聯儲局2023年底前都唔加息，堅持通脹只係暫時。債息一樣照升，震散科技股，但慢慢就慣。李嘉誠梗係益自己啦，但還好啦。 (Patreon)

聯儲局2023年底前都唔加息，堅持通脹只係暫時。

債息一樣照升，震散科技股，但慢慢就慣。

李嘉誠梗係益自己啦，但還好啦。

1. 少少作息調動，所以呢兩日都一早起身（或者未訓！）先寫，以前就寫完先訓。應該唔會成為新常態。不過有讀者話早起身對我好喎。今日寫三單東西，三單都比較大嘅。多人問李嘉誠，但其實唔係咩最重要嘅事，我放到最尾，鍾意嘅直接skip落去。

聯儲局2023年底前都唔加息，堅持通脹只係暫時。

2. 先講冇咁多人關心，但應該係比較重要嘅，聯儲局。固然冇加息，但仲有好多他嘢睇，特別係因為一年有四次佢會有個詳細嘅報告，講對經濟同息口嘅睇法，而且有圖有數字，唔止得個講字。

3. 昨日都寫過下，你亦可以睇原文，睇返佢對各種經濟數據嘅預測。呢度貼多次，但簡短講：預經濟今年強勁復蘇，當然失業率跌。更重要係預通脹會升，高過2.5%。但更更重要係講2023年底前都唔會加息。

4. 今日用幾個圖講詳細少少。首先係經濟增長，同通脹。前者聽落好重要，但經過舊年同今年你應該知道同股市可以冇乜關係。後者呢排不停有人講。見到嘅係，同上次（12月）相比，聯儲局對今年（2021）經濟增長同通脹嘅預測，上調咗唔少。但對長期經濟增長同通脹嘅預測，同12月時冇乜大變—即係點？即係佢地相信通脹升溫只係暫時，經濟反彈亦只係短期。呢個亦係佢地合理化2023年底前唔加息嘅理由。當然聯儲局啲友都係人，可以錯，可以落後於形勢。

5. 同樣地，聯儲局有所謂「長期失業率」嘅預測，理論上講嘅full employment（因為經濟點好都總會有啲友失業）。聯儲局睇「長期失業率」係4%，而家係6.2%，有排未到，佢地亦認為勞工市場仲係好疲弱。同樣地，係用嚟合理化2023年底前唔加息嘅理由。

6. 另外，睇個加息時間表，一粒豆豉代表一個聯儲局委員。紅色線係中位數，所謂嘅「共識」，每次會議嘅變化。2022年冇乜懸念，絶大多數委員都覺得唔會加，但今次已經多咗幾丁友覺得會。2023年你見分歧再大啲（雖然都係少數人），多咗好多粒豆豉覺得會加。下面嘅圖summarize 啲豆豉數目

7. 大約係咁，悶悶地，但我應該已經畀絶大多數人解得好同冇咁悶。咁你話，知咗呢啲嘢有乜用？對你短期炒股好似真係冇乜用，但唔係咁短視的，你睇得多，自然知道嗰啲友嘅mind set．第二，而家太平盛世你覺得冇用，但兵荒馬亂（例如舊年3月）你先去研究佢地啲機制，就太遲。況且，即使平時，都真係有啲用的。下一段講。

債息一樣照升，震散科技股，但慢慢就慣。

8. 好啦，似懂非懂消化咗上面呢堆嘢，講好貼身嘅，市況。早排先話似乎新經濟股同舊經濟股開始分野冇咁大，唔知係咪 fake signal，結果昨晚（星期四）又再見到新經濟大幅跑輸。

9. 仲有，你見有時我都抗拒「新經濟」之類嘅稱呼。直接啲講，鍾意黃國英講嘅名，發夢股，或者英文講嘅meme stock。你見啲冇乜錢賺嘅公司，或者估值極貴嘅，就跌得勁。傳統咩FAAMG，悶，但真係跌得唔多。

10. 但一樣，你話股災？星期三道指先33000，破紀錄新高，星期四先跌0.5%，股乜災？仲要好大程度因為啲石油股拖累。你睇，JP Morgan同Altria （MO）都新高喎．（又，Altria，煙仔嘢，萬寶路美國，以前買過。美國以外係另一間，Philip Morris，有機會講多啲。）

11. 元兇，當然又係債息了。不過呢度睇嘅大方向都暫時OK準—債息再升，發夢股再跌啲，但已經冇咁誇張。你睇下，10年債息上到1.75%！兩個星期前1.4%已經叫晒救命，市場都係會開始慢慢慣的。

12. 同樣地，你睇30年債息（比較少人睇）仲勁，2.5%，差不多兩年新高。

13. 亦證明咗一樣嘢，亦係我地早前講嘅：好多人根本長息短息都未分到。見到聯儲局又話唔加息，但債息又狂升，完全唔明。好簡單講：聯儲局只能控制短息，越短嘅就越易控制，長嘅就比較多係市場力量。

14. 咁你見長息升，因為啲友擔心通脹，或者係因為經濟復蘇（冇人話債息升一定係壞事）。但同樣地，啲短期嘅債息，係跌嘅，因為聯儲局講話2023年前都唔會加息嘛，原本估2023甚至2022加息嘅，又落空啦。

15. 咁拍埋一齊睇，聯邦基金利率（聯儲局直接控制嘅）繼續近零，短期債息跌（聯儲局都易影響到），長債債息升（市場睇通脹／經濟復蘇）。條yield curve 越嚟越斜，梗係利好銀行股啦，你睇JP Morgan創咗幾多日新高？呢度都講過十次八次。

16. 不過話說回頭，銀行呢味嘢，而家都同郵輪航空唔係好大分別，都係周期嘢。固然好過郵輪航空少少，但唔係以前咁暴利了。

李嘉誠梗係益自己啦，但還好啦。

17. 好，最後，李嘉誠。雖然我有時真係唔明做乜大家花咁多時間討論佢啲嘢。對恒指或市場嘅影響？其實唔多。你覺得佢叻（當然叻，唔通你同我叻？），咁諗住佢做乜你跟住做？咁，跟咗咁多年，又係咪work？

18. 我在Facebook亦寫咗篇文，比較另類嘅角度。我都算係長和系嘅sort of 支持者，呢度都寫過好多篇，甚至第一篇就寫佢，In KS We Trust，過去大半年佢不停增持，咁你跟住就真係冇死錯人嘅，但都有人嫌升得慢。更不用講，之前幾年，股價連跌3年，3年都跑輸大市。佢好叻？maybe，但有冇益你？似乎冇。以前就似係有

19. 但無論如何，大家都想聽，我都講下呢單交易嘅少少重點，以及你想問嘅嘢。單嘢唔算好複雜，兩部份，首先係買嘢，印公仔紙買嘢。然後係回購，亦即「有條件現金要約」。

20. 買嘢嘅，170億，買返李嘉誠基金會嘅嘢。錢何來？冇的，發新股畀李嘉誠基金會，即係佢自己。講得難聽啲，就係上市公司，買返大老細私人自己嘢。換著第啲公司你鬧咗啦。

21. 買乜嘢？你見都係啲公用事業嘢，供水供電，而且只係細份股權，主要就真係為咗現金流。買得貴唔貴？冇細睇，但照計佢做嘢唔會太過死錯人。

22. 好啦，去到呢度你應該問，亦有讀者問，喂，會唔會買貴貨？你搵上公司錢去買自己嘢喎。答案係，可能會的，所以，關聯交易，係要股東投票嘅。但我覺得係好事，有啲公司狗啲，每年買少少咁繞過呢啲例咪仲衰。

23. 對股價利唔利好？寫嗰時仲未睇到，但歷嚟佢地做嘢，多數都利好股價—況且，股價都殘咗好耐了—亦可以話根本佢地揀呢啲時間先做。

24. 第二部份，就係回購。咁有啲特別，你見平時回購唔使搞場大龍鳳的。因為佢同匯控（5）之類嘅做法唔同。匯控之類係在個市場度買，長實係同你買—仲定咗個價，51蚊。

25. 咁實務上點做？我唔100%肯定，但應該唔係在市場上棟個盤（因為買賣冇得揀對家的）。正路係你會收到信，然後你填，畀唔畀佢，畀咪填畀幾多，唔畀咪唔理佢。當然你畀佢亦唔一定收晒，要睇有幾多人畀。亦都有講收唔夠嘅，會有機會直接在市場買。

26. 好啦，咁如果有股票嘅，畀唔畀佢？答案係：正常唔好畀，都唔會太難明啫。佢用得51蚊同你買嘅嘢，當然唔止值51蚊。固然啲嘢在你手上同佢手上唔同價值，有啲公司一拍兩散，你唔畀佢之後就爦炒，你冇機會甩身，但長實似乎未係咁狗嘅公司。

27. 最後，啲implication，正如唔少評論講。對李嘉誠最大嘅得著，就係有機會增持一大截，36%變到45%。其實佢地過去一年一路游說改例（我話你知嘅），但唔多成功，於是諗呢個方法，係幾聰明的。

28. 至於有人話「私有化」，正好相反，就係唔想益你，亦唔想出溢價。你見特別拎咗豁免，要你唔使佢全購，佢先會做呢堆嘢。咁你又可以再諗下，佢不停想增持，拎你手上嘅嘢，咁個價係對佢有利定對你有利？

29. 最後，留意長和長實業績倒退都減派息，但冇人話盈利倒退一定要減派息。你見長江基建1038就業績倒退都加派息，而長實中期業績嗰時減派息，已講明話留返彈藥做收購。幾間公司定位唔同，講得幾清楚的。

30. 拿，剩係呢段李嘉誠評論，都值得你叫朋友嚟睇啦。晏少少我會貼上FB賣廣告的。李嘉誠係好好嘅廣告招牌，但無論如何你地睇咗頭啖湯先。

31. 講到尾，睇你點睇。當然最大贏家係李生自己，亦係見股價殘嗰時先出手執平嘢。但，又總好過有啲大股東連股價低迷都唔理嘅，有啲大股東根本唔care．