ivanliresearch

股市如女，Don't try to understand it. Feel it。王維基1137同中銀香港2388 果然大跌。股市一般四月幾好。今年SPAC普遍冇肉食。亞馬遜成為箭靶。Momentum vs mean reversion。韓仔害人不淺。伏士汽車。一個太古廣場三間星巴克 (Patreon)

Published:

2021-04-01 00:22:09

Imported:

2021-07

Content

快評幾句— 股市如女，Don't try to understand it. Feel it

大師冇點你—王維基1137同中銀香港2388 果然大跌

每日一圖—股市一般四月幾好。今年SPAC普遍冇肉食

Good Read — 亞馬遜成為箭靶。Momentum vs mean reversion

FB Post Summary — 韓仔害人不淺。伏士汽車。一個太古廣場三間星巴克

1. 大家愚人節快樂！不過我係唔搞啲無聊嘢嘅。心情靚返，因為多返啲新讀者（我嘅「要求」唔係太高），另外整體精神面貌都好咗。又，今日開始一連兩星期國際電影節，可能呢度啲文會寫得短啲，特別係週末專題。懷念以前有工返仲可以一日睇三場戲嘅精力。

快評幾句— 股市如女，Don't try to understand it. Feel it

2. 昨晚美股就冇乜特別。「不過標普指數又靜俏俏咁創新高咁咯」。留意債息都仲在高位，但市場已習慣。另外，反而係納指升得好過道指標指，可見真係唔係當科學實驗自然定律咁死拗。特別留意啲傳統Big Tech同埋晶片股都強。前者都仲理解，都悶咗好耐，但後者，你話晶片荒嘅，荒咗一輪啦，點解而家先升？

3. 乜都堅持問「點解會咁」，「點解債息升科技股都唔跌」，太頑固最後都係搵自己笨。以前都講過，我覺得股市似係對女仔咁（冇心對女讀者不敬），佢有時係唔講道理的，只能去感受佢。而幸好多數時間，你有耐心嘅，你對佢好嘅，佢都令你好快樂，不過偶然發起惡上嚟都幾係嘢，亦完全唔講道理。不如有機會寫篇文講呢個理論

大師冇點你—王維基1137同中銀香港2388 果然大跌

4. 都冇乜特別，但你見我真係幾有信心，果然如此。證明真係有啲技術含量，特別你見好多人都吹奏1137點轉虧為盈，完全無視下半年純利急跌，甚至冇睇保就業，亦冇留意股價在乜位。咁當然，理論上你知道會大跌，不等於你會搵到錢。首先，好多時一開已經插，二來散戶亦做唔到沽空—但，至少我諗到兩樣嘢。第一，至少你知道個市場點運作。第二，有時個「市場」錯嗰時，你識得去擇善固執。你知道個業績根本係好好嘅，雖然唔知做乜隻嘢大插（但又話說回頭，而家「市場」錯嘅時間好似比較少）。

每日一圖—股市一般四月幾好。今年SPAC普遍冇肉食

5. 股市一般四月幾好—聽日會寫下第一季檢討，但簡單嚟講第一季美股港股都升，如果你輸錢嘅，就檢討下。但畀個好消息你：一般嚟講美股4月表現都幾好，原因不明，亦唔知係咪statistically significant，但畀你壯下膽。固然美股長期平均個個月都升，但4月都係特別好嘅。有賭未為輸，記住，保持樂觀，stay invested，「其實真係咁難咩？」

6. 今年SPAC普遍冇肉食—每個月份嘅SPAC首日平均回報，你見去到今個月，變咗完全冇得升。根本SPAC呢樣嘢唔係咩新發明，有咗十幾廿年，只係陪住舊年發夢股狂潮嘅一個衍生產物。固然順勢炒就乜都好玩，但成件乳酪都走咗嘅，仲企定定等畀人碌死就似乎唔係咩明智之舉（有機會講下Who moved my cheese：最有趣係我點樣由鄙視呢類書，變成同意 —亦即係我點樣由一個憤世嫉俗嘅窮文青，變成一個憤世嫉俗嘅中產文青）

Good Read — 亞馬遜成為箭靶。Momentum vs mean reversion

7. 亞馬遜成為箭靶—其實唔止係「箭」靶，不過你見呢個newsletter我好少粗口。固然有啲讀者話有埋更好，但，「屌你你係咪畀多幾倍錢先？」「我會得失其他潔癖讀者嘛」。Anyway，講返，即使以相當寬宏嘅標準，亞馬遜都係一間幾仆街幾邪惡嘅公司，可愛在連啲門口功夫佢都唔多做。最近在美國更加成為民主黨左翼（拜登已經冇咁左）眼中釘，篇文有講各樣嘢，幾好睇。順手一提，我見唔少香港朋友，又要講仆街大企業剝削，但又要屌民主黨（美國啦）左膠，十分奇怪。

8. Momentum vs mean reversion — 都話好鍾意Charlie Bilello嘅文，寫得淺白又冇廢話。講市場兩個最重要嘅力量，momentum vs mean reversion，某程度上亦係Greed vs Fear．有時講順勢，但有時又係物極必反 —之但係，去到邊個位會逆轉，係極難捉嘅。而兩者仲要係矛盾嘅，永遠你事後講都有理由。正如今日篇文最初講，有時就係冇乜點解，唔好咁執著。