ivanliresearch

睇NetFlix 業績，仲有美股資源共享．冇呃你，真係輸錢呀！長江基建52周新高．1000蚊買疫苗股而家值幾錢？歐洲五大公司。咩國家多兇殺案？「iPhone己死」。亞馬遜Private Label。Ponzi Career。 (Patreon)

Published:

2021-04-20 11:00:42

Imported:

2021-07

Content

快評幾句— 睇NetFlix 業績，仲有美股資源共享

大師買啲乜—冇呃你，真係輸錢呀！

大師冇點你— 長江基建52周新高

每日一圖— 1000蚊買疫苗股而家值幾錢？歐洲五大公司。咩國家多兇殺案？

Good Read — 「iPhone己死」。亞馬遜Private Label。Ponzi Career。

FB Post Summary — 匯控禁買CoinBase。歐洲超級聯賽。美團不認不認還需認

1. 有啲私事，幾日冇出文，呢篇就係星期一嘅（你星期二黃昏收到）。星期二晚嘅都會照出。唯獨係週末嗰篇就要等多幾日，但應該都會寫，寫譚仔。所以都係有拖，冇欠。

2. 見到都唔少讀者問做乜幾日冇文，順手問我乜事，都客氣嘅。繼續支持就係幫我解決所有私事嘅動力。記得叫埋朋友睇，財政能力許可嘅咪上20蚊或40蚊會員。我主要嘅問題都係嚟自錢銀問題

3. 另外有工作介紹畀埃汾太嘅都可以PM我，雖則佢好似冇乜特長，可能普通文職炒散都得。

4. 無論如何，the show must go on，寫遲咗但唔會渣流灘求其寫的。況且亦因為呢排市況較靜所以覺得遲啲出都唔大分別。

快評幾句— 睇NetFlix 業績，仲有美股資源共享

5. 不經不覺又到美股嘅業績期，幾間美資銀行打咗頭陣，固然全部都勝預期，但之後幾間股價都麻麻地。不過股票嘅嘢難玩在佢唔會話你知點解升點解跌，我認為好可能係因為近期美債債息落返，所以先令啲銀行股受壓（加埋之前升咗唔少）。但至少你識睇業績（都好簡單）勝唔勝預期，唔好因為個股價跌就夾硬以為個業績唔得—雖然，亦有個講法話美資銀行今次嘅業績雖然強勁，但真係可一不可再，涉及好多因素（包括舊年嘅基數低，以及今年第一季啲新股呀，發債呀，特別係SPAC好旺）

6. 上兩次（第四季同舊年第三季）業績期都幾納悶，啲嘢好多都勝預期，但股價照跌。今次就好似好啲，上面講嘅銀行似乎係個別例子。你見其他公司，包括我地講過嘅LVMH，BlackRock，業績後都係再創新高嘅。

7. 但重頭戲當然係啲科技股，亦係我呢期比較有信心嘅。今晚（星期二）就有NetFlix，寫唔切Preview，但話定你知，預期收入71.3億，按年升24%，每股盈利2.97，升89%。不過重點應該係在上客量，舊年第一季極好，1580萬個新訂戶，當然係因為疫情。今年第一季肯定大幅放慢，街估600萬個左右。另外，留意公司之前提過下可能回購，如果今次業績宣佈，應該會十分震憾—但對中長期股價係咪好事？可能即係預示公司已經過晒高增長。

8. 然後聽晚（星期三）仲會有ASML，但堆最大嘅FAANG，要等到下星期

9. 順手講，其實美股多數業績都係勝預期的，打龍通嘛，公司平時會引導分析員啦，見佢地估嘅數太進取又會吹雞暗示下，而公司嘅盈利雖則不至於全部係「造」出嚟，但總有啲位可以早啲遲啲入數，可以調節下，有研究做過有啲公司真係每季都剛剛好勝預期少少的，話巧合冇人信。

10. 最後畀埋啲資源共享，美股嘅好處係資源多（但，如果想跑贏大市，呢個未必係好事，因為人人都有）。如果睇標普500指數成份股業績嘅，呢個幾好，最正係畀你睇埋之前幾次業績好定差。美中不足係唔會即時update埋「今次」業績。輔助嘅可以用Zacks，最正可以順market cap咁去sort．如果只係睇一隻一隻股票嘅，Nasdaq嘅網都幾好，都有之前啲表現。留意唔止係Nasdaq上市嘅公司先有，NYSE都有的— 「但其實啲數都係Zacks度嚟」

大師買啲乜—冇呃你，真係輸錢呀！

11. 冇呃你，真係渣住呢啲的（當然仲有其他嘢）。當中個重點當然係Bitcoin價大跌，咁你見我堆BTCC都輸咗近9%的。但唔理的，唔會玩咩「止蝕」，況且Bitcoin一定預波幅大啦。應該今晚（星期二）嗰篇會詳細寫。

大師冇點你— 長江基建52周新高

12. 冇乜特別，都算推得多嘅股票，悶嘢一隻，收下息（但當然個息率可以帶動股價）。留意係只係52周新高—唔係歷史新高，之前係跑輸唔少的，但反正呢隻係我月供嘅股票之一，都好多年，冇乜大所謂。人升時佢有時就跌，呢排悶市就發力，個組合應該有啲行法同其他唔同嘅股票。

每日一圖— 1000蚊買疫苗股而家值幾錢？歐洲五大公司。咩國家多兇殺案？

13. 1000蚊買疫苗股而家值幾錢？—答案，「睇你買邊間」。但真係普遍冇你想像中咁高回報。關鍵兩個：首先，疫苗其實並非好賺錢嘅業務，亦好可能只能賺一浸。另外，大藥廠本身有好多其他業務，所以升得多嘅都係細廠。而咁多間夾埋，其實跑唔贏標普指數

14. 歐洲五大公司—估唔估到係呢五間？照計我啲文都成日講，應該估到我成日推嘅LVMH同ASML都係五大。留意五間中只得ASML係科技股（仲係硬件），並冇中國或美國嘅嗰啲Big Tech。另外，呢度嘅歐洲五大，包埋英國了，但英國居然冇一間公司入到五大。如果我冇睇錯，連十大都好似冇。可以參考呢個網。

15. 咩國家多兇殺案？—當然係計兇殺率，否則一定係人口最多嘅中國美國。另外留意，係指兇殺案，唔一定係謀殺—因為可以係誤殺，甚至自衞殺人，亦都唔計任何意外。結果？原來同貧富不均好大關係，幾時都話眼紅人係一個好大嘅仇恨力量。原本個研究仲有做埋其他嘢，有興趣可以睇。例如話同打唔打機似乎關係不大，而同擁槍多唔多居然關係都唔係好大的。

Good Read — 「iPhone己死」。亞馬遜Private Label。Ponzi Career。

16. 「iPhone己死」—留意到個引號呀可？原文係講Golden Age of the iPhone Is Ending，但差不多啦。並唔係極新嘅觀點，都係講人人有手機，對手又識抄之類。不過留意嘅係：iPhone沒落，不代表蘋果沒落嘅。公司明顯早早都知道呢一日點都會嚟，算係有諗方法應對—就係：靠服務收入。仲有，大陸同印度印尼。

17. 亞馬遜Private Label—唔止一次貼Benedict Evans嘅文。今次講Private Label，即係「超值牌」「特惠牌」「情熱價格」，零售商（超市）出啲貨品直接同你競爭，好屈機（無印都係咁起家）。但正如作者講，呢個玩法150歷史了，做乜唯獨針對亞馬遜？當然亞馬遜在自己網站嘅先天優勢，又似乎勁過百佳惠康了。

18. Ponzi Career —小小深但幾有趣，由David Bowie嘅 Bowie Bond開始講（賣斷所有將來嘅版稅），然後講啲學校收你將來嘅收入做學費，然後講不如直頭可以賣身：例如個大學生，你可以畀100萬蚊買佢將來五年嘅收入，咁你就評估下佢係咩質地啦。仲可以搞到好似股票咁，大家入股，買斷我成世嘅收入。然後搞搞下呢，根本就係Ponzi Scheme，不停搵人接火棒，反正最早「入股」嘅一定會想唱好你，甚至會有人寫報告分析。可以用嚟寫科幻小說。