再醒多篇業績前瞻：Tesla，Pinterest，Twitter (Patreon)

Tesla —仲係好高增長，但市值已經太大了

Pinterest—走寶，但而家太貴了吧，反映晒畀人收購嘅溢價了

Twitter—冇咗啲用戶，但廣告客戶不知幾歡迎！仲有新業務！

1. 呢篇算係特別版？亦係補返之前偶爾遲稿之類。而仲有篇譚仔仲未寫。但無論如何，今個星期焦點係美股業績。上篇寫咗FAAMG業績（NetFlix再早啲出咗，SnapChat都係，遲下考慮加埋入名單），咁話如果星期一日頭得閒寫埋Tesla及其他，就係呢篇。

2. 然後原本星期一嗰篇，我都係會照寫嘅。即係我應該24小時內會寫三篇文，成萬字，仲未計Facebook啲Post。抵睇啦？！

3. Tesla冇錯係今晚（星期一）出業績，但，會係美股收市後。理論上你收到篇文都仲夠時間飛入去業績前買嘅，但我並不建議，下面會寫。

4. 又，你見有啲數字嗰啲嘢，例如之前咁多季嘅收入之類，都係在macrotrends搵，免費嘢嚟講不錯，遲下我會整埋埋再整個Excel送畀大家。

5. 記住，留意返美股業績嘅時間表，有寫埋開市前定收市後出的。

6. 言歸正傳，去片，第一隻就係Tesla

Tesla —仲係好高增長，但市值已經太大了

7. 你見我都好耐冇提間公司，實情係街度都少咗好多人講了。而目測公司嘅波幅都低咗好多，即使係啲友玩發夢股玩狗幣玩NFT都唔玩Tesla，因為實在太大了。即使跌咗落嚟，而家都仲係美國第六大嘅公司。

8. 股價表現呢，年初至今升得3%，好似係我地寫嘅咁多隻科技股之中最差嘅。甚至係跑輸晒啲舊車廠，所以個教訓雖然老套，但再講一次：唔好以為估值唔重要。你齋up故事講乜都得，但，總有個價，點解舊年升咁多倍今年唔升多咁多倍？1000蚊一股你買，10000蚊呢？10萬呢？係好難量化邊個位先變得唔大，但總有個譜。

9. 亦都講返（有新讀者嘛），舊年11月叫過大家買Tesla，但講明係短期嘅（我冇講明嘅都係長期，而長期係指一年半載甚至十年八年）。就係因為佢入標普指數。咁叫做捉到個浪啦，你去到今年高位走得甩食糊嘅，兩三個月就一個開。手腳慢嘅而家仲持有嘅，或者12月入指數時即走嘅，都應該執到50%。

10. 然後你可以睇下，上次寫業績前瞻，同埋上次業績後評。當時近900蚊，我都話你知係泡沫了。打後就真係冇乜點好過。我做嘅嘢亦同我建議大家一樣，沽咗一半Tesla，鎖定咗啲利潤。好重要，未睇過嘅睇返，舊文教你點「斬邊留邊」，「零成本」。聽落好低智，但真係work的！唔好高估自己嘅心理質素！

11. 講返今次業績，街估每股盈利 0.75（美金，下同），係喎，繼續有錢賺（但好可能都係啲carbon credit，但冇所謂，唔係第一日係咁）。比較重要嘅係收入，估去到104.8億，亦即係75%增長—其實幾誇張，咁大間公司都仲有咁嘅增長（但當然，公司嘅利錢低好多），比起以往兩季仲要勁，而舊年第二季收入按年係倒退嘅—咁你見到個turnaround 幾咁勁，亦唔怪得股價咁挫

12. 咁其實，出車量又一早講咗，照計業績唔會太大走樣嘅，又唔會特別加咗價減咗價你唔知。不過你知Elon Musk嘅嘢，可能忽然又宣佈啲你估唔到嘅嘢。

13. 但講返正路嘢，各項收入，賣車收入預84.6 億，升73%。仲有其他收入？係有的，太陽能收入（ energy generation and storage）預5.2億，租車（Automotive Leasing）預2.9億，另外有啲服務及其他就 6.7億。

14. 呀仲有，Bitcoin，公司走去年頭買咗堆。咁成本係30000- 40000美金。4月1日Bitcoin價應該大約60000。有得賺？應該冇。亦係舊文寫過（所以點解要長期睇！），留意升咗係冇得入帳當盈利（除非賣咗佢啦），但跌就可以輸錢！咁今次出嘅第一季業績當然就係升咗，但冇得計盈利（除非沽咗，而我估佢地唔會）。不過更好玩係，第二季（即係4-6月），就可能輸錢了。

15. 你會話，第二季開頭（4月）係60000，咁而家50000。但我成本30000-40000喎，應該唔係計輸錢？答案係我都唔係好肯定，但好似係每個季度計的。Mark上60000再跌返去50000，照樣計輸

16. 不過講真，呢啲都係數字遊戲，我又唔覺得投資者分析員會太在意。講過啦，30000蚊升到上60000蚊，唔會有盈利入帳—但都係反映咗嘅，直接在個book度發大咗咯。

Pinterest—走寶，但而家太貴了吧，反映晒畀人收購嘅溢價了

17. 估唔到一寫Tesla咁長，但都寫埋另外兩間，首先係Pinterest，星期二會出。街估每股盈利0.07（有錢賺的），收入4.75億。即係，折合第一季收入，按年升75%。好誇張，完全係一個大翻身嘅故事。可惜唔熟間公司（其實我都有戶口），加上鍾意買大嘢，就走寶了。但有得有失啦

18. 睇返啲數，疫情前，2019年第四季，收入係升47%。到舊年開始受疫情影響啲第一季35%，第二季就災難，變到得4%，股價亦當然一早在3月大跌（又一次畀你見到股價行先），但反而到出第二季業績就彈返晒。咁之後係好強嘅recovery，第三季升58%，第四季升77%。去到今年第一季，估升75%。就已經冇再加速了。

19. 股價呢，神奇頂級超卓，舊年3月低位12蚊，你敢買？而家72蚊，6倍。但正如講，好少用，唔熟。而背後推動業績嘅，當然亦係廣告收入。既然之前SnapChat咁勁（又講一次，未必要每日睇，但文要長期睇，可以一個星期一鑊過都得），咁Pinterest今次有驚喜都不足奇

20. 但我依然覺得，太貴，不了。而家好大程度price in 埋啲M&A Premium（即係預有人買，之前有寫過，傳係微軟）（記住文要長期睇！）。今年股價亦只係升10%，叫做同大市同步。

Twitter—冇咗啲用戶，但廣告客戶不知幾歡迎！仲有新業務！

21. 最後係Twitter ，星期四出。香港人少用，社運後就多咗人用，不過本人都用咗十幾年。留意公司一路個問題係：有影響力，有用戶，但唔係點賺到錢。你同Facebook相比，真係爭好遠。公司今年股價就表現幾好，都升成24%，跑贏大市

22. 講返今次業績，預每股盈利0.14（又係有錢賺），收入1030億，即係按年升27%。咁又係睇返之前嘅數，個turnaround都算勁。疫情前嘅2019年第四季收入都只係升11%，去到爆疫嘅2020年第一季已經得3%，絶對係重創。第二季更加係跌19%，之後強勁反彈，第三季14%，第四季28%—咁今季只係預升27%，所以都係個反彈冇再增速了

23. 另外，相信好多香港人，都係因為社運，或者侵侵，先識得Twitter．咁打從侵侵連任失敗，仲畀人ban咗後，一來公司冇咗個頭號用家，二來亦都真係有啲支持者唔玩轉場。

24. 但，正如Facebook一樣，你有啲人轉場唔緊要的，平台唔只係睇活躍用家數目，仲要睇埋生態，質素。你而家係趕走咗啲用戶，但總好過日日都hate speech。最最最初啲商家（而唔係用家）抽Facebook廣告，就係嫌佢地唔理啲hate speech，最後公司唯有做嘢。的確係可能少啲啲用家，但似乎客仔，即係落廣告嘅公司，都係寧願而家咁。呢個係好重要嘅教訓。

25. 呀仲有，Twitter都開始玩打賞功能，有啲似Patreon咁，但畢竟好多係well established 有晒fan base嘅用家。況且，唔好忘記Twitter同Square係同一個CEO。有冇得聯想下有乜synergy？

=========================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。