ivanliresearch

Coinbase今晚上市，留意冇「招股價」．「Coinbase影子股」．美股又新高，但聯儲局7月會考慮退市？微軟買Nuance絶對買得貴，但本身就快20000億市值了．港股嘛，啲通關股應該仲有得炒嘅． (Patreon)

Published:

2021-04-14 00:18:12

Imported:

2021-07

Content

Coinbase今晚上市，留意冇「招股價」

「Coinbase影子股」

美股又新高，但聯儲局7月會考慮退市？

微軟買Nuance絶對買得貴，但本身就快20000億市值了

港股嘛，啲通關股應該仲有得炒嘅

Coinbase今晚上市，留意冇「招股價」

1. 今晚（14號）上市，無論如何，唔買都睇下。之前都寫得八八九九，冇乜補充。我就唔會買的，亦留意係冇「招股價」（因為根本冇「招股」），但之前吹話大約1000億市值，然後話「暗盤」去到1500億，大家都會拎呢個嚟大約比較。當然佢就算開2000億，但你根本之前都買唔到，都係把托。所以都係唔會買。

2. 公司真係十分賺錢，有極可觀嘅收入同盈利。問題係可以維持幾耐。除咗Bitcoin價本身影響（你可以話唔會跌，但如果係咁你買Bitcoin得啦），亦係因為收費貴。公司收入係 Nasdaq 交易所一半—但背後交易量唔足Nasdaq 1%—收咁貴，點維持落去？你話傳統公司垃圾等執，咁但有其他Bitcoin平台嘛。

3. 花生講少少就係創辦人兼CEO兼大股東，舊年嘅人工，6000萬美金。高過人人鬧仆街嘅華爾行銀行家好多。固然唔係叫你仇富，「股東話冇事關你外人乜事」，亦都好大截係啲option（個圖右邊show唔晒），but still．而明顯佢係出美金，唔係Bitcoin，但打著紅旗反紅旗幾時都開心，一路食一路鬧亦係普世價值。

「Coinbase影子股」

4. 既然講開CoinBase，咁都講下，已經買入咗些少嘅Voyager Digital，買加拿大股，成就解鎖（IB有，買唔到加拿大股買美股Pink Sheet都得，舊文有講）。擺明賭博，預會輸晒（但應唔會嘅），注碼都畀埋你睇，總共6萬港紙。「你唔會以為佔我個倉好多呀可？」

5. 個「如意算盤」（但通常都不似你預期）就係，假設CoinBase喪升，呢隻嘢都會水漲船高。咁你話，扯，做乜唔早講，今晚CoinBase都上市，「追唔切」。To be fair，舊文星期一朝早出，星期二朝嗰篇再講多次話我可能買，足足兩晚任你買了。

6. 另外見我都賣咗隻GBTC，冇乜特別，溢價變咗折讓，咁但而家仲有錢賺，咪沽咗佢。一路都知有呢個問題，但買嗰時未有BTCC，而家有埋換埋過去。理論上BTCC就冇嗰啲溢價折讓問題了。而賣咗GBTC嗰四皮幾嘢，都會瞓埋落去BTCC，不過計埋之前買嘅BTCC，都只係十萬八萬港紙啫。「你唔會以為佔我個倉好多呀可？」

7. 但呢度講一講個原則：盡量做良心作者，沽咗嘅嘢，我都會話你知，仲會唔止一次提，免得你睇漏（當然只係盡量，唔記得嘅都係貴客自理）。首先將心比己，如果你睇咗我啲文然後見到我有買你又跟買，「諗住輸就一齊」，後來發現我一早沽咗，固然吹唔脹，但感覺都唔好。二來加上近幾年我都只買不賣，所以買嘢未必話你知，但賣咗嘢必定話你知。但呢個Patreon開張以嚟，就只有兩次，兩次我都事先講明係短線的，一次係上次嘅Tesla，舊年嘅事，博入標普指數被動基金要追一輪，咁我早排已沽一半（未沽晒！），斬邊留邊。另一隻就係今次嘅GBTC，賣晒了，好大可能會轉去BTCC，「但一日未買就係未買」。況且，買嘢未必次次通知你（實情我成日都買，有錢就身痕，盡量戶口都唔好有超過十萬蚊港紙）。

8. 最後個人分享，星期二晚係睇住波買股嘅，固然場波唔少十分緊張（同首回合比）（你唔係以為我睇車路士下話？），但一路掛單改價都搞到我心煩，又要保證4點前搞掂（今晚上市嘛，而我連加拿大其實咩時間都唔肯定），又怕睇睇下太投入唔記得夠鐘。想講，正常我係唔玩限價盤嘅，買賣都好，market price，全部射晒出去，不問價，唔好煩，但亦因為我唔多做trade，一買就比較大手，又或者已經贏好多或輸好多，爭少少價都冇乜關係。結果星期二晚限價盤，隻嘢又好衰唔衰低位係咁彈，改嚟改去，煩。但又不過見到隻嘢成交都唔太多，我擺300股（6萬港紙）都要分兩下先hit中。換著平時啲嘢就唔搞咁多。

9. Anyway，最後煩氣講句，以上呢啲只係小注怡情，當然你可以跟買，但我核心持股係其他啲「悶嘢」，所以可以afford幾萬蚊玩呢啲。「你唔會以為佔我個倉好多呀可？」

美股又新高，但聯儲局7月會考慮退市？

10. 幾時都話，在懷疑中上升，連我都一路講保守啲，但標普指數又再創新高。納指都好大機會今晚（星期三）破頂。

11. 可以留意下嘅係，聯儲局某人忽然出嚟講退市時間表，都驚驚地。但留意返呢位唔係主席，雖然以往聯儲局都會有其他人出嚟講嘢，內部睇法唔一樣亦唔出奇，但明顯此人立場同之前一路放鴿（術語：唔加息咪鴿，加息嘅係鷹）嘅主席鮑威爾唔同。

12. 此人講到，75%接種先考慮退市。咁當然你可以捉字蝨嘅，「我都考慮娶李佳芯考慮咗好耐」「你都考慮退休考慮咗好耐」，考慮真係唔等於退市，但既然股市炒將來，去到「考慮」就跌架啦，甚至乎聞到就快「考慮」就跌。「即係好快」

13. 過癮在，此人唔係講日期或乜，亦唔係用失業率等等指標，而係用疫苗接種率。「咁即係幾時去到75%？」。而家講緊係36%（至少拮咗一劑）或22%（拮晒）。當然有人幫你計埋，可能去到七月前後，就會去到75%。自己小心，所以呢排都係睇得保守啲。

14. 之前講嘅Nvidia已經破頂，微軟亦都係，「呢啲就核心啦」。唔聲唔聲，微軟應該好快變成20000億美金市值嘅公司。好似係史上第二間（第一間當然係蘋果），都唔係咁易估中呀下。

微軟買Nuance絶對買得貴，但本身就快20000億市值了

15. 但講微軟就順手講埋最新單收購Nuance。昨日寫得太快，只係講成個行業都係玩併購，都忽略咗公司本身。呢個收購都唔細，最後好似話去到190億美金（唔係之前講嘅160億），係買LinkedIn之後第二大手筆了。

16. 想講，都買得幾貴下。都唔好講咩市盈率呢啲嘢（幸好Nuance係有錢賺嘅）。但你計Price to Sales，都15倍咁滯，而Nuance嘅收入一路跌緊。都買到咁貴，證明真係冇乜平嘢好執。當然對微軟嚟講都係小菜一碟，市場反應好似幾正面，最初講係語音識別，Siri大腦。不過似乎係睇中醫療保健嗰方面嘅應用。

港股嘛，啲通關股應該仲有得炒嘅

17. 港股呢，走勢的確難睇，你見我呢排都少講，昨日（星期二）由升400點變升40點，夠晒難睇。昨日其實應該估到炒啲重啟經濟股，似乎通關有期嘛。但結果呢？你見莎莎178之類仲要倒跌，得啲細到周生生116六福590之類嘅先彈起，玩死，但亦因為之前都炒過下，我相信亦未玩完。簡單啲咪睇商場，九倉1997，雖然之前都升咗唔少（炒預期嘛）。但你去買友邦1299依然係OK的（雖然今年只係原地踏步）