘛。陣間你5月1號開始計我咪好唔抵？（亦唔知會唔會有追溯期）

11. 頭先講過，資本增值稅唔係第一日加。對上一次應該係2012年尾，咁你見的確股市第四季都差，好似跌咗10%—但，去到2013又升個不停了。所以你話應唔應該落車？我就唔會

12. 同樣地，你可以睇返歷史上加資本增值稅，或者減，似乎對股市嘅影響，都係相當短暫。即係，「股市長線都係升的」。

Bonus：成日話等調整嘅，可能有機會等到

13. 咁你心諗，扯，咁使鬼你講咩，跌又叫人買，升又叫人買—但真係咁嘛！而你可以試下捉啲底，有幾可畀你捉到？況且，仲要計埋捉唔到嘅代價。

14. 呢度可以又重覆講之前一個現象，好多人見我話覺得會跌，但又唔減倉，做乜？首先，成日講一句：「如果我錯呢？」。第二，會唔會升多五六成先跌10%？第三，走甩咗，幾時先買返？

15. 冇錯，剛剛呢段嘅道理都講過，所以再畀啲新嘢你，畀個例子你：

16. 美股舊年323見底後，升到你唔信。頭幾個月當然有人覺得虛火或泡沫，但升得多幾個月就嗰啲人都信埋啦。好啦，但人之常情，覺得「升咗咁多」「等回下先」。始終，唔係個個有勇氣高位再追嘛（我就高位再買LVMH 同 愛馬士）（「不過買BTCC咪又中伏」）

17. 嚟啦喎，舊年我地剛launch Patreon不久，美國大選前啦，9月同10月都有跌過近10%（但未夠10%），咁你嗰啲位可能都敢買落去。

18. 然後令人泄氣嘅係：舊年10月後，美股近乎冇調整過。唔算癲升，但頂多1月跌過近5%（掂一掂），根本冇乜點跌。你一路等等等，等到幾時？

19. 咁當然啦，睇定啲先，再加埋企業稅之類，今次美股可能真係有個大啲嘅調整。但，記得唔好目己呃自己呀，之前係咁話等調整先買嘅，係咪真係跌就買先？跌幾多先買？10%？但你買完再跌15%會唔會又嚇走？

20. 其實好多時，唔做槓杆，有錢咪買落去，頂多調節下買啲唔同風險嘅嘢，可能係最簡單。

醒多個小菜：SNAP（簡稱Snapchat）業績

21. 同上次講Bitcoin嘅一篇有啲似，費事成篇只講一樣嘢，整多個小菜畀你。反正亦係值得講嘅嘢：SNAP（以下稱稱SnapChat）（係喎，簡稱仲長咗，但好似叫SnapChat順口啲）

22. SnapChat呢間公司，耐唔耐我會講，但冇乜點推過。原因因為不停燒錢，最初我甚至相當恥笑呢間公司，但睇真啲，路遙知馬加，最初我低估咗。冇錯仲係不停蝕錢，但首先而家投資者唔多介意呢啲嘢（又係錢印得太多之故）。最重要係，公司啲收入同用戶，一路都有唔錯嘅增長。

23. 耐唔耐講呢間公司，仲有一個原因：SnapChat一般係眾多社交媒體股中，最早出業績嘅，一葉知秋，往往就預示到之後Facebook Google Twitter（好少提）嘅業績，因為呢幾間本質都係廣告公司。

24. 好啦，SnapChat業績，今次當然係靚啦，你見公司股價盤後都彈升。

25. 蝕錢唔緊要，收入增長得嘛，按年增長67%（咁過份？！），2017年嚟最高。留意2020年收入增長曾經由44%跌到得17%，當時股價散晒，跌足40%。但之後又起死回生。

26. 另外你見，用戶增長都係勁嘅。DAU（每日活躍用家）2.8億，上季嗰時先話2.65億。而按年係升22%

27. 最後，公司嘅指引都好強，預期第二季收入可以有80-85%增長，嘩。

28. 買唔買得過？好似都…..ok．不過我可能會諗Twitter（Facebook就一路有堆，但剛剛先52週新高）

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。