道指標指又新高，債息跌，又話冇咁快加息啦喎。BlackRock業績勝預期，純利升五成，股價又新高今晚買愛馬士！領展823今年加得返租喎 (Patreon)

道指標指又新高，債息跌，又話冇咁快加息啦喎。

BlackRock業績勝預期，純利升五成，股價又新高

今晚買愛馬士！

領展823今年加得返租喎

1. 係喎，遲咗出文喎，但冇乜特別嘢。主要係呢排我開始回復返啲「正常」作息，即係十二點前訓，然後六七點起身，「大家應該替我高興」。咁有幾日咪會七八點出文，但其實未食早餐寫文唔係幾好，反正今日寫啲嘢又唔係太時間性，就遲咗少少出。

道指標指又新高，債息跌，又話冇咁快加息啦喎。

2. 美股繼續創新高，道指標指固然創新高，納指都應該就快。冇錯之前我係話睇得保守啲覺得有調整，但都不停提叫你唔好清倉，我自己都一股不沽，而家知點解啦。煩氣講點解有呢種好似「矛盾」：首先，我可能錯架嘛！你信晒我，我錯咗點算？第二，話會調整，但可能升多40%先調10%。三來，就當真係你清完倉即跌，避開咗，但幾時買返？有時等等等，見升返你又唔敢買返，然後又錯過一個大浪。所以搞咁多嘢，不如都係不變應萬變，只係睇幾時買，買乜，未必諗咩沽貨清倉啦。股票多數都係升架嘛。

3. 比較估佢唔到嘅係美國啲經濟數字極好（retail sales），但債息居然跌落嚟，跌穿1.6%—雖然個幾月前1.5%又已經叫晒救命，所以講真的，有時睇得太貼反而自己煩。

4. 至於債息點解會跌，都夠奇怪，事後搵理由咪可以話聯儲局主席講明唔會咁快加息（又同其他委員講唔同，但今次主席講，點都一槌定音）。又或者，你可以話因為聯儲局仲繼續買緊債（睇圖）。之但係，你見早一日前，主席又話你知，加息之前可能好早已經開始縮表。明顯啲人聽一半唔聽一半，見個市升就只講一半。好混亂？都係的，所以可以睇多次對上兩段最尾講嘅嘢。

5. 使乜搞咁多嘢跟咁貼？你見我完全有時唔睇市大覺訓都係咁。你當學習日日睇我啲文當然好，但唔好畀啲嘢令你今日又買聽日又賣咁震嚟震去。而我發現而家因為佣金平，啲人係更加鍾意出出入入，反而係壞事—好耐前都講過，啲人買樓坐得穩，唔會升少少就沽，正係因為交易成本大，你唔會無啦啦半夜起身去廁所沽咗層樓。

6. 最後少少技術嘢，你見我貼個圖，債息又明明係升喎。因為，美債近乎係24小時交易，咁在亞洲時段已經升返唔少了。

BlackRock業績勝預期，純利升五成，股價又新高

7. 當然要寫下BlackRock業績，星期四晚開市前出的，當然業績係好啦，高過預期，又創52星期新高。悶悶地，好公司，但肯定唔平。你諗下個邏輯都知：美股都創晒新高，而一路都話美股唔平（甚至超貴），咁有幾可會有啲公司好平丫。舊年咪有咯，但當時又唔敢買嘛，冇計的。

8. 不過除咗回呢啲帶，都畀啲新嘢你，只講今次業績。鍾意可以睇返公司新聞稿，或者Factsheet，或者最簡單睇CNBC報。

9. 好快講，盈利按年升49%，但當然係因為個AUM（asset under management）帶動，AUM由上年6.5萬億美金，升到而家9萬億，升咗40%，今年去到10萬億（10 Trillion，到底係乜概念？）指日可待。主要流入都係嚟自ETF

10. 你睇收入呢，就只係按年升19%。但嚟啦喎，開支仲要按年跌嘅！所以拉到去個盈利就升49%。以前已經講過呢個係 BlackRock呢類公司好殺食嘅地方，AUM升收入升，但你開支唔會跟住先咁多，往往冇乜點變。

11. 特別留意，如果睇CNBC報呢，又話個盈利按年升16%。呢個16%就係adjusted basis，官方盈利就係升49%的。至於信邊個，就……都好難三言兩語講得到。但主要係公司舊年有啲tax benefit，做慈善喎。

12. 都係嗰句，講平一定係唔平，但平時嗰時你又唔敢買嘛。理論上你可以「等佢回」，但等幾耐？況且，其實推BlackRock都推咗好耐，中途有一輪都橫行（而隻嘢根本冇平過），都唔係話忽然業績升五成嗰種。所以，都係有錢就去買啲優質股，放埋一邊，係比較簡單。頂得悶嘅就不如買指數算。

今晚買愛馬士！

13. 冇呃你，話好早訓咗嘛，結果連隻Voyager Digital都冇沽到，沽遲咗兩日，雖然昨晚（星期四）隻嘢冇大插，仲有得升。不過CoinBase就冇咁好彩啦，隻嘢表現真係麻麻地，雖然你都可能聽到，CathieWood不停買緊，但整體我都覺得隻嘢唔值得買。你睇好Bitcoin嘅，咪買Bitcoin咯

14. 今晚就真係會沽埋隻Voyager Digital，「除非佢大升」，有剩嘅錢我用嚟買愛馬士，股票啦，唔係手袋。另外，都係嗰句，其實唔打算成日講我啲買賣嘅，都係只買不賣多。呢隻Voyager Digital，手痕就搞到我輸咗幾千銀。搞咁多嘢做乜呢。

領展823今年加得返租喎

15. 都講少少港股。香港嘅re open trade應該仲有得玩嘅，除咗之前講嘅友邦1299，或者莎莎178周大福1929之類（數字係好轉中，但一早炒咗上去了），當然仲可以留意啲商場。之前太古地產1972或九倉1997都升唔少，而家仲值睇嘅，可能係隻領展823

16. 首先，領展的確啲場係公屋呀之類多，並唔係太古或九倉啲高檔場賣自由行，咁你見舊年嘅影響係細的，所以相反地，重開返對佢嘅幫助都唔係極大。主要係間接嘅幫助，其他租貴返，佢地亦都加到租，咁嘅原因。

17. 另外，大約你都估到，債息高，係對領展呢啲叫做收息股，不太有利嘅。所以你亦見到雖然呢排股價升到1個月新高，但同高位都仲有唔少距離。

18. 不過而家嘅好消息係，佢地應該今年可以加返租，你見有專稿講。事實係疫情之下佢地都冇乜點減過租，民生低端場冇乜減租空間。留意，公司係3月月結，即係5/6月先出全年業績。咁你而家望股票機見到嗰個3.8%股息率，係再上一年（2019年4月至2020年3月）。但我幾有信心，5/6月出業績，個派息唔會減（中期都冇減到）。而既然之後有得加租，派息應該更加冇乜可能減。

19. 講咁多嘢，即係呢3.8%，可靠嘅，將來幾年應該有多冇少。咁你衡量下，美債就升咗好多，1.6%左右，你話3.8%股息極吸引又未必架啦，但而家呢啲位買，我估都安全嘅。

========================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。