HKTV 1137，認真麻麻，不過遲下會唔會派息？中銀香港2388都麻麻，但前景會改善啩．美股：冇人理韓仔，債息彈，美匯指數彈．嘉年華Carnival，百度，騰訊音樂TME同雷蛇1337 又有力．睇下京東健康6618 同 平安好醫生1833 (Patreon)

HKTV 1137，認真麻麻，不過遲下會唔會派息？（有Excel）

中銀香港2388都麻麻，但前景會改善啩（又有Excel）

美股：冇人理韓仔，債息彈，美匯指數彈

嘉年華Carnival，百度，騰訊音樂TME同雷蛇1337 又有力

睇下京東健康6618 同 平安好醫生1833

1. 上返幾個新客（讀者），心情又好返啲。3月最後一日，今日多嘢寫。又，之後兩星期Ivan去香港國際電影節，可能會寫短啲，希望唔好甩稿。多謝大家一直支持，今個月開始就全職Patreon了，「其實都幾巴閉」「但又搞到我冇乜安全感」。去片

HKTV 1137，認真麻麻，不過遲下會唔會派息？（有Excel）

2. 業績呢度，自己研究。或者睇埋我Attach隻Excel，但Excel冇業績，只有每月數據—但有冇諗過，而家先出舊年12個月嘅業績，而股價照計係睇緊3月甚至第二季嘅數呢？

3. 好早有推呢隻嘢，王維基亦係我偶像。但有碗話碗，業績認真麻麻。出面只係吹奏王維基十分用心寫嘅管理層感受，理解。但改名呢啲真係冇乜特別。

4. 至於話轉虧為盈卒之收成，大佬呀，今日先知咩。中期嗰期咪轉咗盈，唔通你覺得下半年會差過上半年？（話時話，做乜全年唔出盈喜？）。可以睇返上半年時我點寫。

5. 好快講，上半年公司賺1.1億，而家全年先得1.8億，即係下半年7000萬—咁你話好唔好？當然可以細睇埋啲經調整盈利嘅（但未有時間）。但另外留意，上年年拎政府補貼1630萬，下半年5460萬。當然不能就咁減（有稅），但大約，扣走呢舊，上半年賺9370萬，下半年1540萬，你覺得如何？雖然我冇得睇街估幾多。而留意公司理論上受惠疫情，上半年未食得盡，原本以為下半年利潤仲好？原來唔係咁回事

6. 至於今年1月2月嘅數（佢地個個月出，3月數都好快有），亦係麻麻。可能幾吃力先達到自己嘅目標。

7. 加上仲要股價唔見得極殘，我估，今日股價應該跌得幾甘啦掛？當然我可能錯啦，特別係始終公司唔大，你有一兩個大戶入場或沽貨已爭好遠。

8. 唯一正面啲嘅係，公司財政好穩建，冇銀行貸款，9億幾net cash，大可以加大投資，甚至有機會派息？

中銀香港2388都麻麻，但前景會改善啩（又有Excel）

9. 大銀行都係要睇嘅，業績都幾大舊又煩，幸好我之前都有整開個Excel，自己去睇。但可能2019年啲季度數有啲入錯，懶慢慢再check

10. 睇季度走勢嘅，大約係咁。以前可能某啲人好關心啲存款（以為人地啲存款走晒喎，well），但而家已有乜人理。況且舊年IPO好旺，啲存款數字都未必太準，當然佢地業績入面有計埋調整返嘅數，你可以慢慢研究。但真係應該唔係重點，「總之唔好以為人地啲存款走晒」

11. 咁睇乜？睇季度嘅撥備呀，撥備前盈利呀，息差呀咁。咁當然見到麻麻地，都不用我多講，留意啲息差一路收窄。但，照計今年點都好啲啦（美國債息係咁升），不過見管理層仲係好保守。

12. 返返去盤大數，睇下半年同上半年比，撥備前盈利都跌唔少，不過撥備又唔係升得特別多。照計今年又應該好返啲嘅。

13. 特別想講埋個派息，因為呢隻都有啲人當係收息股。咁點都冇匯豐咁煩（但，當然政府干預銀行派息無處不在）。睇每股可能易啲，每股盈利就2.505，全年派息就1.242 – 留意剛好一半，呢個比率同舊年一樣，還好。佢地咁多年都大約維持住個派息比率40-60%，嚟緊都會。

14. 咁合理地預計，2021年派息，應該唔少過2020年。股息1.242，而家股價28.45，4.4%股息，還好，但唔見得極吸引。固然2021應派到，但銀行嘅嘢而家盈利冇以前咁好搵。

15. 不過都係嗰句，相信2021年各樣趨勢係好嘅，息差會升返，撥備又少返。所以我估呢（可惜睇唔到街估幾多），應該業績後有啲壓力（股價亦在高位），但買咗嘅唔使驚，未買嘅可以留意下。我係有渣的。

美股：冇人理韓仔，債息彈，美匯指數彈

16. 其他嘅，快講。你見呢，要擔心，真係個個月都大把擔心，咁就輸死—必定輸死畀通脹。你老味，1月又話驚Gamestop搞到對沖基金爆煲，2月又話驚債息升科技股死，3月又話驚韓仔。都未計一大堆咩中國爆煲 土耳其風暴  習近平打台灣 南海  blah blah blah，講真，seriously？世紀疫情（真係稱得上世紀）都係咁啦

17. 你見韓仔壇嘢，雖然仲有啲餘波，但明顯已受控，最衰係個市根本跌都唔跌，噓。

18. 但，反而另外兩個發展都令人有啲擔心，傳統都不不利股市。美匯指數升到94咁滯，4個月高位（其實好多短倉，又驚唔驚爆煲？），傳統上都代表避險情緒高。同時間，債息又升到1.77%，14個月新高—之前1.5%都叫晒救命啦，但市場真係會習慣的。而且有贏家有輸家（雖然整體上，你債息去到2%嘅，股市值搏率真係低咗好多） — 但你見，股市仲係企得幾硬，特別係美股。股乜災？星期一道指先創新高，跌返一百點又股災？當然你買啲股有問題就你個人問題啦。

嘉年華Carnival CCL，百度，騰訊音樂TME同雷蛇1337 又有力

19. 原本應該係「大師冇點你」時間，但寫咗先。先講百度同騰訊音樂TME，都大約預咗啦，韓仔打完靶，呢啲嘢咪彈返。百度就當然係睇中佢在香港第二上市啦，完全唔驚你除牌，節目都有講。騰訊音樂TME就小驚嘅，但啲業務正常啲（點都正常過跟誰學），股東又正常啲，又有Spotify。

20. 同時間，年頭推介嘅雷蛇，呢排又上返嚟。升好多肯定唔係架啦，高位都震得幾勁，但又係嗰句，照計年頭嗰時買都唔使輸錢，算係咁啦。

21. 最後，又係嘉年華Carnival ，都係重覆嗰句，推完有時我都有啲心大心細，因為波幅都幾勁下，以一隻傳統股都幾係嘢。但呢排依然係有力，聽聞同啲咩消費者信心有關，你見其他啲航空郵輪股都升返。都係嗰句，我估炒多一兩個月差不多。

睇下京東健康6618 同 平安好醫生1833

22. 冇喎，純momentum，當然京東健康出咗業績。兩隻都高位跌咗唔少，特別係京東健康，插四成咁滯。故事依然有得吹，加上股東背景勁。但當然呢啲就唔係長渣了。輸錢就……貴客自理。

========================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。