ivanliresearch

Coinbase 暗盤升五成！微軟買Nuance有乜啟示？阿里巴巴美股再升，Nvidia快破頂。美國以外股票仲係大落後。美股分析員不停調高盈利預測。Android 市佔率係咁升又如何？有時真係應該放棄。投資最重要嘅鐵律。文化戰爭冇贏家。快運賣機票，匯豐禁買MicroStrategy (Patreon)

Published:

2021-04-12 23:46:18

Imported:

2021-07

Content

快評幾句— Coinbase 暗盤升五成！微軟買Nuance有乜啟示？

大師冇點你— 阿里巴巴美股再升，Nvidia快破頂

每日一圖—美國以外股票仲係大落後。美股分析員不停調高盈利預測。Android 市佔率係咁升又如何？

Good Read — 有時真係應該放棄。投資最重要嘅鐵律。文化戰爭冇贏家。

FB Post Summary — 快運賣機票，匯豐禁買MicroStrategy

1. 大市冇乜好講，但多其他故事想講，不過篇幅所限（星期一有三個每日一圖同三篇Good read 嘛），極快手講幾句（都搞咗2500字）

快評幾句— Coinbase 暗盤升五成！微軟買Nuance

2. 有啲標題黨誤導你，但，係咁架啦。首先講返寫咗篇CoinBase上市，4月12日，自覺寫得不錯。TLDR就係：公司賺咁多錢都係因為Bitcoin價升，但如果睇好Bitcoin，直接Bitcoin買得啦。如果Bitcoin價跌，隻嘢生意都極大影響。即使唔跌，收咁貴fee都應該好難持續。

3. 而因為公司唔係IPO（冇集資呀下，即係只係舊股東沽出街），所以冇「招股價」，不過嗰個1000億美金估值係近期啲友估嘅咁解（亦包括以下嘅場外暗盤）。但，在「暗盤」（FTX有啲期貨交易可以賭），隻嘢估值已經去到1500億咁滯。呼。

4. 又，我都係覺得賭隻Voyager Digital （VYGVF（美股Pink Sheet）/VYGR（加拿大））好啲，如果Coinbase上市可以狂升，照計會炒起呢隻？但正如有讀者講，隻嘢今年都升咗六七倍（唔係六七成），明顯極高危，你當賭波咁可以輸晒先好買。我星期一晚諗咗陣都係冇買，但可能星期二晚買，亦可能唔買，未決定。（而家冇持牌啲嘢方便啲）

5. 另外，微軟買呢隻咁嘅Nuance，160億美金，都唔算好細，但都冇乜好評，我亦完全唔知間公司做乜，亦不重要。重要係之前亦傳微軟買Discord（八萬五未？），而我都有提過，今年啲大科企會不停買細科企。你見咩DropBox，Box，Pinterest之類今年都唔錯。但，點知買邊隻？就真係極難，除非你係行內人（都未必知）。

大師冇點你— 阿里巴巴美股再升，Nvidia快破頂

6. 兩隻都算有講但唔算勁講，先講阿里巴巴，算講得多，但股價一路都麻麻。然後天價罰款又以為大跌啦，我原本係預星期一跌然後星期一晚（即係呢份）叫大家買，點知？跌都唔跌，仲要大升。唔止，去到美股仲要再升多啲，而我幫你計埋，美股收市（右邊）244.01等於香港（美股X7.77/8）237蚊，仲要升多啲（左邊係香港香港日收市）。

7. 又畀你見到市場點運作，邊有咁多機會畀你買。另外，上次分析過話咩瑞信野村輸錢，點大約量化件事，原本今次就大派用場的。你咪計下罰嗰182億人仔，同阿里巴巴book value 10000億比（嚴格科技股可能應該睇利潤），真係小菜一碟。況且，破財檔災，最緊要有得傾。至於你話監管會緊？一路都知，高位跌咗三成了。

8. 另外，Nvidia都有講，都係在個觀察名單，但唔算成日推。不經不覺又差不多破頂，最新消息係自己做CPU，所以你見AMD同Intel即插（話時話，之前講到Intel好唔掂，不過都靜俏俏上返52星期新高，反而AMD係威係勢，但大幅跑輸，又畀你見到估值都好緊要嘅）

9. 又，晶片荒呀等等都講咗一大輪，成個sector都喪炒的，有時你要分買邊隻都唔係咁易，行內人識分公司但又未必識買股票。唔想煩嘅，之前講咩費城半導體指數，都係有ETF可以買的（SOXX），當然貴唔貴就……自己諗。「我就2019年已經叫你買ASML」

每日一圖—美國以外股票仲係大落後。美股分析員不停調高盈利預測。Android 市佔率係咁升又如何？

10. 美國以外股票仲係大落後—如圖，美股不停破頂，但仲有好多其他股票仲係未創出新高。實情有一半股票都離高位仲有20%。一方面畀你見到美股幾強勢，但另一方面亦見到其他股票似乎並未離奇地貴。

11. 美股分析員不停調高盈利預測—亦不用多講。呢個動作，咪畀你見到之前啲「市盈率」冇之前想像咁貴。但明顯地，你股市嘅升幅一定多過呢啲上調。市場必然行先，亦畀你見到好多時啲分析員估嘅數係落後嘅。

12. Android 市佔率係咁升又如何？—智能手機革命十幾年，見到Android市佔率，由零升到七成，大半江山都係佢。蘋果iOS相對穩定，近年都係兩成幾三成。但，反而我想大家諗下：正路你會覺得Android較「成功」啦，不過，邊個賺錢？咁多年似乎蘋果市值都大過Google．原因亦大家都知，首先Android只係收授權費之類，但蘋果自己賣埋電話。而蘋果嘅margin高好多（賣得貴）。再扯落去你會見到個用家忠誠呀，生態圈呀，啲用家有冇錢呀之類（大有關係，首先買貴電話，另外呢班人亦係可以之後貢獻好多服務收入），亦見到蘋果嘅「封閉系統」，雖然好多人鬧，但應記一功。

Good Read — 有時真係應該放棄。投資最重要嘅鐵律。文化戰爭冇贏家。

14. 唔知有冇人留意到，但其實一般Good Read 同每日一圖，我會刻意揀幾個唔同主題的，例如有時有啲同投資冇直接關係嘅嘢。

15. 有時真係應該放棄—有機會寫，但我其中一個成日寫嘅主題，就係against啲「主流正能量」，例如叫你追夢呀嗰啲，以前都寫過，如果令到啲友高估自己成功可能性係好事，咁賭場一定係社會良心。另一種「主流價值」係叫你「永不放棄」，呢個應該過去一百幾十年都係咁，啲友出嚟講嘢呀，拍戲都係咁講。但冇人話你知有啲人係放棄咗，之後先第度取得成功。「你想像下如果我繼續考精算師或者繼續教書，而家會點」。我覺得應該嘗試，但去到知道自己真係唔掂，理應斬纜。呢篇就畀咗幾個「忠言逆耳」畀大家。

16. 投資最重要嘅鐵律—又係 Charlie Bilello嘅文。佢挑戰畢菲特嘅First Rule，「唔好輸錢」（我都好似耐唔耐講）。正如佢入面講，你買巴郡都成日會輸錢啦。而我都同你講根本捱價係必然發生嘅（所以「唔好輸錢」應該唔係咁理解）。佢話好難搵一個鐵律，但真係要講，佢會揀“know what you own, and why you own it.”。都幾有道理，最重要係，佢話你知你做到呢樣嘢，先會坐得穩，唔會兩下畀人震走。可能星期六講呢篇文。

17. 文化戰爭冇贏家—我嘅「埃汾教你做人嘅道理」未得閒寫，但其中一樣我都成日講嘅，避免同人拗嘢，特別係網上，必然係浪費時間。唔係叫你圍爐，但你可以選擇睇嘢（哪怕係你覺得好白痴嘅人），寫嘢，諗嘢—就係唔好拗嘢。正如文中所講，好多時根本大家只係為感覺良好為表態，你係唔會學到任何嘢。文章舉例講racist：根本唔同人嘅定義好唔同，鬧到天光都係浪費時間。