死唔斷氣再講1137業績。講埋1137 三月嘅數字。嘉年華郵輪Carnival業績。騰訊700幾乎倒升，友邦1299又升，美股乜都升。Constellation Brands (Patreon)

死唔斷氣再講1137業績（加埋反面教材）

講埋1137 三月嘅數字（有Excel）

嘉年華郵輪Carnival業績（冇Excel，收入都冇Ex乜Cel）

快講幾句—騰訊700幾乎倒升，友邦1299又升，美股乜都升

節目預告：Constellation Brands

死唔斷氣再講1137業績（加埋反面教材）

1. 關於王維基隻HKTV Mall 1137，業績在呢度寫過。之後點解大跌亦都在Facebook寫過。有用的，最緊要知個世界點運作。否則你會好似下面呢位仁兄（純就事論事，同埋用嚟教學示範，唔好搬弄是非）咁諗：

2. 借問聲，點解覺得「業績亮麗」？回應返FB 篇文講，好多人奇怪，「做乜業績好都跌」，但，你肯定係「好」？咩叫「好」你有冇諗？轉虧為盈就好？鬼唔知全年轉虧為盈咩，半年業績時嗰時就叫「好」，而家全年光光轉虧為盈係唔夠嘅，事實下半年純利大跌，點「好」？極端講，如果我上半年賺7億，下半年蝕6.9億，全年有賺，咁你會唔會話「業績亮麗」？

3. 至於講到話，「倒帶一年多前，誰會想過香港電視能於去年轉虧為盈呢？」。冇錯，如果一年幾之前，多數人都唔信—問題係，你隻嘢日日trade嘛！股價就會assimilate 晒所有已知嘅資訊同期望。除非你隻嘢全年停牌，出完2020中期同全年業績先復牌，咁就實爆升啦。見到分別冇？你「轉虧為盈」呢樣嘢，在中期業績個盈喜時，咪反映咗咯。等於你而家講，喂，廿幾年前邊個估到蘋果會咁賺錢，冇錯丫，但你過去廿幾年隻股票日日trade嘛

4. 當然仲有樣嘢，同個估值都有關啦，有時啲股價係priced to perfection，你有少少差池就即時大插。甚至乎，你見FAAMG之類嘅大企，之前兩三次業績，全部都勝預期呀，但股價照插的。

講埋1137 三月嘅數字（有Excel）

5. 但其實今日主要係想講1137最新嘅數，唔係業績，係3月嘅數字。咪話咯，股價反映將來，同埋最新消息，事隔都幾日，關於個2020業績嘅一切，應該都反映晒，你見昨日（星期四）股價仲反彈添。

6. 然後星期四晚就出埋3月嘅數字。你可以慢慢睇，但我一路有個Excel入埋，只能講句，實在麻麻地。

7. 點睇？記住一般係睇按月，多過按年，因為suppose公司高增長嘛，而且按月先係最新走勢。咁你見到Average daily order number，好似按月反彈—問題上個月數字係差的，農曆年。咁你同返1月比，差不多咋喎。到Average order value (HK$)，更差，差過1月，2月，同埋舊年嘅3月。然後到Average Daily GMV (HK$m)，只係略高過上個月，低過1月同舊年3月喎。Monthly GMV on Order Intake (HK$m)亦都係咁

8. 咁，就梗係麻麻地啦。仲有，公司嘅全年GMV目標，係66-70億。而家一季過去，做咗15.45億，咁你話得唔得？認真麻麻。

嘉年華郵輪Carnival業績（冇Excel，生意都冇Ex乜Cel）

9. 奇怪，反而係港媒講得多（多香港人炒？），鬼媒較少。 Anyway，趕時間嘅，可以睇下經濟同信報嘅報導，都算詳細。想原汁原味嘅，睇落去。

10. 只睇Headline嘅，實在冇乜特別，當然蝕緊錢，第一季蝕20億（美金，下同），而個虧損係大過預期。生意就算啦，2600萬，亦比預期低好多—留意，我唔100%肯定，但，你第一季去訂定下半年出發嘅嘢，係唔會當係「收入」的，會計101，唔明嘅有機會再解。而如果你啲客畀咗現錢呢，錢就即時入落cash flow statement 同 balance sheet。原理同餅卡呀，Facial 券等等差不多，你用嗰時先recognize個收入

11. 咁你話，收入同盈利（蝕錢啦）都差過預期好多喎，做乜升？又係要睇下股價由乜推動。正常嘅股票可能睇收入盈利，但呢隻嘢已經係深切治療部（叫做渡過危險期），唔會有人理佢啲收入，虧損就可能望下，但都唔係最重要。

12. 最重要係乜？幾樣嘢，第一，吊住命先。公司book value夠唔夠你蝕？每個月燒緊幾多錢？夠燒幾耐？第二，減成本嘅嘢做成點？第三，啲客有冇意慾再幫襯？有冇人訂定下半年或下年？

13. 詳情可以睇公司嘅Press release aka business update （美股叫8—K），悶。再悶啲嘅睇報盤數，美股叫10—Q．咁但其實你睇經濟同信報都講咗啲（冇講嘅我補充）

14. 最重要，市場最開心嘅係聽到乜？當然係「第一季度的預訂量創歷史新高，比去年第四季度增長了約90%」，都唔使點再講落去。亦同公司之前嘅指引相類似。（留意如果之前公司講到更勁而家冇咁勁，就好可能會跌，同1137嘅故事一樣，股價反映最新嘅嘢）。另外，「目前2022年的預訂量甚至高於2019年疫情前的水平」

15. 但當然，古語有云， trust everybody, but cut the cards—即係 don’t trust anybody．唔係話管理層公然講大話，但一般都係報喜不報憂，就算知公司唔掂都要講到掂—當我要cap水救亡，都要講到公司有前景先得架。唔係話叫你乜都唔好信，但，又唔好信十足。

16. 所以我地睇埋啲數，數字要做假唔係唔得，但再難啲咯。

17. 先睇liquidity，燒錢，一個月燒5億，預上半年就一個月燒5.5億。而公司有115億現金同短期投資，夠燒啩（但當然係有負債的！），況且之後可以再集資。公司亦話你知，過去一年集咗236億，集資嘅能力係有嘅（多謝聯儲局，所以唔好話冇用）

18. 然後睇埋solvency，一季蝕20億嘛，但個equity 近200億，食得起嘅，亦相信第二季（呢句我加嘅）都應該咁上下虧損，唔會再多好多。

19. 結論？你見出完業績股價都創52週新高，明顯收貨。都有唔少讀者買咗，咪放心持有—但記住唔係攬過世，到開始啲友上船，升多最後一浸，就要沽了。但未買嘅，就唔使買了。新讀者可能唔知，我地推嗰時，23蚊唔夠，而家差不多30蚊了。你話你買渣過世嘅股，就可能有買貴冇買錯，但呢啲短炒嘢（我嘅短係講幾個月！），就timing都好重要

快講幾句—騰訊700幾乎倒升，友邦1299又升，美股乜都升

20. 都即管講下，騰訊股東話配股，又講到股災鳥呀乜，2018重演呀咁。FB有寫，根本冇乜好驚，分分鐘係買入機會。結果？跌都冇乜點跌呀，星期三收629.5，星期四一度上到629，幾過份！而全日都守住600蚊樓上，仲守住個配股價，如果冇睇錯係上限定價，595（證明大把人拎）。呢件事畀你見到，公司幾咁多人想買。

21. 另外，友邦1299寫咗好一排啦，債息，同埋通返關（我知未通！炒預期），然後忽然星期四爆升，話有大行報告。咁又示範咗，梗係要之前買定啦，你升咗先買咪遲。

22. 最後見到篇短文幾有趣，分享下。最重要係中間講到，無論係大股，細價，價值，增長，低波幅高波幅，新經濟舊經濟，封城股定係重開股，好多都離高位不遠。亦係我呢排講嘅嘢，值搏率真係唔高，但當然都係要買，不過可以唔使極進取。

節目預告：Constellation Brands

23. 想講下呢隻，「星座品牌」STZ，430億美金市值，標普500成份股，但唔買美股可能陌生啲。我以前買過，而家冇。有啲感情，所以今日見到出業績又望下。冇叫你買，亦未細望，但見個業績明明好地地，股價反而大跌。然後睇今年股價，又唔係升到癲晒咁。

24. 講到尾，間嘢做乜架呢？主要係酒，一大堆，有啤酒有紅酒有烈酒。最出名係Corona，「可能因為咁而拖低股價」。有機會望下

========================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。