ivanliresearch

新經濟舊經濟唔好分咁細。ASML同萬寶路同時新高。Nike即彈（TVB都彈，但冇叫你買），仲有早排推嘅物管股。股市同實體經濟脫節！市場估加息一般估得太早。The Algebra of Wealth。Group Chat令人好有壓力。味將軍集團。文青就是矯情 (Patreon)

Published:

2021-03-26 22:00:15

Imported:

2021-07

Content

快評幾句—新經濟舊經濟唔好分咁細。ASML同萬寶路同時新高

大師冇點你—Nike即彈（TVB都彈，但冇叫你買），仲有早排推嘅物管股

每日一圖—股市同實體經濟脫節！市場估加息一般估得太早

Good Read — The Algebra of Wealth。Group Chat令人好有壓力

FB Post Summary — 味將軍集團。文青就是矯情

1. 早前唔知做乜又忙又冇乜心情．我懷疑因為打手機game（FIFA Mobile, in case anyone asks），所以已quit，講真真係心靈毒藥，課金事少嘥時間事大，有時仲要勞氣。你當我食古不化都好，建議你真係打少啲。細個打家用機或機舖都冇咁傷神花時間的。而家本Patreon幫你教埋仔。

2. 但收得大家錢，當然唔會交行貨。早前都因為市況悶冇乜好講。但你要明白，市況悶咪係買嘢或諗嘢嘅好時機咯。早排乜都升個個股神，唔多唔少都沖昏頭腦，驚執輸，驚而家唔買之後再升啦，係咪？幾時都係咁，悶嗰時適合儲貨買貨，滿街嚇死時更加應該買。去到乜都升晒時又冇咁高值搏率了。

快評幾句—新經濟舊經濟唔好分咁細。ASML同萬寶路美國同時新高

3. 早幾年當然係新經濟大獲全勝，咁今年你見舊經濟反彈好多。福士遠遠跑贏Tesla，廸士尼跑贏Netflix，呢啲我都講過，你在第度都會見到。

4. 但今次我想講：好多時咩「新經濟」「舊經濟」只係方便叫法，即係我都唔明做乜Amazon Facebook唔郁時，就畀人當唔係「新經濟」，亦唔明做乜春GameStop都有人當「新經濟」。留意，big cap small cap有客觀標準，「新經濟」就冇咁客觀，但個個覺得「新經濟」潮嘛，舊經濟即係渣嘢

5. 想講係，之前你話炒「新經濟」，不如話係炒「發夢股」（黃國英呢個詞真係好），英文嘅meme stock．呢堆嘢嘅特色係：唔見得有扎實嘅前景，一切都只係發夢。

6. 所以你話而家「新經濟」回調？係喎，星期五道指升450點，Tesla仲跌緊。但ASML 怒升7%，破埋頂。不愧為愛股。呢隻嘢唔會有乜新聞的，但你敢話唔係新經濟？

7. 而同樣地，我呢排成日講（實情買咗，而家唔係持牌人可以買了）嘅煙仔股 Altria（MO），都又新高喎。煙仔股唔係新經濟下話？根本唔係咩「新經濟」vs舊經濟咁二元。

大師冇點你—Nike即彈（TVB都彈，但冇叫你買），仲有早排推嘅物管股

8. 咁當然係大師冇點你認叻時間。先講風眼中嘅Nike，可能我講得太早，亦希望佢跌多啲（高位跌咗十幾巴仙，但一來跟市，二來業績後跌咗，第三先因為抵制單嘢），但你見星期四成交勁大，我地舊文有講。嗰時叫買了，話咁快見底。雖然都未係跌得好深，分分鐘仲有得調，但邊有完美？

9. 至於乜乜杯葛抵制，大家知我一向唔鍾意講政治噴口水。但大陸人杯葛又好，香港人杯葛又好，邊次唔係三分鐘熱度？最後不了了之，呢啲嘢好少長期影響到股價，三日後有人提已經好難得。你睇 L’OREAL 股價一樣升極都有。

10. 至於TVB嘛，叫你唔好買的，所以唔敢居功，加在括號入面算。你買咗就真係你叻，唔使多謝我。但重要係：真係見到業務改善中。你憎間公司一回事，你唔睇一回事（我都好耐冇睇，根本我就唔睇電視），佢啲嘢垃圾一回事（麥當勞呢？），但股價係另一回事。而家仲話大陸收入遲下會超過香港添，都唔係不可能，此消彼長。但再講一次，冇叫你買。

11. 物管股嘛，不用講啦，都話港股呢排我只睇物管股。冇呃你啦（但，而家可以留意其他嘢了），寫咗幾次。

每日一圖—股市同實體經濟脫節！市場估加息一般估得太早

12. 股市同實體經濟脫節！—雖然都成日講，但再貼下，因為呢句嘢真係害人不淺，咁明顯錯嘅嘢，但好多人當係鐵律。反正咩叫「股市」咩叫「經濟」咩叫「脫節」都任你講。但，明顯你見到，如果將啲每年經濟增長同股市表現放埋一齊，見到條線係負相關嘅。原因好簡單，首先係放水，二來係股市一定行在實體經濟之前。我使x等你今年年尾出數據先知經濟反彈咩。

13. 市場估加息一般估得太早—亦係有趣嘅圖，有機會詳解。但佢睇返歷史上市場集體智慧真金白銀賭嘅加息時間，同真實嘅走勢，都爭得幾遠。一般市場都係估得太早。事實都記得係咁，2009年嗰時已經有人話加息，結果拖到2015，我工都轉咗幾份。美中不足係佢個圖只係由2008開始，可能只代表係嗰一次市場估得太早。

Good Read — The Algebra of Wealth。Group Chat令人好有壓力

14. The Algebra of Wealth—幾長嘅文，但睇下。由GameStop講起，講財富轉移，美國一半年青人收入仲低過父母，史上首次。但然後話你知仲有機會累積財富。Wealth = Focus X Stoicism X Time X Diversification。最尾兩樣我成日講，Focus有機會講多啲（我自己都做唔到）。Stoicism應好多人未聽過（我都未），其實係教你……控制自己嘅慾望。好玄。但投資的確反映你嘅性格。

15. Group Chat令人好有壓力—講疫情下大家見唔到面，啲Group Chat多咗。但亦令人好有壓力。應該統計下大家有幾多群組，我就其實唔多的。