大市冇乜力，JP Morgan 業績好都要跌．CoinBase果然唔掂．LVMH 業績極強．美股淡友全數打靶。亞馬遜「入均收入」係蘋果十份一。投行到底做啲乜？通脹其實係啲乜？Buscation．由NVIDIA講到分析員生態 (Patreon)

快評幾句— 大市冇乜力，JP Morgan 業績好都要跌

大師冇點你— CoinBase果然唔掂

大師買啲乜—LVMH 業績極強

每日一圖—美股淡友全數打靶。亞馬遜「入均收入」係蘋果十份一。

Good Read — 投行到底做啲乜？通脹其實係啲乜？

FB Post Summary — Buscation．由NVIDIA講到分析員生態

快評幾句— 大市冇乜力，JPM業績好都要跌

1. 係冇乜好講喎，悶，美股悶，港股又悶（不過星期三反彈返啲）。明顯見到係冇乜力，但，都要抖下氣啦，今年美股走勢已經相當好。如果對啲月供呀定期投資可以玩長線啲嘅，呢啲悶市先好．當然唔係話悶完即升，可能悶完再插，但升得太急你又追唔切又易摸頂，跌得太急又會驚，人之常情，唔敢買都事小，低位亂沽先大鑊。所以啲可以儲貨嘅，而家係幾好嘅時機（雖然，完全唔平）

2. 特別你睇JP Morgan就一葉知秋，明明出嘅業績勝過預期，但股價都要跌。當然你可以話只係因為我成推呢隻，又自己買咗（係喎，但唔太多）先特別敏感，另外Goldman Sachs或者 Wells Fargo出業績好之後咪又照升。但我型住嚟緊都係一個「業績勝預期但股價唔升」嘅格局，又睇多幾日。

大師冇點你— CoinBase果然唔掂。

3. 拿，呢個我真係要講！你見有啲報導（包括呢張圖）會話你知，「第一日上市升31%」，呢個真係錯得不能再錯。有睇文嘅你知道，升乜春？都冇招股價，你個升同跌同乜比？哦，同個「參考價」相比，250蚊，但個「參考價」係乜？純粹為行政理由架咋！我話500蚊得唔得？好似都得。然後你個表現就變咗「上市大插」乎？

4. 重要嘅係兩樣嘢，第一，當日開市買嘅，多數都中伏啦。第二，一路都吹話估值10000-15000億美金嘛，明顯你連個下限都去唔到啦（開市掂到10000億一下）。

5. 而呢度仲涉及一個更煩嘅問題，「到底公司市值而家幾多？」，你心諗，襟下機咪知。真係咁簡單？你見計收市價，FT話760億，CNBC話858億，即係點？咁read the fine prints，FT話你知，Coinbase would be valued at $85.8bn including options and other kinds of stock-based awards。邊個「準」？都難答，似乎係應該計858億，但點計都好，都冇最初講嘅10000億，甚至暗盤嘅15000億。

大師買啲乜—LVMH 業績極強

6. 順手交代埋啲Trade，留意呢個唔係常設環節。首先我唔係經常做Trade（近期都覺得自己太多了），主要都係Buy and Hold。另外亦冇打算買乜都會貼晒，因為有啲月供嘅嘢呀，有啲長期儲嘅嘢咁，雖然你見有堆嘢我成日講同推。唯一算係可以答應（但當然反口冇後果）你嘅，沽咗會話你知，反正我好少沽貨，換馬都少。詳情睇舊文。

7. 「但就係呢排有啲換嚟換去」，快手交代。講過了，啲GBTC沽晒（賺到啲），然後轉晒落去BTCC（加拿大股，算係真ETF，應該冇乜折讓），星期三晚已做。

8. 另外，因為隻CoinBase似乎麻麻地，所以之前講隻Voyager Digital大插，今晚（星期四）我會沽埋佢，除非開市大升啦下。「點解星期三晚唔沽？因為我一早訓咗」。咁就輸咗幾千銀，真係當賭錢咋，炒股害人又一例證。

9. 最後，未得閒寫，但以前都成日講LVMH，HomeBlogger就大半年已講，呢度都半年前，當時100蚊（當買美股OTC 嘅LVMUY啦，而IB理論上你可以買到歐洲嘅LV正股），而家150。但我昨晚都係飛咗入去，一路想買，見業績勁咪買，冇錯係新高時飛入去的。買LVMH買咗8萬蚊，而家就差不多冇cash了。「幾皮嘢就梗有嘅」，但真係差不多又去返100%股票了（唔好計層樓，複雜）。

10. To Sum up：呢個新開嘅IB爛鬼倉，GBTC已全數賣晒。BTCC有9萬港紙，LVMH有8萬蚊。仲有如無意外今晚（星期四晚）沽晒啲Voyager Digital—Hopefully拎返5萬蚊—然後我會拎去買愛馬士（我就會鍾意輕描淡寫咁，等你篇篇文都要睇晒）。再講一次，當然我仲有好多其他股票嘅（定你以為我得十幾廿萬持股？）

11. 最後再講一次，呢個環節唔會常設，最好唔好做咁多Trade，特別係沽貨或換馬，我都係好少嘅（正因為好少先可以次次同你講）。

每日一圖—美股淡友全數打靶。亞馬遜「入均收入」係蘋果十份一。

12. 美股淡友全數打靶—如圖，如果冇睇錯係指美國散戶。睇淡嘅人只得20%（雖然唔知點定義），兩年最低了。之但係係咪好消息？梗係唔係，相反理論別人貪婪時我恐懼嘛，正係咁我先開始保守啲。有眼你睇，最多淡友嗰時咪舊年4月—正係最值得買股票嗰時。而家個個都睇好，仲唔調整？之但係，又話埋你知，2019年3月（上次得咁少人睇淡之時）之後，美股都係小小整固後照升嘅。冇喎，唔係次次準到包生仔嘛。

13. 亞馬遜「入均收入」係蘋果十份一—指嘅唔係「員工收入」，而係company revenue per employee（雖然兩者會有關係）．咁你睇到蘋果差不多一個員工「貢獻」200萬美金收入，亞馬遜？20萬左右。當然你會話，「冇可比性」。的確係，蘋果就係一門印錢嘅生意（拿，「品牌」呀！）。亞馬遜好多倉庫工人司機之類—但之後你又見到，點解佢要渣到啲工人咁盡，點解要打壓工會—因為佢盤生意對人工敏感度好高。相反蘋果啲才俊，貴啲冇所謂。

Good Read — 投行到底做啲乜？通脹其實係啲乜？

15. 兩篇都好好睇（其實貼得嘅都好睇）

16. 投行到底做啲乜？—留意唔係「投行員工做啲乜」，而係「投資銀行其實係做乜」。原文What Sort of a Business is Investment Banking? 「投行到底做乜生意？」更妙。不妨問下自己或者身邊人呢個咁簡單嘅問題。可能會有人答「搵好多錢咯」（呢個唔係好答案，都話唔係問員工）。「呃人咯」（呢個答案對大多數公司都適用）。「炒股票咯」（其實唔係）。「幫人上市咯」（近磅）。呢篇文用個有趣啲嘅角度話你知，簡單嚟講，就係Take Risk, Match Risk, Source Risk．當然呢個某程度係官方嘅講法，有機會寫多啲。

17. 通脹其實係啲乜？—又係不妨問下自己或者身邊人呢個咁簡單嘅問題。但呢個易答啲，特別你問啲師奶就答到你，「啲嘢貴咗咯！」。問啲識啲唔識啲嘅周街大學生反而同你吹一大輪咩 CPI PCE。呢篇文（又係Charlie Bilello，佢就快問我收返錢）話你知，好簡單啫，咪就係Too much money chasing too few goods。但官方永遠只話你知通脹2-3%

FB Post Summary — Buscation．由NVIDIA講到分析員生態

19. Buscation—無聊文，主要講我坐巴士（！）嘅經歷，仲有年少時坐輕鐵單丁位幾粒鐘溫書，由元朗坐到屯門碼頭又坐返去元朗來回幾次，希望呢啲惡行唔好畀人公審，你知而家啲友架啦。

20. 由NVIDIA講到分析員生態—強文，表面講NVIDIA，實情半導體產業我識鬼咩。但又帶到去其他問題，總唔見啲科技L發晒達（搞公司嘅當然會，但自己炒股票架呢？）。你工程師睇嘢，同股價，有時兩回事。然後再講到但其實以前投行分析員全部都搵啲「嗰一行」出身的，到我年代就開始唔係，然後而家又可能變返係。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。