美股業績好都照跌，港股大把承接力．LVMH 愛馬士 ASML 標普環球 全部新高．聯儲局通脹嘅嘢要計埋之前喎。係時侯買半導體股． 過去10年9個最醒同最笨嘅商業決定。Data viz 99個法則（同埋幾時唔跟）．歐超聯夭折。既然收檔美資仲唔走？ASM 太平洋逆市升兩成。 (Patreon)

快評幾句— 美股業績好都照跌（我地揀嘅股例外），港股大把承接力

大師冇點你—LVMH 愛馬士 ASML 標普環球 全部新高

每日一圖— 聯儲局通脹嘅嘢要計埋之前喎。係時侯買半導體股

Good Read — 過去10年9個最醒同最笨嘅商業決定。Data viz 99個法則（同埋幾時唔跟）

FB Post Summary — 歐超聯夭折。既然收檔美資仲唔走？ASM 太平洋逆市升兩成。

暗柳花明華富村，又有啲轉機。況且其實唔係咩大不了嘅問題，我都知過一排就慣，不過就係好憎咁。但還是要繼續，The show must go on．而我係唔會畀自己心情影響工作嘅（呢度，咪我嘅工作）

快評幾句— 美股業績好都照跌（我地揀嘅股例外），港股大把承接力

1. 繼續都係陷入一個唔上唔落嘅格局，但美股當然比港股好。港股就升極唔起但又未死晒咁，你見都幾多「抽水」行為，但即使美團嗰單，好似係史上最大嘅上市後集資，完全冇震散股價仲要倒升，證明市場仲係很多錢，至少肯買啲聽落故事好嘅公司。

2. 美股嘛，就有趣啲。正如我講，呢期都係睇業績，亦都講過除咗業績好唔好過預期外呢，你估值在咩位都係一個問題。睇返CNBC嘅分析（唔知要唔要錢），暫時67間業績勝預期嘅公司，平均股價要跌0.6%。史上平均係應該升1.9%，不過首先因為暫時未係好多公司出業績，二來，可能同個市比（相對表現）公平啲？但無論如何，高估值係一個問題。

3. （留意，在以上嘅統計，一間NetFlix都拖低唔少。因為公司嘅盈利都叫做勝預期，但投資者明顯係望住個上客量）

4. 之但係，又係嗰句。唔好，唔好，唔好清倉呀，甚至沽貨都唔好。邊買得返？

5. 而即係，「可能我啲眼光好啦」，但我地呢度啲股票，多數業績強勁後，都升喎。LVMH啦，AMSL啦（不過可能唔計美股），Black Rock啦。

大師冇點你—LVMH 愛馬士 ASML 標普環球 全部新高

6. 從簡，但，冇點你啦，LVMH 愛馬士都係上星期先推，我自己買埋一份。當時都新高，但照追的。當然心理上唔易過，但慢慢就慣。固然股票全部都唔平，但你要等慢慢放住啲錢等，都係難的。

7. ASML就推咗好耐啦，昨晚（星期三晚）出咗業績，指引又勁，絶冇問題丫，仲話可以提早完成個回購添。咁屈機嘅公司，去邊搵？可惜我都太遲先認識。最初（未開呢個Patreon）叫你買時咪 300蚊，而家650，一年多啲超過一個開，當然好。但就唔似係而家買仲可以升多5倍10倍嗰啲咯。（咁你想升一兩個開我估就得嘅）

8. 但我特別想講係SPGI標普環球，悶到飛起嘅一間公司，我有推，寫咗成篇文，我都有買，但望都冇乜點望。真係有買咗嘅讀者話我知我先知，不經不覺又新高。你睇下個圖近排真係每日陰啲陰啲上—但我推完（12月頭）時又係跌咗一浸的，如果手痕去企蝕又係嘥料。有機會之後寫下

每日一圖— 聯儲局通脹嘅嘢要計埋之前喎。係時侯買半導體股

9. 聯儲局通脹嘅嘢要計埋之前喎 —好似貼過類似嘅圖？唔肯定，貼多次吧。你見之前美國啲通脹率，雖然好似高過2%，但聯儲局一樣不為其所動，市場亦好放心。因為聯儲局都好早引導咗市場，覺得可以接受。除咗係覺得只係暫時性，另外仲有講你知：喂，之前幾年啲通脹好低喎，所以你而家就算臨時過2%，拉勻嚟講幾年都未過丫。都幾屈機，好似上學期考80分，下學期考30分然後畀阿媽打都仲要講拉埋兩個學期都合理。不如由小學計起？

10. 係時侯買半導體股—原文在Financial Times，應該要訂戶先睇到。但只睇圖都知，正係之前都有講嘅費城半導體指數。本身冇乜特別，亦有ETF可以直接買（SOXX）。但想講嘅係，半導體行業，之前其實係周期股，上上落落得個桔。但忽然呢幾年有一個結構性轉變，原因好多，有機會細講。另外留意，呢個行業往往係衰退時發圍的。

 Good Read — 過去10年9個最醒同最笨嘅商業決定。Data viz 99個法則（同埋幾時唔跟）

12. 過去10年9個最醒同最笨嘅商業決定＝ 唔使拗點解冇乜乜點解冇乜乜，揀呢篇係因為佢舉啲例都算係夠大，即係唔係啲聽都未聽過嘅公司。例如Netflix進軍串流，Facebook 買Instagram，微軟進軍雲計算咁，全部都可以做教材討論。留意佢係講決定，唔係公司，所以在最笨嘅之中，一樣有同樣嘅公司出現。但相對地最笨嘅冇咁好睇，最過癮可能係講YouTube捉錯用神。

13. Data viz 99個法則（同埋幾時唔跟） —極過癮，就只講Data Visualization 嘅99個行規—而真係有99篇文。但作者唔止話晒畀你知啲法則，係再挑戰返，話返你知有邊啲法則可以唔守，有邊啲最好跟。有晒例子同圖仲解埋你知，很好嘅文。你估到了，第一篇就係講Pie Chart

 FB Post Summary — 歐超聯夭折。既然收檔美資仲唔走？ASM 太平洋逆市升兩成。

15. 唔少時間都拎咗去寫歐超聯，其實仲有好多嘢想寫

16. 歐超聯夭折—都算同我預期中差不多，但估唔到咁快收檔。歐超聯出現，當然係背後有一大堆嘅矛盾，歐超聯並冇解決大部份，只係好似解決到少部份，然後製造更多問新問題，當然人人喊打。但物先腐而後蟲生，的確有好多結構性問題，累積多年都冇人理甚至冇人諗冇人問。例如最簡單嘅，到底球會係乜先？你想佢係點？你又願意畀幾多錢？

17. 既然收檔美資仲唔走？—但以上種種矛盾，好可能同美資嘅班主已經無關。歐超聯呢個計劃出現，好大程度多得美資班主仲有美資銀行。最初佢地買球會好多人都唔明為乜，因為球會唔搵到錢，佢地又唔係中東油佬或大陸土豪要威。最後明白：佢地想改變成個形式，令到由搵唔到錢變搵到錢。咁霸王硬上弓失敗後，應該想走人 — 但而家咁情況，有冇人出靚價接？可能又係賣返畀中東佬大陸佬。

18. ASM 太平洋逆市升兩成—都算係大師冇點你，好早已經提過隻嘢，但幾難炒下。其實舊年搞咩港版納指時已推，嗰時買完即跌，然後大反彈，早前又跌返。簡單啲嘅不如買ASML算。兩間公司有冇關係？同一個源頭咯，但而家冇乜直接關係，做嘅嘢又好唔同，規模都爭好遠。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。