大政府全球企業稅富人稅成形。騰訊ADR 連招股價都冇穿．微軟　Facebook BlackRock Google齊齊新高。仲有嘉年華郵輪．聯儲局話鬆市場唔信。人人買到滿倉股票啦喎．黑石老嘢嘅人生教訓。感恩定係never settle for less好啲？一間美的五間東芝。騰訊配股 (Patreon)

快評幾句—大政府全球企業稅富人稅成形。騰訊ADR 連招股價都冇穿

大師冇點你— 微軟　Facebook BlackRock Google齊齊新高。仲有嘉年華郵輪

每日一圖—聯儲局話鬆市場唔信。人人買到滿倉股票啦喎

Good Read — 黑石老嘢嘅人生教訓。感恩定係never settle for less好啲？

FB Post Summary — 一間美的五間東芝。騰訊配股

快評幾句—大政府全球企業稅富人稅成形。騰訊ADR 連招股價都冇穿

1. 噢耶，已經達到1500個讀者！多謝大家，但亦多得我落唔少Facebook廣告（係有用的而抵玩，抵畀佢賺），之前咪寫過Facebook股價強勢（星期三又新高），因為啲廣告費係咁加。

2. 多嘢講，但真係快評幾句，否則就失咗意義（同埋星期四唔知寫乜）

3. 美股方面，標指又創新高，道指都好似係，不停驚驚驚真係做唔到大事，最衰啲友係貴嗰時先仆去買，平嗰時又唔敢買。當然呢個係人性，試下克服，或者你可以簡單啲月供ETF或定期買股票（今次唔講勞蘇基金了）。

4. 值得講嘅係，聯儲局話繼續維持寬鬆嘅政策，債息亦都回返啲。但市場呢排係預2022年加息（我點知？下面每日一圖會講，但主要係睇啲期貨），同聯儲局啲指引有啲唔同。以往比較少見，聯儲局亦好少做啲市場冇準備好嘅嘢。咁唔知之後係聯儲局成功引導返市場（較有可能），定反而係市場迫到佢睇死佢改變主意。

5. 之前寫過下耶倫講嘅全球最低企業稅，加埋拜登加稅。我型住係件比較大嘅事，但冇乜人講。有機會細講（但會好悶），但而家快講：似乎比我想像中多人支持呢個全球最低企業稅，指嘅唔係選民，而係其他國家。仲有，亞馬遜嘅光頭佬亦支持收更多稅（係咪幾有趣？可以諗下點解），同時間IMF亦都提議收富人稅。感覺真係成個世界大風向轉緊。大政府呀。

6. 少講政治（次次講完呢四個字我就會講政治），但同我食過飯嘅應該知道，近年全世界（唔止香港）咁多不穩，你問我，最主要係因為貧富不均，而唔係冇民主。你見有民主嘅地方都係咁上下，選民雖然笨但唔係白痴，換得幾次咪知乜黨上台都係服務有錢人，加上全球央行印錢，股樓就升，科技先進又只係令某啲人受惠（下刪一萬字）—我一直都認為，解決呢個問題就係收多啲稅，劫富濟貧，之但係要各國齊心唔容易—而家似乎會做。

7. 另外，騰訊，今日明報你會見到我講，其實Facebook一早寫咗。下面在FB Post Summary 再講一次，費事重覆。唯一要講嘅係，你睇ADR，等於香港609蚊。冇錯係低過星期三收市價，但，575-595蚊批出街喎，即係連配股價都唔穿，可見一跌落去就唔少想買。

大師冇點你— 微軟　Facebook BlackRock Google齊齊新高。仲有嘉年華郵輪

8. 微軟　Facebook BlackRock Google呢堆就唔講啦，但都係一路推嘅股票。固然升得唔會太快（但FB都一個月升三成），想快嘅去買馬買波。隻隻都新高，對得住大家啦。

9. 但我特別想講隻嘉年華郵輪，留意係出咗業績嘅。如果我冇睇錯應該係開市前。呢度，同呢度。星期四應該會細講，但，第一季蝕20億美金，好似高過預期。不過真係要分返到底隻股票炒緊乜，炒前景嘛。本Book 200億，一季蝕20億頂得住。另外，你見啲燒錢速度完全可控，120現金在手，一個月燒5億（但當然有債）。一切依舊，仲有得玩，但真係到開船就諗落船了。

每日一圖—聯儲局話鬆市場唔信。人人買到滿倉股票啦喎

13. 聯儲局話鬆市場唔信—回應返上面講，官方論述話2023年底前都唔加息，但市場啲期貨明顯估2022年已經會加。一般呢啲背馳唔會太長，係聯儲局會成功引導信服唔加息（我估係呢個），定市場早早睇死聯儲局之後會反口？

14. 人人買到滿倉股票啦喎—冇深究佢用咩去量度，但大約見到，都係睇資金流，講啲股票基金都渣咗好多股票。「應該就快調整」。你見個圖之前幾次都幾準，18年頭買到滿倉咪大跌，20年初人人清倉咪應該入市。但實行起上嚟冇咁簡單，只係畀個參考你，同「別人恐懼時我貪婪」之類差不多。事實呢排我都係比較保守，但，「保守即係100蚊買90蚊股票」「唔保守就all in」

Good Read — 黑石老嘢嘅人生教訓。感恩定係never settle for less好啲？

10. 雞雞地湯，但易入口。

11. 黑石老嘢嘅人生教訓—留意係黑石BlackStone（有上市的，BX），唔係貝萊德BlackRock（BLK）。係講人生，唔係投資。我覺得都幾啱使，而我應該好快會寫篇類似嘅。留意篇文2013年，條友當時已經80歲，但讀落都不過時。條友應該未死的。

12. 感恩定係never settle for less好啲？—都係人生嘢，有啲人係maximisers，做到最好。有啲人係satisficers，還好啦，比上不足比下有餘。邊種人會做好啲嘅決定？答案你都估到：睇情況。但佢有講到，一般嚟講，maximisers得到嘅嘢多啲，但冇咁開心！人生嘅嘢。不過以前真係有個舊同事，屋村仔出身，唔見得點叻，但做投行又撈得幾掂。佢個情況我好明顯覺得佢係性格，佢充滿自信，明明唔識嘅嘢佢都可以理直氣壯。佢個人冇乜嘢（至少表面上），但真係骨子中覺得全世界欠咗佢，公司搵佢笨，每間公司都剝削佢。成就係有的，但快唔快樂就唔知了（不過目測唔覺佢特別唔開心）。我發現係真係paranoid survive，唔係話佢，係講個行業。你太過易滿足嘅人，冇嗰種貪念鬥心。但太過貪心嘅又會心理不平衡。

FB Post Summary — 一間美的五間東芝。騰訊配股

15. 一間美的五間東芝—未得閒細寫（永遠題目太多時間太少），但，東芝退市，賣盤畀私募基金，作價應該差不多200億美金？好多，except我話你知，美的市值差不多係1000億美金。固然東芝近年出咗好多問題，又造假又核電減值，但即使未有呢啲嘢之前，都已經虛有其表，稍為值錢嘅業務都賣晒去填洞。同LG手機業務做唔住差不多，啲家電手機嘢，低端唔夠大陸平，高端又唔夠蘋果三星之類玩。好多中檔公司死晒

16. 騰訊配股—大量粗口。講到尾，有人減持，同基本因素有乜關係？係冇的。跌嗰時唔買，升嗰時先買？會唔會好似2018咁？唔知喎。但2018全世界股市齊跌，唔止因為騰訊。而講到尾，嗰時夠話世界末日股王不再400蚊南非底啦，結果而家睇返，係咪好後悔冇買？

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。