世紀筍Deal：英國價值股（附名單） (Patreon)

引言：價值股抵，英國價值股抵，英國價值股抵中之抵

英國股有幾大落後？

英國股市點解大幅跑輸？

即使以佢自己嘅歷史估值比較，英國股都係極殘了

富時指數入面有乜價值股？揀邊間？

引言：價值股抵，英國價值股抵，英國價值股抵中之抵

1. 呢篇應該唔長，但多圖。仲有埋個Excel畀你，雖然唔係好update，去到3月11日。冇法，畀人炒咗冇得用公司Bloomberg，我又未奢侈到在屋企裝部（差不多兩皮港紙個月）

2. 是咁的，之前啲文提過，今年我幾睇好英國股市。主要原因係因為：殘。嗰時都話今年估係舊年嘅相反，舊年唔掂嘅嘢今年掂，暫時都算幾準，你見舊經濟抬頭。而英國股市正係往年其中一個最差嘅股市。

3. 同時間，直頭有篇文提過，我都有放在Good Read，有人話「價值股抵，英國股抵，英國價值股就抵中之抵」，直頭話係Trade of the Decade．原文在呢度，但幾悶下。

4. 貼完之後，都幾多讀者問，英國價值股即係邊啲。咁所以開篇文講。另外，如無意外，如果搞得成（a big if），個「勞蘇基金」除咗會買港股美股A股（好可能唔會買A股，但放咗入去先），好可能都會買兩個市場：日本同英國，當然同我有興趣同睇好有關。唔知咩係「勞蘇基金」嘅，可以睇呢度，或者呢度。有興趣歡迎PM我，冇任何commitment 或burden。

英國股有幾大落後？

5. 首先講英國股市有幾跑輸。咁大家知道市值 = 盈利 X 市盈率咁玩，未講盈利之前，英國股市嘅估值，係跑輸晒其他股市嘅。例如睇呢個圖，2010年代，可能見到英國股市估值，同MSCI 環球相比，係折讓10-20%。但近幾年係去到30甚至40%。發生咩事？其中一樣當然係脫歐。

6. 如果同美國比，就更加明顯，「倫敦同紐約都係金融中心」「又講英文又行common law」，咁美股一路估值都高啲，但去到近年係拉開得仲遠嘅。

7. 咁另外，留意下每個行業嘅估值，差不多所有行業，美股嘅估值都高過英國。不過有趣嘅係，你見科技股，反而唔係差得太遠。咁點解英股美股估值爭咁遠？另有原因。不過呢度都講返，點分咩係「科技股」有時都唔係咁明顯。官方分法同你嘅理解未必一樣。

英國股市點解大幅跑輸？

8. 好啦，講咗英國股市跑輸，就要講點解。除咗頭先講嘅脫歐（十分明顯），亦有話同抗疫不力有關。可能係，但英股跑輸唔係呢一兩年嘅事。仲有一個最重要嘅原因：科技股。

9. 冇錯，頭先嘅圖話你知，英國科技股同美國科技股，估值好似唔係爭太遠。問題係，到底英國啲「科技股」計咗乜入去？英國到底有幾多「科技股」？你可以數下？Dyson？定做飛機引擎嘅勞斯萊斯？

10. 答案好簡單，以前都寫過，英國富時100指數入面，係冇乜科技股嘅。並冇好似美股FAAMG之類，亦冇香港嘅阿里巴巴騰訊。陣間會話你知入面最多係乜。但，大家都知呢幾年喪炒科技股，市場亦肯畀好高估值，咁英國市場冇，咪自然跑輸。呢個唔係英國獨有嘅問題，其實歐洲都係咁上下。上面嘅圖話你知，美股標普指數入面，科技股佔咗20%市值。英國呢？5%唔夠（留意係富時250，如果去到富時100更少，睇下一段）

11. 呢個圖亦見到，根本在富時100入面，科技股咁多年都只係佔2%左右，冇乜變過。而美國係一路升緊。英國富時100？好多係金融股消費股，同埋「其他」。

即使以佢自己嘅歷史估值比較，英國股都係極殘了

12. 好啦，但唔緊要，因為抗疫不力，脫歐，同埋冇乜科技股嘅原因，英國股市估值，算係相當抵嘅。首先係呢個圖，正係嗰篇文嘅，唔花太多時間講。留意佢比較咗用不同嘅估值標準，又比較咗唔同市場，仲要係比較自己同一個市場（英國自己同自己比）不同時間嘅估值。你見同其他市場比，英國股市固然平。但呢個都唔係最重要，最重要係，同佢自己比，英國股市都係好少有咁平嘅時間。入面嘅圖有比較返每國股市，處於佢地自己歷史估值嘅咩位置，好多都係近歷史最高嘅估值，唯獨係英國係近歷史最低。

13. 最後，類似earnings yield gap嘅概念。留意相對於英國國債（gilt是也），英國股票嘅股息率，都係近年新高。雖然舊文都講過，用股市率唔係幾好（我啲股票全部唔派息係咪就即時變零？），最好用earnings yield （1/市盈率）。但懶搵。

富時指數入面有乜價值股？揀邊間？

14. 好啦，最後，戲肉。富時100指數，入面有嘅公司，就在呢個Excel，Attachment有．唔係極update，3月中的，但已經盡做了。自己睇Excel．應該好易明啦？留意富時指數由舊年低位，去到今年3月中，只係彈咗35%，相當普通。標普指數彈咗七成幾。

15. 好，首先睇下，到底富時100指數入面，佔比最重嘅係咩公司。可能你都未必估到。匯控？唔係，佔第三。

16. 第一嘅係聯合利華Unilever，唔識間公司都識佢啲產品，Lipton茶呀，Dove呀，Magnum雪糕呀等等。第二大係近排好多新聞嘅藥廠AstraZeneca。你見仲有好多係跨國公司，例如油公司Shell咁—所以根本英國股市同英國經濟未必有乜關係。至於科技股？唔覺有乜喎。網上超市Ocado咯，但佔指數0.5%。仲有外賣仔Just Eat，比重同上

17. 咁直接去到我地嘅核心啦，到底價值股有乜？咩係「價值股」都有啲人拗，但基本上，你睇啲市盈率最低嘅嘢咯，我呢度都係用2021同 2022市盈率，搵最低嘅十隻出嚟，咁大家自己對號入坐了。

18. 個人覺得睇2022會好啲，2021始終啲嘢都大上大落，仲有啲補貼呀之類。咁睇2022先，最低市盈率，呢10隻嘢：Thank God 原來好多都係你識嘅公司。例如Imperial Brands同British American Tobacco係做煙仔嘅（自己睇有乜牌子），BT做電訊大家都知。Aviva 同 Legal & General都係保險公司。仲有Barclays，渣打，Lloyds都係銀行。咁就八間。

19. 剩返兩間，Polymetal係開礦嘅，主要係金銀，英俄企業（咪搞我）。3i嘛，有啲複雜，主要係私募基金，而下面係做基建多嘅。

20. 睇埋用2021市盈率去揀，都差不多係嗰堆嘢，預咗。重覆嘅不講，新出現嘅包括Evraz，鋼鐡股做埋開礦，又係英俄嘢，咪搞。Rio Tinto亦係開礦，英國澳洲，好多係鐵礦石。仲有 Anglo American，睇名都知英美，都係礦股。

21. 換言之，即係礦股，銀行，保險，煙仔。都係啲令人唔多開胃嘅嘢，正嘢就唔會咁平啦。銀行我就不如買美股了，煙仔好似都係，礦股理論上幾好炒，但堅唔識睇。所以你問我，可能會揀保險，Aviva或者 Legal & General.

========================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。