美股又新高，但短期應有個大調整啦？Google Microsoft BlackRock新高。嘉年華郵輪業績後再升。而家美股唔多值搏（三個圖）。VIX又去到一年幾新低。四成Podcast兩集收檔。人類鍾意簡單複雜化。錯過ASML不如買ASM太平洋。騰訊配股早有先兆。賣架車都要出通告。BlackRock 新高8百蚊。 (Patreon)

快評幾句—美股又新高，但短期應有個大調整啦？

大師冇點你— Google Microsoft BlackRock新高。嘉年華郵輪業績後再升

每日一圖—而家美股唔多值搏（三個圖）。VIX又去到一年幾新低

Good Read — 四成Podcast兩集收檔。人類鍾意簡單複雜化

FB Post Summary — 錯過ASML不如買ASM太平洋。騰訊配股早有先兆。賣架車都要出通告。BlackRock 新高8百蚊。

1. 多咗新讀者，所以快手講下。星期一三五你會見到好似今篇咁形式（有每日一圖有Good Read有快評），星期二四你會見到好似上篇咁，講幾個主題。週末（多數係星期日）都會有多一篇，正路會係一個主題深度嘢。

2. 時間方面，正路一定係過咗半夜，可能兩三點，甚至四五六點。極端情況下可能去到第二朝七八點，如果反正冇市（例如今篇）就可能會再晏啲咁。但正路都keep住一個星期六篇。

3. 如果見到有啲link錯咗漏咗呀，貼圖貼錯呀，可以PM話我知。但就咁打錯字嗰啲我多數唔理了，冇咁得閒慢慢搞。

快評幾句—美股又新高，但短期應有個大調整啦？

4. 不用多講，「舊經濟」道指標指都新高。

5. 但你話「新經濟」落後？納指本星期表現仲好過道指標指，都離破埋不遠。

6. 事實你見到，堆Big Tech唔少都新高，而標普指數講緊95%成份股都在200天平均線之上，呢個比率十幾年最高了。見到升勢好全面，只要你有分散幾隻，照計總有啲斬獲。

7. 不過壞消息係，我覺得真係開到荼蘼，差不多要有個大調整。原因下面都有講，估值貴啦，債息啦，VIX低（人人冇乜戒備），之後可能加稅啦等等。

8. 雖然冇水晶球，但都順便講明啲，因為「短期有個大調整」真係太空泛。畀少少量化你：短期，我指3個月內。大調整，講緊10—20%嗰種，都幾甘。但放心，到時會係買嘢嘅機會。但真係唔好沽咗啲股票諗住低位買，你唔知等到幾時，仲有，「如果我錯呢？」。講到尾我都係一股都冇沽過（除咗舊年年尾嗰堆Tesla沽咗一半，當年講明係短）

大師冇點你— Google Microsoft BlackRock新高。嘉年華郵輪業績後再升

9. 昨日講咗嘉年華郵輪嘅業績，星期四開市前出的，出完後連升兩日，差不多到52週新高了。見啲大行反應都幾正面，當然都係講嗰幾味嘢

10. 至於Google Microsoft BlackRock呢啲，一路有講了。Facebook Page近排有講BlackRock，下面亦有導讀。

每日一圖—而家美股唔多值搏。VIX又去到一年幾新低

11. 而家美股唔多值搏—三個圖，但講嘅差不多係同一樣嘢。第一，估值當然緊要，雖然的確貴嘅可以更貴，平嘅有時更平，但成個市嚟講應該冇咁易有呢種現象，正路都係mean reversion（但唔知幾耐）。第二，當然你盈利升得快過預期咪會拉返平估值，但而家啲盈利預測多數都幾準，仲要係成個市。咁但第三，2008年後，聯儲局大幅干預市場壓低息口之類，係扭曲咗估值嘅

12. 但講咗咁多，都係留意下，以往你見到，高估值時買，多數之後一年，五年，十年嘅回報都係極之麻麻地。而家嘅估值就都極高，所以你見我都保守。但再講一次，「唔係叫你沽股票」。即係我而家可能有幾十萬現金咁（以我水平嚟講好多！我好長時間戶口係唔會超過十萬蚊的，一有就買股票），但都係一股都冇沽過。

13. 幾時個估值會平返？「跌返一兩成咪平啲」

VIX又去到一年幾新低—根本呢個圖講嘅同我估短期調整嘅結論都差不多，但VIX預示短線啲。固然好多人都知VIX係「恐慌指數」，但正好係相反操作，舊年3月VIX60 80嗰時人人驚到死咪抵買，而家個個大安旨意，我就幾擔心了。

Good Read — 四成Podcast兩集收檔。人類鍾意簡單複雜化

14. 四成Podcast兩集收檔—蘋果聲稱平台上面有2百萬Podcast，但「實際上」有幾多？見到原來有25%係得一集嘅！似乎根本不能稱為Podcast．得一集或兩集嘅，都佔咗40%。換言之只得60%係做到三集或以上。入面仲有更多統計。

15. 人類鍾意簡單複雜化—入面講咗唔同嘅實驗，往往解決問題有唔同嘅方法，有啲係「加法」有啲係「減法」，但發現必定係「加法」多人揀的。似乎多數人都以為加多啲嘢先解決到問題，雖然實際可能根本唔使。

FB Post Summary — 錯過ASML不如買ASM太平洋。騰訊配股早有先兆。賣架車都要出通告。BlackRock 新高8百蚊。

16. 錯過ASML不如買ASM太平洋—講下ASM太平洋522，同埋甚麼「費城半導體指數」。不過有ETF買的說。

17. 騰訊配股早有先兆—教大家睇CCASS，3月尾已見到有人搬3%貨去大摩，仲有邊個？仲咁啱係3周年。但，畀你一早知又點？唔通一路沽空咩。

18. 賣架車都要出通告—講下上市條例，點解賣架勞斯萊斯350萬都搞到要出通告。因為公司市值太細。

19. BlackRock 新高8百蚊——定期自high文，呢隻BlackRock都推過多次，講返公司嘅「護城河」在邊（就係以本傷人壓低個價），不經不覺市值大過高盛。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。