Bitcoin嘅嘢。GBTC 同 BTCC嘅嘢。NetFlix上得400萬客，點搞？ (Patreon)

Bitcoin嘅嘢

GBTC 同  BTCC嘅嘢

NetFlix上得400萬客，點搞？

啲私事未解決，其實冇得解決，你當好似中毒咁，只能慢慢排走，但已好返啲。其實呢堆文應該早啲寫，但你知啦，生命邊有完美。為咗補償大家，你見呢兩日呢兩篇仲長過平時。

Bitcoin嘅嘢

1. 較為少講Bitcoin，但今日可以講下，而亦適用於其他嘅加密貨幣。當然我覺得其他更加唔使討論。

2. 加密貨幣呢味東西玩咗幾多年，照計去到一個可以開始有啲結論嘅時間。明顯之前我完全低估Bitcoin嘅走勢，特別係2018年崩盤後以為玩完，當時抽水抽得好興奮，完全冇諗過可以東山再起。你叫我解，都係因為錢印得太多。

3. 咁由於我之前嘅分析似乎都幾錯，所以睇唔睇落去就貴客自理。不過，雖然我嚴重睇錯個走勢，但我認為最初諗嘅嘢，唔少都係啱嘅，「但就係低估咗一樣嘢」。有興趣嘅睇落去。

4. 最初班支持者認為可以取代法幣，到呢一刻，我都唔認為可能，甚至越行越遠。最初我講嘅兩個問題，根本冇解決到。首先，隻嘢不停升，同埋你可以拎佢嚟做貨幣，兩樣嘢根本係矛盾的。你睇啲外幣好多都係零和遊戲 zero sum game：如果我知道英鎊不停不停咁升，我點會拎嚟交易？梗係自己儲埋。呢個你見到加密貨幣嘅情況完全一樣，話拎嚟交易嘅，全部都係噱頭，完全唔係嗰回事。我知，Tesla肯收嘛，嗰時話有啲公司肯收嚟做服務費添—但，你肯唔肯畀？如果真係長升長有嘅，點會拎去支付？或者如果係大升大跌嘅，點拎去做交易？

5. 不過，倒係第二樣嘢，好大程度上，加密貨幣取代咗黃金嘅功能。呢個就真係只要有多人信就得（雖然都仲係有個譜）。的確，你諗真啲，黃金有乜價值？都係冇嘅，亦冇政府支持，有人信咪得。加密貨幣取代唔到傳統法幣，但似乎取代咗黃金。當係inflation hedge又好，儲值工具又好，對抗法幣不停印嘅鏡子都好。

6. 我嘅睇法，其實都冇乜大變。都係認為失敗居多，但，「萬一我錯呢？」。所以我做法都係拎咗可以蝕晒嘅錢，十萬八萬買落去。輸晒，冇乜所謂（當然肉痛但唔使跳樓），贏少少嘅，冇乜嘢。但一個唔該升多一百倍，班粉絲變得有錢過你，就好難受啦。冇錯，呢啲就係fear of missing out，參予下嘛，可能自己真係錯呢。但我都係只係當option，just in case．

7. 至於最近期嘅發展，好似冇乜特別。固然你見Bitcoin價高位都跌咗唔少，甚至有人話CoinBase上市可能代表呢個神話落幕（搞咁多嘢咪又係拎美金）。但我比較睇到嘅係，越嚟越多監管問題。之前傳話美國財政部起訴金融機構洗黑錢嘅傳聞，相當流，唔可信。明顯係價跌咗先傳出嚟。但，土耳其走去禁，就唔係假新聞了。印度亦有類似嘅嘢，雖然係舊文翻炒。你見匯控禁晒你買啲相關股票，相信都有啲原因。

8. 可能有啲離題，但我會聯想到近期嘅歐超聯（長文，AND長文），另起爐灶夠浪漫，但官府如何忍你？呢個係一路解唔到嘅第二個問題。或者你睇隔離台利世民／李兆富嘅文都會講，統治者其中一個最大嘅權力，就係鑄幣權，法幣。點會讓畀你？ 何況，加密貨幣明顯係洗黑錢嘅溫床。

9. 亦因為咁，你呢啲嘢想打入主流，極難，我覺得真係死咗條心。之不過，你作為好似黃金甚至明星閃卡呀咁，當收藏品投資工具，就似乎仲可以嘅。

GBTC 同  BTCC嘅嘢

10. 順手講埋，固然理論上呢，睇好Bitcoin應該直接買。但我等科技盲，聽到又咩Wallet 又Key 又密碼，就頭都大，陣間又話交收畀人扑頭（幾咁之low tech）。咁反正我只係當投資，咪搵啲投資嘅工具

11. 之前寫過講過，買咗Grayscale Bitcoin Trust（GBTC）嘛，當時有人好言相勸，有溢價喎（是真的），不如買MicroStrategy（MSTR），我心諗，咪一Q樣，甚至仲衰。

12. 呢度可以解畀啲新手聽。記住，MSTR不過係一間公司，不過拎晒啲錢去買Bitcoin，但佢渣住嗰堆嘢嘅價值，同佢嘅市值，當然可以唔一致，呢啲應該買過股票都知，好多時有Discount 嘛。GBTC理論上好啲，因為叫做真係全部錢買晒Bitcoin，但都解決唔到以上嘅問題。

13. 仲有，市旺時個個去搶，亦有啲盲毛（例如本人）唔想搞咁多嘢，咁就見到會溢價去買。咁當然正如好言相動嘅朋友講，呢啲溢價係有機會會消失嘅。所以我買嗰時都已經揀溢價比較低嘅日子。當然，後來溢價變到大折讓，就當初估唔到，但唔算完全意外，冇諗到咁快啫。咁拉勻當然都有賺，但明顯跟唔足，例如你當Bitcoin升咗20%，可能我只賺到10%，因為我買時係溢價5%，沽時係折讓5%（隨口講嘅數字，唔使驗證）。你可以話相當搵笨。個溢價圖你可以在呢度見到。

14. 但我地要再去睇，點解會有個咁嘅情況出現，點解會溢價變折讓？首先，多數都係升嗰時人人溢價搶，跌嗰時人人溢價沽。另外，主要亦因為Purpose Bitcoin ETF（BTCC）出現咗，呢個先係結構性

15. BTCC，就真係一個ETF。咁你話GBTC唔係？的確唔係。而BTCC就解決到GBTC嗰啲溢價／折讓嘅問題。極技術嘅細節我唔多講，但個分別係，背後個溢價／折讓，有冇得arbitrage away？記得以前講盈富基金之類都提過，如果明明恒指跌10% 但盈富基金唔跌，自然有人可以套利。或者之前講咩南方東英嗰啲ETF都提過呢類機制，我啲機構投資者可以增發/贖回。情況亦都同之前講黃金嘅ETF差不多，你隻ETF平到失真嘅，我咪買完然後去換做實金（當然要大戶先得），反之亦然，所以自然平衡到。

16. 作為ETF嘅BTCC，就有呢個機制，會比較「公平」，所以一出咪拎走晒GBTC嘅份額，合理不過，我亦係因為咁換晒去BTCC。必需要講，唔係話BTCC一定「好啲」，但比較「公平」咯。「公平」in terms of 跟得貼（而理論上呀下，你如果折讓嗰時買GBTC，溢價時沽走，咁你賺得仲多過齋買Bitcoin添）

17. 最最最後，咁BTCC係咪真係跟得貼？應該唔少人問。可以慢慢再實驗，但我目測都係嘅。最煩係Bitcoin廿四小時交易，甚至星期六日都有，波幅又大，但BTCC之類每日只係幾個鐘。不過大約都有個譜嘅

18. 好彩今日啲波幅已經細返啲。你計高位嘅，咁Bitcoin 67350，而家跌到55550左右，大約18%，BTCC嘅，高位12.1，而家10.68，12%，「跌得少啲添」。但因為真係時間唔完全一樣（好似Bitcoin高位係加拿大開市時段以外的），加上Bitcoin用美金我呢隻就加紙，都有啲複雜

19. 或者另一個比較好嘅方法（可以我做，或者義工讀者做，或者你自己做，或者搵人公司有Bloomberg做），亦留意返，BTCC 官網有每日公佈埋佢隻嘢個NAV，你見應該個股價係跟貼的，冇GBTC嘅問題，但佢每日只公佈一次（一般做法都係），如果冇睇錯係收市先出。

20. 當然，你心諗，佢個NAV準唔準？鍾意自己計亦都係得的，留意佢有講佢毎股等於幾多個Bitcoin，你自己開住計都得，甚至整個Spreadsheet都可以。咁佢個NAV，應該係等於佢持有幾多個Bitcoin，乘返Bitcoin價咯，當然留意返貨幣。我計過大約係OK準嘅

21. 留意埋，佢個BTC per share 呢，如果我冇估錯（之前我冇紀錄低），應該係每日會縮啲的。知唔知咩回事？唔係出術搵你笨，而係，管理費。嗰1%管理費就係呢度反映的，每日會縮少少。

22. 最後留意，其實BTCC有三隻，佢地網頁都有講，一隻加紙（我買嗰隻），一隻美金，一隻FX Hedged．分別，其實冇乜，唔好自製更多煩惱。當然你本身係加拿大人或美國人嘅，就用返自己收入嘅貨幣咯。

23. 咁真係最後嘅，都勸大家開返個IB戶口，暫時唔係廣告。用落我覺得整體還不錯，當然我冇用咩富途之類冇得比較。但你見好多時啲讀者話，買唔到呢隻，買唔到嗰隻喎。咁的確你普通美股戶口（例如我之前用匯豐花旗），啲Pink Sheet 嘢，或者啲ADR，你會買唔到，例如之前講嘅LVMH或愛馬士。另外加拿大股（例如今日講嘅BTCC）亦買唔到，加上匯控亦唔畀你買各種加密貨幣相關嘅嘢，都幾煩。

24. 點解「暫時」唔係廣告？因為其實嗰邊有搵我傾，真係可能可以幫大家拎到個平啲嘅plan咁，當初我仲在公司返緊工就唔方便，亦都唔見得有好大需要。但而家又唔同你。咁我會再去同嗰邊傾下，有消息就話畀大家知。

NetFlix上得400萬客，點搞？

25. 最後快手講埋Netflix 業績，因為唔想成篇都講Bitcoin。亦唔想夾硬又放去星期三晚。加上都懲罰自己，遲咗出就寫多啲（雖然有人覺得你懲罰埋讀者，但你幾時都可以選擇skip）

26. 咁你睇盤後反應都知，梗係唔得啦，出完業績股價即跌10%。

27. 直頭舊文都唔使你睇（因為得好細段關事），睇圖入面嘅就知市場預期乜。

28. 好啦，出到嚟點呢？出到嚟收入72億，升24%，合預期丫。每股盈利3.75，升1.4倍，好過預期添。純利？有錢賺嘅，14億。你當一年賺56億，市值2430億，43倍市盈率，好似唔係好過火啫？

29. 問題就係在個增長前景，同埋上客（早話有啲公司唔止睇收入同盈利）。舊年第一季係1577萬，咁當然今年第一季冇可能有咁多啦，街估629萬，公司指引係600萬。點知？得400萬。大鑊喎

30. 唔止，公司仲預期第二季都暗淡，得100萬新訂戶，街原本預可以去到450萬，點搞？雖然公司又預下半年會加速。但亦預第二季嘅收入係72億左右，即係同第一季差不多一樣。

31. 有機會細評，但點睇公司都係面對一個好難克服嘅問題：要訂嘅人都上咗，又睇下點出法寶了。理論上，就係「入大陸」，但講就易，唔多可行。可行啲可能係諗印度印尼之類。或者，加價。仲有，禁止你啲人共享戶口咯。

32.