悶悶地但道指連升四星期．三日輸兩成嘅教訓． LVMH 愛馬士 Microsoft Google NVIDIA Blackrock全部新高．CEO人工10年加七成。分析員例牌高估公司盈利（但點解業績又多數高過預期？）．點解硬係夜晚唔肯早瞓。日日上FB睇新聞以為好快世界末日．CoinBase「招股價」。花旗大清洗。譚仔上市 (Patreon)

快評幾句— 悶悶地但道指連升四星期

大師買啲乜—三日輸兩成嘅教訓

大師冇點你— LVMH 愛馬士  Microsoft Google NVIDIA Blackrock全部新高

每日一圖— CEO人工10年加七成。分析員例牌高估公司盈利（但點解業績又多數高過預期？）

Good Read — 點解硬係夜晚唔肯早瞓。日日上FB睇新聞以為好快世界末日

FB Post Summary — CoinBase「招股價」。花旗大清洗。譚仔上市

快評幾句— 悶悶地但道指連升四星期

1. 市況？冇乜好講喎（所以我留到而家先出文）。道指標指又新高，道指直頭連升四星期，納指都好大機會下星期就破頂。

2. 原因？認真，試下唔好不停諗原因，特別係一日半日。不過真係要睇嘅，留意近排啲美匯指數弱返好多，一般都知弱美金對股市好。但點解美金弱？就考起，可能又要講下債息冇再升之類（亦可能因為咁你見啲銀行股業績掂都冇得點升）

3. 但都係嗰句，呢啲悶市其實對於儲貨嘅最開心。你得幾萬蚊股票嘅，唔想佢咁快升添呀，我未買齊唔好開車住，當指數下星期忽然升50%，你覺得真係好事？當然，股票，特別係美股，肯定唔平。但呢句都講咗好耐，一路等等等亦唔係辦法。幾時都話有閒錢咪拎去買咯。我而家嘅現金差不多去到0%了。

大師買啲乜—三日輸兩成嘅教訓

4. 再講一次，呢個環節唔會常設，但呢排多買賣，循例講下。順便畀大家睇下我真係真係買嘅，唔係得個講字。

5. 正如之前提到，星期五晚已經沽咗隻Voyager Digital，真係不要提了，唔貼圖，傷心。個故事係估CoinBase上市佢會炒起嘛，結果CoinBase星期三上市，表現麻麻，呢隻嘢星期三跌咗近10%，但我瞓咗嘛。咁原本話星期四沽，但又係早咗瞓，結果冇乜點。然後到星期五晚咪沽咗！當時係差不多再跌10%。而你估到了，我沽完後，星期五尾段佢咪彈返，可能因為CoinBase都回勇。

6. 呢個係一個好好嘅教訓兼反面教材。重點都未必係我呢排好早瞓，但如果你係玩呢啲短嘢嘅，就可能更加傷神（我越大越發現呢樣嘢好重要）。另外，真係搞咁多嘢當自己股神做乜呢？差不多三日就輸咗我20%，萬幾蚊港紙。「我打幾多篇文先搵得返」？

7. 當然，萬幾蚊都仲係我蝕得起嘅數字—其實就算total loss六萬蚊輸晒都「蝕得起」。咁講有啲極端，但買股票你係應該預可以輸晒啲，只有閒錢先好買落去。另外，呢啲對我嚟講就真係零食—我唔係話自己好富貴，而係話，我真係核心嘅持股會有一堆正路好多嘅嘢，同埋呢啲零食唔會佔我身家好多。而當然其他股票有賺啦（成堆嘢都新高喎）

8. 無論如何，沽完後，亦都正如之前所講，買入愛馬士。而家我呢個IB倉，就正如之前話你知，GBTC已全數賣晒（獲利少少）。BTCC（加拿大上市）有9萬港紙，LVMH有8萬蚊，愛馬士4萬咁。但，當然呢啲只係我少量持股（我做咗廿幾年嘢啦）—呢個IB倉其實係買啲古靈精怪ADR 或者 非港股美股嘅。留意呢啲都係長線的，事實股票根本就應該長線，唔係長線嘅我會講明（例如剛剛輸錢嘅Voyager Digital）

大師冇點你— LVMH 愛馬士  Microsoft Google NVIDIA Blackrock全部新高

9. 冇乜特別啦，LVMH同愛馬士，我都係新高時追入去，之後就再升。固然新高時再追心理上唔易克服，但跌嗰時你又未必咁買啫，呢啲長期投資嘅嘢，我有時股價都唔望的。

10. 至於另外，Microsoft，BlackRock，NVIDIA，Google呢啲都新高，但唔算太有力。

每日一圖— CEO人工10年加七成。分析員例牌高估公司盈利（但點解業績又多數高過預期？）

11. CEO人工10年加七成。—Er……其實我覺得完全唔多，比我想像中低好多。無論如何，講個圖先，標普500指數公司CEO嘅收入，中位數，計晒所有人工花紅同option奬勵（但留意，如果CEO係大股東，咁啲股息，或者股價升，當然唔計）。2020年係1372萬美金，2019年係1277萬，都加咗7%。「經濟好差」「業績又唔得」「而好多員工被炒」。之不過，CEO嘅任務，理應係為股東謀利益，即係令股價升。咁2020股票真係勁升喎。同埋，如果你拎10年比，升咗73%，「一年升6%」，好似唔係好多咋喎。你睇下標普指數升咗幾多？

12. 分析員例牌高估公司盈利（但點解業績又多數高過預期？）— 都幾簡單嘅圖，睇返啲分析員估嘅數，同真係出業績嘅數。你見特別係估4Q 5Q，一年以外嘅，明顯係慣性高估的。之但係，你又有冇奇怪，點解明明又好似話多數公司啲盈利都高過預期（是真的）？兩者有冇矛盾？答案好簡單，睇返圖，見到個嚟緊一季，分析員多數幾準，甚至係低估（可能故意，而公司亦都樂於「配合」）。然後？出完一季後，咪會調低嚟緊一季（原本2Q 而家變1Q）嘅數，到下一季時又會業績勝預期。

Good Read — 點解硬係夜晚唔肯早瞓。日日上FB睇新聞以為好快世界末日

13. 點解硬係夜晚唔肯早瞓—應該好多人都係咁，瞓覺都有拖延政，碌下電話先睇下Youtube先。點解？因為覺得自己主宰嘅時間太少，咁早瞓咪冇晒自己時間。另外，更加怕未咁快瞓著，怕蝕晒，所以做啲嘢等到自己累極先瞓著。當然呢啲係唔好嘅習慣（近期我改善咗了！），篇文有討論，仲教埋你點克服。

14. 日日上FB睇新聞以為好快世界末日—其實係講類似Factfulness呢本書嘅嘢（本書幾出名）：媒體（廣義）梗係報喜不報憂，慢慢嘅改善唔會上到新聞。呀作者話早已經唔睇新聞，但你只要上社交網一樣避唔到。你發現周圍都係散佈負能量嘅人，每日都話你知世界末日聽日打仗。而我唔係販賣啲廉價正能量比大家，但的確，上少啲網睇少啲港媒係有益身心的。睇就睇鬼媒。正如作者講，世界係屬於樂觀者嘅，唔係啲人人講爆煲嘅人。

FB Post Summary — CoinBase「招股價」。花旗大清洗。譚仔上市

15. 寫咗唔少無聊文，冇乜建議性嘅（例如譚仔嘅「生腸」）呢度就唔貼了

16. CoinBase「招股價」—呢篇算係比較好，都係針對話，你見COIN第一日上市，啲友講升三成。但同乜比？同個「參考價」250比。但個「參考價」點嚟？其實好求其。根本你話500蚊或者100都得。另外，留意下，啲公司市值有幾多，有時都唔係咁易答，因為一上市唔知啲股權行唔行使。

17. 花旗大清洗—香港冇乜人講，但外國就多，花旗摺埋十幾個國家嘅consumer banking（即係平時你去分行，仲有信用卡嗰啲）。當中包括台灣，中國，印度。但唯獨歐亞中東係剩返四個地方：倫敦，新加坡，香港，杜拜。可以諗下點解，怕且唔係杜拜人權好或者有法治。

18. 譚仔上市—可能週末寫，但真係冇乜特別。的確係幾好賺的，往年咁嘅市況佢唔計攻府津貼都仲賺9300萬。但抽唔抽得過？睇定價先啦，咪又係嗰句，10蚊你話抵，咁100蚊抵唔抵？1000蚊呢？總有個價嘅

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。