韓仔害人不淺，但睇騰訊音樂（TME）。中海外688 3個月新高！美股過去12個月回報史上最勁。但過去13個月美股只係升15%。十年錯過最好或最差十個交易日會有乜後果。 Deliveroo 70億鎊市值傻的嗎？三份一車手收入低過最低工資。英國黑膠銷量首次超過CD。B站值錢過知乎好多。TVB業績改善緊。CBS/Discovery狂跌。ASML 又新高 (Patreon)

快評幾句—韓仔害人不淺，但睇騰訊音樂（TME）

大師冇點你—中海外688 3個月新高！

每日一圖—美股過去12個月回報史上最勁。但過去13個月美股只係升15%。十年錯過最好或最差十個交易日會有乜後果

Good Read — Deliveroo 70億鎊市值傻的嗎？三份一車手收入低過最低工資。英國黑膠銷量首次超過CD

FB Post Summary — B站值錢過知乎好多。TVB業績改善緊。CBS/Discovery狂跌。ASML 又新高

1. 心情麻麻呀下，主要因為上客（OK，讀者）慢咗好多。今個月差不多係史上最低。咁固然因為冇乜賣廣告，又或者因為市況麻麻啲人唔疏爽？定因為我FB 寫得少文？但FB 已經出返多啲文，廣告都落咗啲，都冇乜改善，定因為月尾？無論如何都只係同大家分享下，繼續訂咪最好嘅支持咯，最好介紹埋朋友，雖然我知唔係咁易（又，一路話想搞referral program，有冇得諗？即係你介紹個朋友嚟我免你一個月月費咁）

快評幾句—韓仔害人不淺，但睇騰訊音樂（TME）

2. 應該會在Facebook講多啲，而下面FB Post都有講咗，但故事大家都知啦。今次不難理解，咪有人借孖展，然後堆「發夢股」大跌，補唔到倉，咪畀投行斬佢倉，不問價狂沽出街，所以你見到堆中概股同咩CBS/Discovery 之類大插

3. 但幾條戰線，先講被斬嗰堆嘢。CBS/Discovery都係估值離晒地，業務又冇乜特別，咪搞我。反而啲中概股正常啲，但真係有被人除牌嘅風險，唔會變廢紙（啩），但都會煩你一輪。所以你問我，最正路反而係睇百度—因為一早返咗香港上市，唔驚你除牌。但百度本身業務正係咁多間最差嘅—係咁架啦，邊有完美

4. 咁進取啲嘅，我會睇騰訊音樂（TME），生意正常，股東實力勁，而且有外資Spotify做股東，亦講咗會回購，應該OK

5. 咁另外，由於韓仔九成九冇錢找數，咁即係損失由啲投行食了。咁沽得快嘅咪好世界，你見高盛 摩根士尼利之類股價跌得唔多，因為講明損失有限—但呢兩間，瑞信同野村，就甘好多了。野村有量化，話分分鐘輸200億美金—都真係話少唔少話多唔多。一兩季業績見紅咁水平，但又未去到會危及健康嘅，2600億美金嘅Book喎，冇咗8%，咁股價咁跌都差不多。暫時未見到件事會造成咩金融風險，除非有咩行收埋收埋唔講啦。

大師冇點你—中海外688 3個月新高！

6. 公司出咗業績嘛。咁容許我又講多次成個故事，大約係舊年年尾推的。當時因為美國制裁跌落嚟，18蚊，叫大家買。好快就跌到差不多15蚊（你望下個52星期新低），都17%。但走去「止蝕」又係左一巴右一巴，之後就回升啦，今年更加相當勇。你見而家22蚊添，總之，肯定所有讀者都冇輸錢—除咗低位「止蝕」嘅。呢個例子亦畀你見到點解我唔多BUY「止蝕」。當然有時真係避免到你隻嘢total loss—但做乜要買啲咁嘅公司？

每日一圖—美股過去12個月回報史上最勁。但過去13個月美股只係升15%。十年錯過最好或最差十個交易日會有乜後果

三個圖都有啲關係

7. 美股過去12個月回報史上最勁—呢個圖幾好，一路隨住時間，睇美國過去十二個月嘅回報。咁去到呢刻當然勁啦，因為舊年3月股災嘛。但有幾勁？係1936年以嚟最勁。又掉轉講，如果你過去12個月都係冇乜進帳，甚至輸錢嘅，就真係不如幫襯「勞蘇基金」了。唔知咩係「勞蘇基金」嘅，可以睇呢度，或者呢度。有興趣歡迎PM我，冇任何commitment 或burden。

8. 但過去13個月美股只係升15%—但更有趣嘅係，如果我睇13個月呢？正如我成日講嘅例子，如果我舊年3月我畀人打暈咗呢？你發現，計13個月回報，即係標普指數舊年新高（而未大瀉前）時，渣到而家，又只係15%回報咋喎。好過份咩？又唔係。舊年2月話你知一年後你賺多15%，好似都合理。你可以細心諗下有乜教訓。但留意，如果你嘅諗法係「Timing 好重要」，咁就可以睇埋下面張圖

9. 十年錯過最好或最差十個交易日會有乜後果—冇錯Timing 係好重要，但，捉得到先得架。答案係極難，而捉錯嘅後果好嚴重。所以Stay Invested聽落好笨，但實在冇乜更好方法。呢個圖類似嘅版本我都貼過，但當時係講錯過最差嘅十日八日，回報大打折扣。有人問，咁如果係避開咗最差嘅十日八日呢？答案係，當然回報好好多，而且好顯著—因為股票跌嘅日子少。但，點可能避得開？你可以試下。

Good Read — Deliveroo 70億鎊市值傻的嗎？三份一車手收入低過最低工資。英國黑膠銷量首次超過CD

見呢排唔少英國讀者，就三篇都講返英國

10. Deliveroo 70億鎊市值傻的嗎？—相當短嘅文，好事，不過留意用咗唔少術語，自己可以查返點解。但一句到尾，都係認為呢啲公司嘅經營模式不能持續。疫情後只會更差。另外當然仲有係競爭，人地收平啲，你就即時坐低。不過放心，讀者如果係客仔有得抽嘅，當然都係抽，IPO價買就應冇衰。

11. 三份一車手收入低過最低工資—都係講Deliveroo．UBER就夠快手，而家大家認稱呢類公司真面目，就好難忽視啲車手嘅惡劣環境。特別係好多時公司都唔當佢地係「員工」，所以好多連最低工資都拎唔到。當然公司會話你知「有啲人拎幾萬蚊」。仲有，拎得少過最低工資嘅，「本身都係諗住過下日晨，有彈性」。

12. 英國黑膠銷量首次超過CD—黑膠同實體書之類近年有啲反彈，都唔係咩大新聞。不過在英國，舊年黑膠唱片銷量自1987年首度超過CD，都係值得一寫。但，主要都係因為CD係咁跌—根本兩者嘅銷量同串流相比都爭好遠，好遠。只係黑膠多班文青或有錢老嘢懷下舊。

FB Post Summary — B站值錢過知乎好多。TVB業績改善緊。CBS/Discovery狂跌。ASML 又新高

13. 寫足四篇文，但無助上新讀者，悲。

14. B站值錢過知乎好多— 自己相當滿意嘅一篇文，講點解啲平台估值可以爭咁遠。活躍人數只係最基本，但一日用幾多時間？易唔易拉隊走人？用戶有冇錢？有錢又係咪肯用落你度？全部都係原因

15. TVB業績改善緊—上星期四在呢度寫過嘅文，重寫一次。又，你見真係業績後升的，證明個判斷冇錯。

16. CBS/Discovery狂跌—原本都想寫，當時都未知韓仔單嘢。但兩間嘢啲估值都離晒地，上星期早少少已係咁跌，然後再觸發有人斬倉，再跌勁啲。

17. ASML 又新高—自high之作，但真係由我Patreon開始推，任何位買你都贏錢。何必買埋啲搞到自己擔驚受怕嘅嘢？又唔係真係升得特別多喎。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。